Oseas 12 - Papang Yulni

¹ Efraín laih wing kidika kaswi, ma bitik yakat, ma kilwa wingni kidika usnit yakat kiwi. alas kidika baisa yulwi dawak kulnin parasni kidik baisa yamna ki, Asiria karak pramis yamwi dawak Egipto yakat disala kalawi dauh.”

² Papang yaklauwi kalbilnin kidika Israel nining yakat yakna ki Jacob tawanni yakat wah kalana karang ki dutni yamwa kidika yulni; witing amput yamwa kidika kaput laih minit launa karang ki.

³ Baisa batanh dawas kau, Jacob kidika wirahni pāni duna dai, kaput bik laih witing muihbarak kalna kat Papang karak kalbauna dai.

⁴ Insal karak kalbabauna dawak minit bayakwak kaidi ilp yulna, witing yakat minikun kaltalna atnin. Papang karak kalpapakna dai Betel yakat dawak witing karak yulbabauna dai.

⁵ Papang di bitik sip kidika: ¡Witing ayangni kidika laih Papang!

⁶ Kaput bahang Israel watta nawatta aiwah Papangma yakat; man barangni lapakta, dawak rahm kalkulta Papangma yakat.

⁷ Papang yulwi: “Canaán muihni balna kidika tingnina yakat paun duduwi, muih tataihwa paunni kidika, kat muih balna yakat dinina malkih diawa bahang.

⁸ Efraín yulwi: ‘¡Di manas duyang kalnayang, sau ritsni karak bik kalpakna yang, kauna muih as bik yang yulki yulnin sip-awaski yang minitkau latik dunayang kidika yulna, taihtik!’

⁹ Yang man Papangma yang, Egipto yakat sakman dai kidika yakaupak wattik mayamting kat ū labanni yakat āwama, mayang kauhmak wanilang kau kalpaknamayang dai kapat.

¹⁰ “Yang prapit balna yakat yulbaunayang, dawak amana talnin bik diating manas tatalna dai, dawak witingna munah yul malni balna kau yuldibaunayang dai.

¹¹ Galaad yakat dawan dauh balna kidika bangki, kidika laih dawan dauh palni ki. Gilgal yakat turuh almuk kau sakripais yayamwi, sakripais bubuswa pāni kidika laih kipala mahni uduhna, asangpas kau kapat.”

¹² Jacob laih Aram sauni yakat kirana dai, dawak yakat witing yal as duna atnin yulni wark kalahna, sīp maintalwa dai.

¹³ Prapit as munah, Papang yaklauwi yakna dai Israel tawanni kidika; ¡dawak prapit as munah mainditalna dai!

¹⁴ Efraín muihni balna yaklauwi yayamwak Papang kulnin daukalna dawak tapalhni bik dakana. Kidika bahang Papang yaklauwi yamwak dutni yayamna kidika minit lalauwarang ki, dawak yamwak witingna minitna yakat bukna karangki dutni kidika.