Proverbios 11 - Papang Yulni

¹ Paun rahm awas kidika laih Dawan dutni talwi dawak paun yamni kidika yamni talwi.

² Witing manah kapat kaldakanin kidika laih; sins tuhni kidika laih muih limahni karak ki.

³ Muih ahal bararangni balna kidika laih barangni kidika di duwi kiwi; muih ahal dauh balna kidika laih, dauh kidika yaklauwi didaukalmukwi.

⁴ Ritsni balna kidika la yamwarang mani yakat ilp as dis karang ki, kaunah la kat kidika laih daunin kaupak laihwi yakwi.

⁵ La kat yamnin kidika laih lakat muihni tani kidika barangni āwi, kaunah dutni yamyang kidika laih, silp dutni yamna yakat bukwi.

⁶ La kat yanin kidika laih laihwi yakwi ahal barangni balna yakat, kaunah tumnin laih barangni awas balna yakat ditaihwi.

⁷ Muih dutni kidika dauwakat, witing karak dauwi tahanin duwadai kidika.

⁸ Papang yaklauwi laihwi yakwi, la kat muihni kaida kidika kaupak, dawak witing pāni yakat muih dutni kidika āwi.

⁹ Muih dutni yulni balna kidika, wanaihni yakat kaldaukalwi, kaunah la kat muihni sinsni sirihni kidika laih laihwi yakwi.

¹⁰ La kat balna laih bararakwi dawak, tawan nuhni kidika alasna kalwi; muih dudutni balna dadauwak, alasna kalahwi.

¹¹ Holi balna blininasin karak tawan nuhni as yayamwi, kaunah muih dutni balna yulnina kidika laih, daukalmumukwi.

¹² Isningpuk awas muihni kidika laih kaltalyang yamni kidika niningyakat dutni yulwi; kaunah isningpuk muihni laih ap ki.

¹³ Yul trukyang kidika laih di bitik yulwi; muih as witing yakat makulnik adi duda kidika laih, malnin dini kidika apakwi duwi.

¹⁴ Kabamint yamni dis kat kidika nisan laih dutni yakat kiwi; minit bayaknin kidika laih yul mahni sumalwa munah ki.

¹⁵ Taldas muihni as ilpni yamnin laih dutni maikalahwi; muih tunan minit kawas kidika laih isninglak yalahwi.

¹⁶ Yal muhni alasna kidika laih risnipik kidika duwi, al isningkulwas kakiwa kidika rits kidika duwi.

¹⁷ Kulnin yakat minikun talnin duwa kidika, witing alas muihni yakat yamni yamwi, kaunah kulnin dutni kidika laih witing alas dutni yakat kiwi.

¹⁸ Muih dutni kidika laih minit lauwi kalawi alas karak; la kat yamwa muihni kidika laih, minit yamni duwi.

¹⁹ La kat yamwa usnit yakat kiunin laih sangka yakat maidukiwi, kaunah dutni usnit yakat kiunin laih daunin yakat kiwi.

²⁰ Dawan dutni talwi, kulninna dutni duduwa balna yakat, kaunah dutni yayamwas balna yakat laih yamni ditalwi.

²¹ Rahm laih, muih dutni kidik wah duwas laih bayakwas karang kaunah la kat muihni balna laih yamni laihwi yakna karang.

²² Gol ting-ānin kidika kusih nangnitak yakat kapat ki, yal yaksihn as tunanba yamni awas kidika.

²³ La kat muihni balna dukih diawa kidika laih yamni manah kalahwi; muih dutni balna ting yayamwa kidika laih kulnin daukalnin manah ki.

²⁴ Muih sat ūk kaldakawas kidika kalawa kidika kaupak baisa minit yakat duwi, dawak yamni tatalwas muihni kidika laih minikunni yakat diswi.

²⁵ Kulnin yamni muihni kidika laih barakwi; muih kau kalawa kidika, muih ūk kaupak nawatwi duwi.

²⁶ Di minik balna laihwatwi duwa kidika, muih balna yaklauwi dutni kalyuyulwi; wauhwi bakanwa muihni yakat laih yamni kalyuyulwi.

²⁷ Di yamni usnit yakat kiwa kidika, yamni kaldunin kidika walwi; dutni usnit yakat kiwa kidika laih, dutni kalkalahwarang ki.

²⁸ Ritsni yakat kulnin āwi duwarang laih, dibasta kusuni kapat bukwarang, kaunah la kat balna laih pan basni sangni kapat karang.

²⁹ Ūni maintalwas kidika laih, di as bik diski; tapdadas kidika laih, sins duyang dini yamyang ban karang.

³⁰ La kat yamnin kidika laih sangnika kalawi, kalbaunin laih sangnika dakwi.

³¹ La kat yamwa muihni kidika sau akat minit duwakat, ¡amput dawak muih dutni yamwa kidika minit duwas karangyah!