Números 5 - Papang Yulni

Pakna, maisihni balna kidika yakmukna atnin

¹ Dawan yaklau Moses yakat aput kalyulna:

² “Israel balna yakat paktangkat, muih pilau duduwa kidika, al muihni wasni kira kidika dawak muih dauna laihwak muihni yakat dutni ditilahna balna kidika bitik naikau yakmumukwang.

³ Al karangpa, yal karang pa, muih paskaupak naikau yayakna karang. Kaput laih maisihni yayamwas karang ū labanni, witingna pasningna yakat yalahtayang kidika.”

⁴ Dawan yaklau Moses yakat ais yamnin kalyulna kidika yakat dakawi yayamna dai Israel balna laih, kaput laih maisihni muihni balna kidika bitik yakmumukna dai muih balna paskaupak.

Daukalwa dawak diswa minityakat lā kidika

⁵ Dawan yaklau Moses yakat kiwi aput kalyulna:

⁶ “Israel balna yakat aput diyultah: Muih al as kidik awaskat yal as, Dawan niningyakat barangni awas karang kat, dawak muih ūk yakat dutni kalyamwi dutni as yamwarang kat,

⁷ lāih yulna karang. Kidika minityakat, angdika muihni yakat dutni kalyamna kat, minit lauwi kalwarang ki, ampus dutni kalyamna dai kaput, sahyakma singka kaupak as praisni.

⁸ Dutni kalyamna muihni kidika dauna karang dawak wanaihni as dis karang kat, minit kidika laih Dawan dini karangki dawak sumalyang bik yakaupak ilp duna karang, dawak kidika minityakat sumalyang yaklau, sīp almuk as sakripais yamna karang, dutni kidika disna atnin yulni.

⁹ “Minitdis kalanin dini, Israel balna duwi aiwarang kidika, Dawan yakat, sumalyang yakat duwi uiwarang, dawak witing duwarang.

¹⁰ Di bitik Dawan yakat duwi uiwarang kidika, sumalyang yakat duwi uina karang, dawak witing duna karang.”

Minit annin lāni

¹¹ Dawan yaklau Moses yakat aput kalyulna:

¹² “Israel balna yakat aput diyultah: Muih yal as alni yakat barangni awas karang kat,

¹³ dawak muih al ūk karak payayahwa karang kat, witing alni dakawas kat, dawak witing adika dutni yamwa kidika muih as bik amanglawas kat, kidika yakat diswarang ki, muih yal yakat kallaihwasdai bahang.

¹⁴ Witing alni kidika sipki witing yalni yakat minit annin. Kaunah aput bik sipki kalahna atnin, alni kidika sipki yalni yakat minit annin, yal kidika di as dutni yamwas bik.

¹⁵ Kidika kaput kalahwarang kat, al yaklau yalni yakat laihwi duwi kiwarang sumalyang muhni yakat, dawak yal kidika yulni minitdis kalanin dini plawar, cebada paun bu kalawarang. Kaunah disala wasni dawak walapni busnin dini bik utuhwas karang plawar minityakat, kat kidika laih minitdis kalanin dini minit annin yulni bahang, dawak bik kidika laih minitdis kalanin dini dutni yamna kidika lāih yaknin dini bahang.

¹⁶ “Sumalyang yaklau yal kidika yakat kalyulwak yaihnit yakat kiwak, Dawan muhni yakat niningkawarang.

¹⁷ Kidika usnitkat, sau sunitak as kau was holi kidika kaupak apis duwi holi pāni kau sau yahamni kidika duwi was yakarak banawarang.

¹⁸ Yal yakat kalyulwak Dawan muhni yakat yaklauwak basni kidika uluhwarang dawak tingni balna yakat minit atnin yulni minitdis kalanin dini muih dutni kaupak lāih yaknin dini kidika lakwarang; witing niningkauh laih, la tuhna wasni tapahlni kidika tingni yakat duwarang.

¹⁹ Yal yakat kalyulwarang Dawan ayangni usnit kat rahm kidika yulna atnin, bahang aput kalyulwarang: ‘Muih al ūk karak kalpaktasman kat, alma yakat dutni kalyamtasman kat, adika wasni tapahlni adika ditang dutni as bik mayamwas karang.

²⁰ Kaunah alma dangnit yakat dutni kalyamta, ahal ūk karak kalpaknaman karang kat,

²¹ Dawan yaklauwi muih muhnina yakat la tuhna muihni as mayakna karang, muih matalna atnin yulni, dawak bama kidika banghna karang, dawak bamasar bik mabukahna karang.

²² Adika wahni man yakat kaina karang la tuhna wasni adika dima kat.’ Yal kidika yaklau nangnitlana karang; ‘Kaput karang.’

²³ “Sumalyang yaklau, adika dutni palni kidika wauhtaya kau ulwi dawi, wasni tapahlni kau uswi yakpamwarang.

²⁴ Kidika usnitkat yal yakat kalawak diwarang wasni tapahlni kidika, kaput laih, witing muihni paskidika bitik tapahlni manah kalwarang,

²⁵ dawak yal tingni kaupak minitdis kalanin dini kidika duna karang, Dawan muhni yakat dukiuna atnin, kaput laih minitdis kalanin dini kidika, sakripais busnin pāni minit yakat lakwarang,

²⁶ kidika usnitkat, minitdis kalanin dini, plawar satni balna minik dukiuna kidika sakripais busnin pāni yakat busna karang, watwi wanaihni karak yamni kalahna atnin yulni. “Sumalyang nuhni yaklau, yal yakat wasni tapahlni kidika kalawak diwak usnitkat,

²⁷ witing alni dangnit yakat dutni yamwa dai kat, wasni tapahlni yaklauwi kalyamwakat, witing muihni pasyakat bitik tapahlni manah kalwarang, dawak bani bik bangwarang, kaput laih walanibis kidika dauwarang, bahang kidika yalni yakat muih bitik tatalna karang, kaput dutni yamninna awas yulni.

²⁸ Kaunah kidika yalni dutni yamwasdai karang kat, witing muihni yakat dutni as bik kallaihwas karang, dawak walanibis bik yamni duna karang.

²⁹ “Adika lani laih, yal as alni kau barangni awas kat, alni yaklauwi minit anwarang kat, kaput lani yamnin karangki,

³⁰ kidika awas bik kidika alni yaklau dauhmanah minit anwarang kat yalni yulni. Al kidika yaklau yalni kidika Dawan muhni yakat dukiwa kat, sumalyang yaklau la amput yulwa kaput yamna karang.

³¹ Alni yakat laih dutni as bik kalkulwas karangki, kaunah yal kidika alas wah duna karang.”