Oseas 5 - Papang Yulni

¹ “Sumalyang balna adika dakanauh; Israel tawanni, yamni dakanauh; manna namangna yakat lā kidika yamna karang, kat Mizpa yakat mana laihnin dini kidika āna ki, dawak Tabor asangni tuna yakat bik laihnin dini kidika āna ki,

² Sitim sauni langni yakat pa kurna as sakki; kidika bahang wah manaki ki.

³ Yang Efraín kidika kaltalyang; Israel kidika amangnilatas yang laih awaski. Efraín bik yal dutni karak payahna; Israel bik sani kalkahna.”

⁴ Tawan dutni yamwa yulni kidika laih sip dawak Papang yakat kiwas ki. Yal karak payahnin kidika uba minitna bayakna bahang, Papang yakat amangnilalawas ki.

⁵ Israel ayangni nuhni dai kidika, witing niningyakat yulwa sakki, Efraín witing alas dutni yamna yakat kalni pakwak bukwi, ¡dawak, witingna karak Judá bik bukna karang!

⁶ Witing sīpni balna dawak, tuniruh yayal balna karak kiwarang Papang yakat walwi, kaunah witing sip yakwas karang, kat Papang laih uman witing kaupak naikau kalahwi kiuna bahang.

⁷ Papang yakat barangni awas dai, witingna walabis duduwa kidika laih Papang ūk ki. Witingna dutni yayamna kidika yulni waiku as pasyakat witingna saunina kidika disna karang.

Israel dawak Judá karak wah duduna

⁸ ¡Gabaa yakat war kalbaunin tuniruh tamni kidika puhtanauh, dawak Ramá yakat laih trumpit kidika puhtanauh! ¡Usta sahmuhtanauh Bet-avén yakat bik! ¡Benjamín yakat laih diyamtanangkat kiri yaklalauwang!

⁹ Yang Israel sulani balna yakat isningna paktayang di kalahwarang balna kidika: Efraín laih daukalna karang wah kaiwarang mani yakat.

¹⁰ Papang yulwi: “Judá tunan muihni balna kidika, sihm muih as balna kidika kapat ki, saunina kidika kauh nuhni dakwi duduwi. ¡Kaunah kulnik daukalnin kidika witingna yakat nuhni palni kiuna karang!

¹¹ Efraín kidika tikini kaltaihna ki, witing rahmni balna bitik laih diski, kat witing dawan dauh balna yakat usnitna uiwa bahang.

¹² Yang laih witing nining yakat di banibil kaswa kapat awaki dawak Judá tawanni nining yakat laih pan banibil kapat awaki.

¹³ “Efraín sikninis kidika talwarang, dawak Judá witing muihni yakat dakna yaka bik talwarang, Efraín kidika Asiria yakat kiwi ilp yulwarang king nuhni yakat, kauna witing sip-awas karang sikninis kidika kaupak yamni kalyamna atnin, muihni kau dakna balna kidika bik sip yamni kalawas karang.

¹⁴ Layan amput di laihwa kaput, yang lawik laihna awaki Efraín dawak Judá karak; yang lawik laihtik bahna awaki, dawak usnit yakat yawana awaki, yang lawik tingni kaupak dakyakki, dawak muih as bik sip-awas karang laihwi yakna atnin.

¹⁵ “Usnit kat yang paki yakat yawaki, witingna dutnina kidika amangla dadawak, kaput bik yang akat aiwi yawawalwang dadawak. ¡Witingna kakaida kidika yulni aiwi yawawalwarang!”