Proverbios 10 - Papang Yulni

Tatuna yulni balna “Salomón kulnin lani”

¹ Salomón kulnin lani: Walanibis sins duwa kidika laih, papangni balna yakat alasni diawi; walanibis tapdadas kidika laih diyamwak wawauhwi.

² Ritsni balna malna kidika laih di duna awaski, kaunah barangni manah di yamwa kidika laih daunin kaupak laihwi yakwi.

³ Muih yamni kidika Dawan yaklauwi dāwak yuh dauwas ki, kaunah muih dutni yakat laih kaskih kalawa kidika kalawaski.

⁴ Wark binilah, minikunni; wark nuhni, ritsni.

⁵ Kurih mani yakat di minik bahnin laih sins duyang; di minik bahnin mani kama kidika laih, asalni.

⁶ Muih al yamni minit yakat blisin uhwi, kaunah muih dutni kidika laih, kalbaunin kidika kal-iwi.

⁷ Muih yamni kidika laih isningpuk ki blisin kidika; muih dutni kidika laih, sirihni kat dinitkahwi.

⁸ Sins duwa kidika laih la balna kidika duwi; tapdadas yulni kidika laih kaldaukalnin yakat dukiwi.

⁹ Tras dis kidika laih yamaduwas ki; dutni likkidika laih, dutni dahnkalwi.

¹⁰ Wais kat minikpa suyungwa kidika laih, dutni nuhni murwi; tapdadas yulni kidika laih kaldaukalnin yakat dukiwi.

¹¹ La kat muihni yulni balna kidika laih sangka atnin rikni, kaunah muih dutni kidika laih kalbaunin kidika kal-iwi.

¹² Waihla lani kidika laih kalbaunin kalahwi, kaunah dalani lani laih dutni balna dawak diswi.

¹³ Sins duwa kungnimak yakat sins tuhni kidika sakki; isningpuk awas kidika laih, dangni yakat pan dakni kau wiwiswi.

¹⁴ Sins duyang balna kidika laih amanglanin duduwa kidika apapakwi, tapdadas balna yulbabauwak, yamadangni kidika kalahwi.

¹⁵ Di duyang nanitdakwa kidika laih ritsni kidika kau; muih minikunni dutni yakat kiwa kidika laih di dis kidika yulni.

¹⁶ La kat muihni minit duwarang kidika laih, sangnika; muih dutni minik bahwarang kidika, dutni.

¹⁷ Barangni kalyakwa yakat dakawa kidika laih sangka atnin tani yakat kiwi; dakawas muihni laih, disnin tani yakat kiwi.

¹⁸ Waihla kulwas kapat awa kidika laih alas muihni, dawak yul truknin kidika laih tapdadas dini.

¹⁹ Yulni mahni yulma kidika, mistik manas yulwi; Awarni kat ap danin kidika laih sins lani.

²⁰ Lalah yamni kidika laih, la kat tuni kidika; muih dutni kulnin kidika laih di dauh ki.

²¹ La kat kungnimak kidika laih muih mahni lan yamwi, kaunah tapdadas laih dauwi isningpuk awas kidika yulni.

²² Dawan blisinni laih ritsni kidika karak dalani wauhnin kaiwas ki.

²³ Tapadadas laih alasna duwi rispik dis lani yamwa kidika; sins duwa kidika laih sins tuhni kidika karak alasna duwi.

²⁴ Muih dutni, yamaduwa dini palni kidika witing yakat kalahwi, kaunah la kat kidika laih dukih kalawa yakat kalahwi.

²⁵ Wingbauwi bayakwak muih dutni kidika pini diswi, kaunah la kat muihni kidika laih ban sakki.

²⁶ Baskiwah laih sihwa muihni kidika ki, sihm wain sapahni muih anan yakat kapat, kidika awaskat wayau makpa yakat kāwa kapat.

²⁷ Dawan yakat rispik kalnin laih sangnika naini yamwi, kaunah muih dudutni balna kidika laih dakwi.

²⁸ La kat balna kidika laih tanitna kau kaiwa kidika alasna ki; muih dudutni balna laih, daukalna ki.

²⁹ Dawan yaklauwi nanitnadakwi yamni yayamwa balna yakat, kaunah daukalmukwi dutni yayamwa balna kidika laih.

³⁰ La kat kidika sip dutni kalwas karang, kaunah muih dutni kidika laih sau akat ban awas karang.

³¹ Sins duyang balna kungninamak kaupak sins tuhni kidika kalahwi, kaunah muih dutni kidika laih tuni dakwarang.

³² La kat muihni kidika di yamni balna kidika duwi; muih dutni laih di dutni manah.