Proverbios 1 - Papang Yulni

Proverbios praisni kidika

¹ Salomón yulni balna, Devid walanibis, Israel kingni,

² kulnin lani duwa kidika laih: sinsni tuhni kidika muih yakat yulnin dawak sumalnin bik, ilp kalawak amanglanin yul sins lani duwa balna kidika,

³ sumalwa kidika lan kalnin, dawak sins duyang atnin, la kat atnin, barangni dawak papus yakat papatni atnin;

⁴ wawahma di amanglalawas balna yakat sins dunin, sins kidika dianin dawak di tanka walwi talnin kidika bik.

⁵ Sins duwa kidika laih kulnin sirihni ki, dawak dakawi, kaput laih sins tuhni kidika baisa duwi

⁶ sins duyang balna yuyulwa kidika amanglanin kat, dawak yul balna, sampla dawak yul malni balna.

⁷ Sins tuhni kidika laih Dawan yakat rispik kalanin; tapadadas balna sins tuhni kidika dauh kukulwi, dawak sumalwa kidika bik.

Wawahma yakat yul sumalwi

⁸ Walakibis, papangma yul masumalwa kidika dakah, dawak nanangma yul masumalwa kidika ruhmwinih,

⁹ man namangyakat di yaksihni as karang: alah as kapat dawak kraun as kapat.

¹⁰ Muih dudutni balna kidika alas mayuldang atwakat, ¡walakibis, dawinih!

¹¹ Sip kat mayuyulwarang: “Yangna karak aiwah; ting yamdi malni kau laihnin dini ādarang muih dutni yamwas kidika bayakwak inin.

¹² Ahal dutni yayamwas kidika sangka daldarang sihm daunin yaklauwi dahlwa kapat sau-ū yakat kakawakat.

¹³ Ritsni balna satni bitik dudarang, ¡maūki kidika buhng dādarang, di maldi pudi!

¹⁴ Aiwa suerte dutaman kidika wayahyakta yangna karak, dawak yangna bitik lalahkina kidika man bik dutah.”

¹⁵ ¡Kaunah walakibis witingna karak kiwinih! Ta dutni kaupak nai alahwah,

¹⁶ witingna laih sirihni ahawi dutni yamnin manah; ¡muih ani utuhnin kidika sirihni yayamwi!

¹⁷ Laihnin dini malnikau ahawa kidika yamnin awasbik yayamwi uhu balna bik sipki talninna,

¹⁸ kidika ahalni balna, laihnin dini malni kau ahana yakat witingna silp bubukwarang ki, dawak sangninaka kidika yamadangni yakat ahawi.

¹⁹ Witingna manah dukih diawa balna kidika laih kaput dahn kakalwi: witingna manah dikih diawa kidika yaklauwi iwi.

Sins tuhni yaklauwi kiunin maiyulwa kidika

²⁰ Tapas balna yakat; sins tuhni kidika dinit yulwak dakakawi;

²¹ dūr balna yakat yulni balna kidika sumalwi; tawan nuhni paskau muih mahni kalududuhwa yakat:

²² “Wawahma di amanglatasmana kidika, sarahni yulyang dawak tapadadas balna, ¿di amanglawas atnin kidik dukih manawa kidika mampat datanamayah, dawak bik dukih manawa kidika yaktanamayah sarahni yultamana kidika kaupak, dawak bik di amanglanin dukih manawas kidika?

²³ Dakanauh, dutni balna barangni yamnin yultayang kidika yang spiritki manah bungdaki; yang kulnik kidika namangnakaki.

²⁴ Yang lawik manayulnayang aiwanamna, kaunah manna yang yulki dakasmana,

²⁵ Nawatnikauh laih, yul sumaltayang kidika ruhmta danamana; dukih manawaski barangni ātayang kidika.

²⁶ ¡Dutni wauhnin kidika kaiwarang kat araki! ¡Sarahni manayulki, muihsak dautanangkat yamaduta

²⁷ manna mamatna yakat yamadunin dawak pāt kidika kaiwarang kat, isning abahlnin dawak, kulnin kaidinin bik, wing purwi kaiwi di daukalwa kapat!

²⁸ “Kidika mani yawaltanama, kaunah nangmatnalatas awaki; yawaltanama kaunah yayaktas awanama;

²⁹ kat sins tuhni kidika dauh kultamana bahang, Dawan yakat risnipik kalakih manawas bahang.

³⁰ Yul sumaltayang kidika dukih manawas ki, dauh kultamana barangni ātayang kidika.

³¹ ¡Yamtamana kidika yulni laih wauhtanama! ¡Dutni yamtamana kidika laih manasuhna karang!

³² Di amanglawas kidika yaklauwi dihiwi, tapadadas balna laih kulninna abahlwa kidika dihiwi.

³³ Kaunah yadakawarang kidika, kulnin aslah sangka karang, yamadangni as bik yamaduwas karang.”