Números 32 - Papang Yulni

Rubén dawi Gad sulani balna kidika Jordán makilwa niningyakat panina duduwi

¹ Rubén dawi Gad sulani balna kidika, tinglau mahni duduwadai. Witingna tatalwak Jazer dawi Galaad balna saunina kidika tinglau sahnin yamnin kat,

² uiwi ditatalna Moses, sumalyang Eleazar, dawak Israel balna tanina tuna balna yakat bik, dawakat aput diyuyulna:

³ —Talnauh: Atarot, Dibón, Jazer, Nimra, Hesbón, Eleale, Sebam, Nebo, dawak Beón sauni kidika,

⁴ Dawan yaklauwi kalana Israel balna dinina kidika sauni laih tinglau sahnin sauni, bahang yangna dutayangna kidika laih tinglau.

⁵ Man yamnin talaman kat adika sauni yanatah, kaput laih Jordán wasni kidika daklawas awanaki.

⁶ Kaunah Moses yaklauwi nangnitnalana: —¿Manna akat watnin kultamanah, wanaihmana balna laih kalbaunin uiwakat?

⁷ ¿Ais yamta Israel kidika kulnin sauyak laknin kultamanah, Dawan sau kalana yakat dakyaklawi dunin awas?

⁸ Manna muihmana bararak balna sihm yamna dai, Cades-barnea kaupak sihting uiwi kidika sauni awaihwi talnin.

⁹ Escol wasni yakat uiwi kidika sauni awaihwi tatalna usnit akat, Israel balna kulninna sau kau lalakna dai, Dawan sau diana yakat uiwi dunin awas yulni.

¹⁰ Kidika bahang Dawan kulnin daukalwi kidika mani aput yulna

¹¹ Egipto kaupak muih balna kalalahna dai kidika, kurih muih duwa minitkau balna kidika laih, Abraham, Isaac, Jacob balna yakat sau di ānin yulni sauni yakat kakawas karang ki, Papang lani kat yayamwasdai bahang.

¹² Jefone walanibis Caleb cenezeo muihni, dawakat, Nun walanibis Josué kidika balna manah laih, Dawan lani kat yayamna dai.

¹³ Dawan Israel balna niningna yakat kulnin daukalwi, kauhmak wanilang pasyakat diawak lapapakna kurih muihasluih bu, warknina dutni yayamna dai kidika as bik sangka awas dai.

¹⁴ Waradika manna, muihmana bararak dutni yayamna walanbis balna, muihmana bararak yayamna kaput usnit uitamana, kidika yamtanang kat watwi Dawan kulnin daukalwarang Israel niningyakat.

¹⁵ Manna Dawan usnit uinin kultasmana kat baisa Israel balna kidika, kauhmak wanilang yakat wawatwarang, Israel balna didiswarang kidika manna pātmana karang.

¹⁶ Moses yaihnit yakat uiwi aput kalyuyulna: —Yangna yamnikna kultayangna kidika laih, sīpkina, tukinaruh yayal balna kidika panina daklanikna, dawakat tawan as yamnikna sulakina balna dinina.

¹⁷ Kidika usnit kat sirihni kalbaunin dini balna kidika dutik, Israel tanina tuna yakat yawanaki, witingna panina kat, kaput laih saukina balna kidika tawan yakat wawatna karang, yamadangni kaupak naikau karang, kidika sauni muihni balna uhuswaskarang.

¹⁸ Israel balna bitik saunina yakat kawi duduwas kat, mayang sip maūki yakat nawatdi mawaskarang.

¹⁹ Mayang masauki karang kidika laih nakas akauh ki, Jordán wasni makilwa niningkauh, Jordán wasni nakas yakauh kidika yakat sau yuldaskarang.

