Proverbios 13 - Papang Yulni

¹ Walanibis sins duwa kidika laih papangni yaklauiwi barangni kalyakwak dakawi; kaunah tapadadas kidika laih bilwa kidika dakawas ki.

² Muih bitik laih ais yulwa kidika minit anawi, kaunah barangni awas balna kidika laih kalbaunin kidika yuh diawa kapat ki

³ Mayulki pini yulnin awas kidika laih silp mainkaltalwi; uba yulbauwa kidika laih silp kaldaukalwi.

⁴ Baskiwah kidika di dukih kalawi kaunah yakwaski; wark kalahwa kidika laih barakwi.

⁵ Muih al la kat kidika laih alas yulnin kidika waihla talwi; muih dutni kidika laih asalni dawak risnipik dis manah ki.

⁶ Barangni kidika yaklauwi muih al dutni yamwas yakat nanitdakwi; dutni kidika yaklauwi kaldaukalpamwi dutni yamyang yakat.

⁷ Muih buas di dis karang bik duyang kapat kaldakawi, dawak muih ūk laih duyang balna miniknakunni kapat ki.

⁸ Rits muihni kidika, ritsni yaklauwi kallaihwi yakwi; minikunni kidika laih dutni kalyamnin yuyulwas ki.

⁹ La kat balna kidika laih awas yaringwa kapat ki; kaunah muih dudutni balna laih awas piwa kapat ki.

¹⁰ Witingna manah kapat kaldakawa kidika laih kalbaunin manah yamwi; sins tuhni kidika laih limahni balna karak ki.,

¹¹ Alas munah ritsni kidika laih parahyak bukwi; kaunah tani tani uduhwa kidika laih, minitkau lāwi.

¹² Tahanin as dauhkalwa kidika laih, isning bukna, dukih kalawa yakat yamna kidika laih, pan as sangnika duwa kapat.

¹³ Yamnin pakwak yamwas dana kidika laih, kaidarang; yamnin kalyulwa yakat rispik kulwa kidika laih minit duwarang.

¹⁴ Sins duyang sumalwa kidika laih sangka rikni, daunin wahni kaupak laihwi yakwi.

¹⁵ La kat yamwa kidika laih yamni kaltalna ki, barangni awas kidika laih daukalnin yakat kiwi.

¹⁶ Isningpuk kidika laih sins sirihni karak di yamwi, kaunah tapdadas kidika laih di yamni yamwa kapat dakawi.

¹⁷ Muih dutni as yul duwi kiuyang kidika laih pāt duwi, kaunah yul duwi kiuyang barangni kidika laih ingni kalyamwi.

¹⁸ Yul dakawas muihni laih minikunni dawak bik rispik dis karang; barangni kalyakwak dakawa kidika muihni laih risnipik nuhni karang.

¹⁹ Dukih kalawa kaput yamna kidika laih alasna ki. Tapdadas balna kidika laih dutni kaupak naikau kalahnin kidika sip-awas dakakawi.

²⁰ Sins duyang balna karak kalpaktah sins tuhni duma; tapdadas karak kalpaktah lus disma.

²¹ Dutni yamyang balna laih dutni kidika diuiwi; la kat balna kidika laih, di yamni kidika minitna duduwarang.

²² Muih al yamni kidika dini balna kidika diawi mani balna yakat; kaunah muih dutni ritsni balna kidika laih la kat muihni kidika dini karang.

²³ Minikunni yanimak yakat, kasnin dini manas ki, kaunah manas diswi la kat yayamwa kidika yakat.

²⁴ Wais walanibis yul sumalwas laih, dalani talwas ki; dalani talwa kidika yakat laih barangni āwi.

²⁵ La kat muihni kidika laih kaswas isninglak dawi, kaunah muih dutni laih yuh kalawi.