Oseas 11 - Papang Yulni

Papang tawanni kulnin dutni yakat dalani talwi

¹ “Israel tawanni kidika muih bin dai mani balna yakat, yang dalani talayang dai witing kidika yang walakibis bahang Egipto kaupak kalyulnayang kaina atnin.

² Witing kainin kidika wat wat kalyulting kat nawatkauh yang kaupak naikau kalahkiwa dai. Yang tawanki kidika dawan dauh balna yakat sakripais buswa dai, dawak busnin walapni bik buswa dai dawan dauh balna yakat.

³ Kidika balna bitik kau, Efraín tawanni kidika yang lawik tatuna dunayang, dawak niningkanayang lapakna atnin; kauna witingna amanglalawas dai yang lawik mainditalayang dai kidika.

⁴ Kulnin yudutni kau, dawak dalani lani kau, yang akat duainayang; yang muhki yakat libitnik manah sihm muih bin batahnbin tasuwa kapat; niningna yakat abuktik di bayahnayang,

⁵ kauna witingna yang akat ainin kukulwas dadana. Kidika bahang watwi Egipto yakat uinin ki, dawak Asiria kidika witingna minitna yakat king kana karang.

⁶ Isparah kidika witingna tawannina nuhni yakat kiwi bukna karang dawak ūnina pararasni balna papakna dai kidika daukalna karang, bahwi dis yamna karang, witingna warknina yamnin duduwa kidika yulni.

⁷ Yang tawanki kidika ban yang kaupak naikau atnin kidika kukulwi, ma yakat kilwi sararahwi kauna muih as bik tingninasut lalaihwas ki.

⁸ “¿Amput madapamkiyah Efraín? ¿Amput marumhtik daki yah Israel? ¿Madaukalpamnik sip awaki yah, Adma tawanni kau daukalnayang kapat, kidika awaskat, man kidika mayamna atnik Zeboim kau kalyamna yang kapat? ¡Yang ising kidika bitik laih kalitikna ki minikun talnin manah buhngki man namang yakat!

⁹ Yang kulnik daukalna kidika kaput laih yamtas awaki: wattik Efraín kidika daukaltas awaki, kat yang laih Papang yang, muih awas yang bahang. Yang laih holi yang, manna pasmangna yakat yang, manadaukalnik aiwasyang.”

¹⁰ Witingna papang yakat usnit uhuiwarang, dawak witing kidika ihna karang layan kapat. Ihna karang dawak witing dini balna kidika, ma kawa kaupak diyukwin aiwarang.

¹¹ “Uhbinina kapat diyukwīnah aiwarang Egipto kaupak, Asiria kaupak aiwarang buhtuku kapat, dawak wattik diyamtingkat ūnina yakat yalalahna karang. Yang Papangyang kat yultayang.

Papang tawanni dutni yamna kidika

¹² “Efraín laih alas manah yayulna, Israel tawanni bik alas manah yayulna. Judá kidika Papang kaupak naikau kalahwi kiuna, dawak waralaih, dawan dauh balna yakat rahm kulwi.