Números 28 - Papang Yulni

Minit dis dini kalanin ma bitik yakat

¹ Dawan yaklauwi Moses yakat kiwi aput kalyulna:

² “Israel balna yakat paktang, minit dis kalanin dini kidika yayawang, danin awaski, plawar busna dawakat, minit dis kalanin dini busna kidika alasna mani balna pasyakat, kidika laih walapni yamni as karang yang niking yakat.

³ “Adika bik diyulta, yang ayangki yakat nuhni kalwi minit dis kalanin dini bubuswarang kidika laih adika ki: ma bani bubusna karang, sīp kurih as laihna kidika, dawakat bik dutni awas yamni kat, bu bubusna karang.

⁴ Mapiris yakat as bubusna karang, dawakat masan nining yakat ūk bubusna karang.

⁵ Minit dis kalanin dini di minit balna kau kidika laih, plawar tanit yamni kidika paun bu karang, dawakat olib salani batal as karak banawi laihna karang.

⁶ (Adika sakripais busnin, dawas ban bubuswadai Sinaí asangni yakat, minitdis kalanin dini walapni as Dawan nining yakat.)

⁷ Minit dis kalanin dini, wain kidika laih, sīp as yakat wain batal as kalawarang ki. Adika wainni holi pāni yakat utuhna karang; Dawan risnipik kau.

⁸ Sīp bu kidika laih sakripais busnin pāni yakat maulah sakripais yamna karang, dawak plawar minik minit dis kalanin dini, minit dis kalanin dini wain kalana karang mapiris ampus kalawa kat sihm kaput. Minit dis kalanin dini walapni as ki, Dawan ayangni kau buswa kidika.

Yakurupdinin mani yakat walapni balna busnin

⁹ “Yakurupdinin mani balna yakat manna walapni busnin duaitanama, sīp bu, kuruh as lalaihna balna kidika wayakani awas kat, dawakat plawar tanit yamni kidika kilo arungka, disala karak banawi laihna karang, kidika laih minit dis kalanin dini, di minik balna kidika karang, dawakat minit yakat wainni bik kalana karang.

¹⁰ Adika satni sakripais laih, yakurupdinin mani balna yakat busna karang, wainni karak libit dawi, dawakat ma bitik yakat bubuswa kidika minit yakat kaput bubusna karang.

Waiku bitik yakat minit dis kalanin balna

¹¹ “Waiku bitik yakat, ma tatuna kidika, yakat, Dawan yakat sakripais kalalana karang, turuh wawahma bu, kuts almuk as, dawakat sīp tiaskaubu, kurih as lalaihna balna wayakani as bik dis kat.

¹² Turuh almuk as yakat, plawar tanit yamnin kidika kilo tiaskauas disala karak banawi laihna karang, dawakat kuts almuk as kidika laih plawar tanit yamni kidika, kilo arungka yakwi disala karak banawi laihna karang,

¹³ dawakat, sīp as kidika laih libitna karang, plawar kilo bu disala karak banawi laihna karang. Sakripais as walapni yamni busna karang, Dawan ayangni nuhni usnit yakat.

¹⁴ Minit dis kalanin dini wain kidika laih, turuh wahma as yakat, batal bu libitna karang, dawakat kuts almuk as yakat libitna karang, wain batal as minit kau papusbah, dawakat, sīp as kidika laih wain batal as libitna karang. Adika walapni busnin laih waiku bayakwa bitik yakat busna karang, ma tatuna kidika yakat.

¹⁵ Ma bitik yakat sakripais bubuswa kidika minityakat, Dawan yakat kuts almuk as sakripais yamnin ki dutni dawak disnin yulni, minit dis kalanin dini wain kauna.

Alasna mani yakat minit dis kalanin balna

¹⁶ “Kurih pasyakat, waiku tatuna kidika ma salap minitkau arungka yakat, alasna yayamna karang, Egipto kaupak laihwi yakna yulni, Dawan ayangni nuhni usnit yakat,

¹⁷ dawakat ma salap minitkau singka yakat bik alasna ūk karang. Ma tiaskaubu plawar busna kakaswarang, pupuhnin dini dis busna kidika.

¹⁸ Tatuna ma tiaskaubu, kidika laih, kaluduhnin maisihni dis as yayamna karang. Kidika mani, manna wark as bik yamtas awanama.

¹⁹ Sakripais karauni kauna buswa kidika yamtanama turuh almuk bu duta, kidika laih Dawan risnipik kau, dawak kuts almuk as dawak sīp tiaskaubu, kurih as lalaihna kidika, kaunah sakahwa atnin awaski.

²⁰ Adika sakripais yayamwarang kidika, plawar disala karak banawi laihna kidika, ahana karangki, bahang aput yayamna karang: turuh wahma as kidika plawar kilo tiaskauas libitna karang dawakat sīp almuk as kidika laih plawar kilo arungka libitna karang,

²¹ dawakat sīp as kidika plawar kilo bu karak libitna karang.

²² Kuts as sakripais yamtanama dutmana dawak disna atnin yulni.

²³ Adika sakripais bitik yamna karang, mapiris sakripais bubuswa kidika minityak ūk.

²⁴ Kaput yayamna karang, ma tiaskaubu alasna duduwarang pasyakat kidika laih walapni yamni as busna karang, Dawan ayangni usnit yakat. Adika sakripais wain bitik bahana karang, ma bitik yakat sakripais bubuswa kidika minit yakat karang adika sakripais.

²⁵ Ma tiaskaubu yakat kaluduhna holi as yayamna karang. Kidika mani wark as bik yayamwas karang.

Di minik tatuna kalahwa balna kidika minit dis kalanin dini yaknin

²⁶ “Di minik tatuna kalahwa balna alasnina, plawar satni balna minik wisamni kalahwakat Dawan yakat kalalawa kidika, yuldarang kat, sandi walsah balna yakat alasnina mani, kidika yakat kaluduhnin holi as yayamna karang.

²⁷ Walapni yamni as buswi kalalana karang Dawan yakat, turuh wawahma bu, sīp almuk as dawakat sīp tiaskaubu kurih as lalaihna balna kidika.

²⁸ Minit kalanin dini plawar kidika disala karak banawi laihna karang, bahang turuh almuk as yakat, plawar kilo tiaskauas libitna karang, sīp almuk, minityak plawar kilo arungka lakna karang

²⁹ dawakat sīp as kidika minit yakat plawar kilo bu lakna karang.

³⁰ Kuts as bik sakripais bubusna karang dutnina dawak disnin yulni.

³¹ Adika sakripais, di minik balna dawakat wain bik duahaina karang, sakripais ma bitik bubuswa minityak ūk. Tinglau balna kidika sakahwa as bik dis karang.