²⁰ Dawak Moses yaklau nangnitlana: —Yulni balna kidika kat daka yamtanama kat dawak kalbaunin dini balna kidika bik duta Dawan yaklau kalbaunin yulwakat kalbautanama kat,

²¹ dawak manna bitik kalbaunin dini duta Jordán wasni kidika daklawanama kat Dawan yaklau yamnin yulwa kaput, dawak yakat wattanama angkat Dawan waihmanala balna kidika bahang yakmukwarang kat

²² dawak pāni kidika kalbauta dakyakta dutanama kat, kaput dawak nawatta awanama, kaput laihta kat, Dawan niningkauh dawak Israel niningkau pri awanama yamnamna kidika dai kaupak. Dawan yaklauwi manawi adika sauni manna dimana.

²³ Kaunah kaput yamtas awanama kat, dakanauh, Dawan niningkau dutni yamna mana karang, dawak, dutni yamtamana kidika ma as minit manawarang.

²⁴ Tawan yamtanauh, wanaihmana balna dinina, dawak tingmanalau pāni bik daklatanauh, kaunah yulmana yakat yamtanauh.

²⁵ Gad dawi Rubén sulani balna karak nangnitna lalana: —Adika man dini yamyang balna, man yulnaman yakat yayamwarang.

²⁶ Yalkina balna, walabis bik dibinina dawak tingkinalau balna bitik, Galaad sauni akat wawatwarang,

²⁷ dawak yangna man dima yamyang balna yangna adika kalbauna yawanaki, Dawan lani dinit kat, man yana sihtaman kaput.

²⁸ Kaput dawak sumalyang Eleazar yakat kalyulna adika yulni, Josué dawakat, sulani tatuna muhni balna yakat:

²⁹ —Gad sulani balna ahal bitik, dawak Rubén sulani balna bik kalpakwi Jordán wasni yakat dakyaklawarang kalbauna atnin, Dawan lani dinit yakat, angkat pāni kidika kalbauwi dakyayakwarang kat, kaput laih Galaad sauni kidika diatanama, witingna saunina atnin.

³⁰ Kaunah kalbaunin dini dis dakyaklawarang kat, Canaán sauni pis apis diana karang.

³¹ Gad dawak Rubén sulani balna nangnitlalana: —Man dima yamyang balna adika Dawan yulna yakat yayamna karang.

³² Canaán sauni yakat mawarang kalbaunin dini bitik Dawan yulni kat dakadi, kaunah Jordán kaupak ma kilwa nining yakauh wattik yangna pakina dutanaki.

³³ Kaput dawak, Gad dawi Rubén sulani balna, dawakat Manasés sulani balna papus wayah, kidika balna yakat Moses yaklauwi Sehón amorreo kingni sauni, dawak Basán kingni Og, kidika balna saunina dawakat tawannina nunuhni balna dai kidika bik diana.

³⁴ Gad sulani balna yaklauwi Dibón, Atarot dawak Aroer,

³⁵ Atarot-Sofán, Jazer, Jogbeha,

³⁶ Bet-nimra dawak Bet-arán, adika tawanni balna bitik watwi dulauwi yayamna dawakat tinglau pāni daklana balna dai kidika bitik watwi yayamna.

³⁷ Rubén sulani balna yaklauwi, Hesbón, Eleale, Quiriataim,

³⁸ Nebo, Baal-meón, dawak Sibma, buas laih watwi yayamna yakat adika ayangni balna ūk ūk papakna.

³⁹ Maquir sulani balna, Manasés walanibis, Galaad sauni kidika kalbauwi amorreo muihni balna yakat yalalahwa dai kidika kangwi yakmumukna.

⁴⁰ Kaput dawak Moses yaklauwi Maquir sulani balna kidika Galaad sauni dai yakat diana.

⁴¹ Manasés sulani, Jair, yaklauwi amorreo balna panina dakyakwi duna dawi kidika pāni ayangni ūk pakna Havot-Jair.

⁴² Noba muihni kaluduhna balna dai kidika laih Kenat kidika kawi duduna dai, dawak tawan balna kidika kaupak ilp duduwa dai kidika bik, dawak witing yaklauwi ayangni ūk pakna, Noba.