Proverbios 12 - Papang Yulni

¹ Yul dakanin kidika dalani talnin laih, di amanglanin kidika dalani talnin; bilwa yakat waihla talwarang laih di amanglawas ki.

² Muih yamni kidika Dawan duwi, dawak dutni dukih kalawa kidika laih dutni yakat ruhmwi.

³ Dutni laih rahni parasni awaski muih bitik yakat; la kat balna kidika riknina ban kaput ki.

⁴ Yal sampla kidika laih, lani yakat king kapat yamwi, kaunah yalni dutni kidika laih bitik kaldaukalwi.

⁵ Ahal la kat balna kidika laih la kat yamnin kidika kukulwi; muih dudutni kidika laih alas kalyulnin manah kukulwi.

⁶ Muih dudutni yulnina kidika laih laihnin dini malnikau āna yamadangni kapat ki; la kat alni kidika laih, laihwi yaknin.

⁷ Muih dudutni kidika bubukwi, yakat dahnkalwi, kaunah la kat muihni balna ūnina laih ban kasakni sakki.

⁸ Muih yakat ayangni nuhni yamwi sinsni sirihni kidika munah, kauna mutu kidika laih minitdis kalkulnin manah ki.

⁹ Tanit kulna ki dau kalkulwak kaunah, di yamni bayahna kat; nuhni kalkulwi kaunah dutni di kasna kat.

¹⁰ La kat kidika amanglawi tingnilau balna bik kaldakakawa kidika, kaunah muih dudutni laih minikun talnin kidika amanglawaski.

¹¹ Witing sauni yakat wark yamwa kidika, kasnin manas duwi; isningpuk awas kidika laih ilp dunin awas kidika yamwi.

¹² Di dutni dukih diawa kidika laih muih dudutni balna dilaihnin dini; la kat balna riknina kidika laih ban kaput ki.

¹³ Muih dutni kidika laih silp alas yulwa kidika kalbalakwi, kaunah al la kat kidika laih di sirihni kallaihwa kaupak yamni dakwi kalahwi.

¹⁴ Muih bitik laih ais yuyulwa minik kidika ananawi dawak ais yamwa kidika minit duwi.

¹⁵ Tapdadas kulwi, di yamwa bitik kidika yamni manah ki, kaunah sins duwa kidika laih yul sumalwa yakat dakawi.

¹⁶ Tapdadas kidika kulnin daukalwak lāih yakwi; isningpuk muihni kidika laih, kaluswa kidika dakawas dawak bayakwi.

¹⁷ Witnis rahm kidika laih, yul rahm kidika yulwi; witnis alas muihni kidika laih alas manah yulwi.

¹⁸ Muih buas yulnina kau dalani diayawi, kaunah sins duyang balna yulbabauwa kidika laih dalawa kidika dis dawi.

¹⁹ Di rahm yulwa kidika laih ban sakki, kaunah alas muihni laih minit as bayakkiwi.

²⁰ Muih dutni balna yamnin kukulwa kidika yakat laih alas sakki; muih al kulnin aslah duwa kidik yul sumalwa laih alasna ki.

²¹ Muih al la kat kidika laih wat as bik dutni wauhwas karang, kaunah muih dutni kidika laih, dutni balna bitik libitwi kalawarang.

²² Dawan dutni talwi alas muihni balna yakat, kauna yamni ditalwi, di rahm yayamwa balna yakat.

²³ Sins sirihni duyang kidika witing manah kapat kaldakawas ki witing di amanglawa kidika, kaunah tapdadas sins dis yamwa kidika di yamni yamwa kapat kaldakawi.

²⁴ Wark kalahwa kidika laih witing yaklauwi minit bayakwarang; kaunah baskiwah kidika laih witing yakat minit bayakwarang.

²⁵ Kulnin kaida kidika yaklauwi muih al yakat taihwi; minikun talnin yulni balna kidika laih alasna yakwi.

²⁶ La kat kidika laih wanaihni tanituna duwi; kaunah muih dudutni laih ta didiswi.

²⁷ Di iyang baskiwah kidika laih sip di iwaski, kaunah talna di yamwa muihni kidika laih ritsni nuhni laihwi.

²⁸ La kat yamnin tani kidika laih sangka atnin yakat dukiwi; isningpuk awas muihni kidika laih daunin yakat dukiwi.