Proverbios 15 - Papang Yulni

¹ Minikun talwi yul kalyulwa kidika laih kulnin daukalna kidika yamni kalwi; parasni kalyulwa kidika laih baisa daukalwi.

² Sins duyang balna kungninamak kaupak sins tuhni kalahwi; tapdadas balna tininapas kaupak, dutni kidika kalahwi.

³ Dawan laih pa bitik yakat sakki muih yayamni dawak dudutni yakat bik maintalwi.

⁴ Tuni minikun karak yulwa kidika laih sangka panan as ki; tuni dutni kidika laih spirit daukalwi.

⁵ Tapdadas kidik papangni yaklauwi barangni āwa kidika dauh kulwi; dakawa kidika laih sinsni sirihni kidika lāih yakwi.

⁶ Muih di barangni manah yamwa kidika ūni yakat laih di mana ki, kaunah muih dutni kidika laih witing kaupak di as yakwas ki.

⁷ Sins duyang balna kidika laih sins tuhni kidika uhuhwi kungninamak kau. Tapdadas balna laih kulninna kau, nawatni manah yayamwi.

⁸ Dawan dukih kalawas ki, muih dutni balna minitdis dini duwi uiwa kidika, kaunah la kat balna minitna yuyulwa kidika dukih duwi.

⁹ Dawan dukih kalawas ki muih dutni balna yayamwa kidika, kaunah sangninaka barangni yakat laih dalani talwi.

¹⁰ Ta yamni dawa kidika yakat yul damni kau barangni ānin; bilwak waihla kulwa kidika laih, dauwarang.

¹¹ Dawan minikpa yakat daunin dawak sau ū bik sakkidika, ¡mahlaih ki, muih balna kulninna yakat laih!

¹² Tapdadas kidika dalani talwas ki bilwa yakat, sins duyang balna karak atnin kidik dukih kalawaski.

¹³ isning alasna kidika muihni bik alasna ki; isning siknis kidika, kulnin bukna ki.

¹⁴ Sinsni sirihni kidika, amanglanin kidika walwi, kaunah tapdadas balna laih dutni kidika kasnin wawalwi.

¹⁵ Kulnin bukna muihni kidika laih, ma bitik kidika dutni ki; isninglak kidika, alasna manah ban ki.

¹⁶ Tanit yamni ki minikunni dawak Dawan risnipik kalnin kidika, dawak di duyang kaunah kaidana manah atnin karak dawak.

¹⁷ Tanit yamni ki kulnin dalani karak di minik kasnin, dawak turuh muihni kasnin kulnin waihla karuk.

¹⁸ Kulnin daihni kidika laih kalbaunin walwi, kulnin laihwatwa kidika laih, sanni kalwi.

¹⁹ Baskiwah tani kidika laih wakal manah ki; muihni al barangni kidika tani laih panuhni yamni ki.

²⁰ Walanibis sins duwa kidika laih papangni alasnina yamwi; walanibis tapdadas kidika laih dauh kalkulwi.

²¹ Isningpuk awas kidika laih dutni yamwa kidika alasna duwi; sinsni sirihni kidika laih alas tani barangni yamwi.

²² Yulwi dakawas di yamwa kidika, wark balna daukalwi; yul manas sumalwa munah di yamni kalwi.

²³ ¡Ais yamniyah, walwa yulni kat yakwa kidika, tanit yamni ki mani kat yakwa kidika!

²⁴ Sangka atnin tani kidika laih mayakauh kilwi kiwi, dawak sins duyang kidika laihwi yakwi sau-ū kaupak.

²⁵ Dawan yaklauwi daukalpamwi witing manah kapat dakawa ūni kidika, kaunah tingmak ūni kidika laih ban ki, satuk kalwas.

²⁶ Dawan dukih kalawas ki muih dutni balna warknina kidika, kaunah yulni balna dutni dis yulwa kidika laih dukih kalawi.

²⁷ Tumnin duwa kidika, silp ūni daukalwi, tani duwa yakat dakawas kidika laih sangka karang.

²⁸ Muih al la kat kidika laih yul kulwi witing amput nangnitlanin kidika, kaunah muih dutni kidika laih tinpas kaupak dutni yulwi.

²⁹ Dawan laih muih dudutni balna kaupak naikau kiwi, kaunah la kat muihni balna minitnayuyulwa kidika laih dakawi.

³⁰ Minikpa yaringni talwa kidika laih isning alasna ki; yul yamni kidika parasni wisam kalawi.

³¹ Bilwa kidika munah sangnika kalawa yakat dakawa kidika, sins duyang balna pasyak pa as duwarang.

³² Barangni kalyakwak dauh kulwa kidika witing alas muihni yakat dalani talwas ki; bilwa yakat dakawa kidika, di amanglawi.

³³ Dawan risnipik kalanin kidika laih sins tuhni yakat sumalwi; rispik kidika dunin kat, tatuna limahni atnin ki.