Números 30 - Papang Yulni

Amput pramis yamnin kidika

¹ Moses yaklauwi Israel balna tatuna muihni balna yakat aput diyulna: “Dawan aput yamnin yulna

² muih as pramis yamwarang kat, kidika awaskat Papang ayangni kau yakwi yulwarang kat yamna atnin, bahang yulna kaput laih bitik yamna karang ki.

³ “Muih yal sirau as, papangni tingni yakat kidika Dawan yakat pramis as yamwarang,

⁴ bahang papangni amanglawi di as bik kalyulwas karang walanbis yal yakat, sirau pramis yamna kidika yakat yamna atnin karangki.

⁵ Kaunah papangni amanglawi, sirau pramis yamna kidika niningkau karang kat, pramis kidika parasni dis kalwi, bahang sirau kidika pranimis kat yamwas atnin sipki. Sirau pramis yamna kidika papangni kulnin lani awas bahang, Dawan bik pakwas karang ki sirau yakat pramis kidika yamna atnin.

⁶ “Yal as yaklauwi, Dawan yakat pramis as yamna karang, bahang kidika pranimis witing sirihni kulnin yakat kulwi yamna karang kat, dawakat usnit kat al duwarang,

⁷ bahang al kidika yal pramis yamna niningkauh yulwas karang kat, yal pramis yamnin yulna kidika kaput yamna atnin karang ki.

⁸ Kaunah al kidika dakawi, yal pramis yamna kidika niningkau karang kat, sipki yal kidika pranimis kat yamwas atnin, Dawan bik yaklauwi pakwas karangki yamna atnin.

⁹ “Yal pramis yamwa kidika, tingmak karang, kidika awaskat alni karak kaldadana muihni karang kat, pramis bitik yamwa kidika, yakat yamna karangki.

¹⁰ “Yal as al duwa muihni kat, witing pramis as yamwarang Papang ayangni kau, kaunah yal kidika alni ūni yakat sakkarang kat,

¹¹ bahang alni amanglawi, di as bik yulwas karang kat, yal pranimis yamna karang yulna yakat.

¹² Yal pramis yamwa kidika, alni yaklauwi, yamtah kaltarang ki, dawak bik yamwinih kaltarang ki, yuldarang kat alni ais yulwarang yakat yamwarang ki. Dawan bik yaklauwi pakwas karang ki pramis yamnin yulna kidika yakat yamna atnin.

¹³ “Alni kidika yaklauwi, yal pramis yamwa kidika, yamtah kaltarang kat yamwarang ki, kidika awas kat yamwinih kaltarang bik yamwas karangki, dawakat pakwak di kaswas yuh wauhwarang ki.

¹⁴ Al yaklauwi, yalni pramis yamna balna kidika niningkau di as yulwas, kaput ma balna bayakwi kiwarang kat tanka laih witing yalni pramis yamna balna kidika yamni kulwi.

¹⁵ Kaunah dakana bik likkauna nai dawakat, dikah kaltarang kat, yal pramis yamna kidika yamwas dawarang kat, al minit yakat manah bayakwarangki.”

¹⁶ Adika lani balna Dawan yaklauwi Moses yakat kalana dai, al yalni karak amput atnin kidika, dawakat, papangni walanibis yal karak bik amput atnin kidika, walanibis kidika sirau witing tingni dinit yakat likkidika satni kat.