Números 27 - Papang Yulni

Walaninabis yayal balna dinina

¹ Manasés sulani pasyakat, wirahnina yayal singka dai ayangnina laih Maala, Noa, Hogla, Milca, dawak Tirsa. Zelofehad walanibis yayal balna dai, Hefer, Galaad, Maquir, Manasés dawakat José witingna sulani palni dai.

² Yayal singka adika uina dai, kalpaknin ūni labanni yakat, Moses dawi sumalyang Eleazar, dawakat tunan muihni ūk balna yakarak bik yulbauna atnin, bahang aput yuyulwa dai:

³ “Yang papangkina dauna, kauhmak wanilang yakat, Coré muih uduhwi Dawan niningkau yaklauna pasyakat kawas dai. Witing dauna kidika laih alas dutni yamna kidika yulni dauna, walanibis al asbik yakwasdai.

⁴ Yamni awas karang papangkina ayangni kidika disna atnin sulani balna pasyakat, walanibis al as bik yakwas dana kidika manah yulni. Sau apis yanatah, papangkina wirahni ahal balna kidika pasmunah.”

⁵ Moses yaklauwi Dawan yakat kalyulwa dai, yayal balna yuyuwa kidika yulni,

⁶ dawakat Dawan yaklauwi biri nangnitlana:

⁷ “Zelofehad walanbis yayal balna kidika rahm yuyulwi. Sau apis diatah, papangnina wirahni ahal balna pasmunah, dawakat kaput laih papangnina dini balna dai kidika witingna duduna karang.

⁸ Israel balna yakat diyultah, muih as, walanibis al as bik yakwas dauwarang kat, dini balna kidika walanbis yayal balna duduna karang;

⁹ dawakat walanbis yal as bik diskarang kat, dini balna kidika wirahni ahal balna yakat diana karang;

¹⁰ dawakat wirahni ahal bik diskarang kat, dini balna kidika papangni wirahni ahal balna yakat diana karang.

¹¹ Papang bik wirahni ahal dis dai kat, dini balna kidika wanaihni balna yakat diana karang. Adika laih Israel pasyakat lā as karang, yang lawik amput atikda kaput.”

Josué kidika yakna dai Moses pāni yakat

¹² Dawan yaklauwi Moses yakat kalyulna: —Abarim asangni yakat ilwah, dawakat talah, Israel yakat sau kalanayang kidika.

¹³ Talna usnit kat dauma, dawakat yawa kalpakma, tatuna dadauna muihni balna karak, yuldarang kat wirahma Aarón kapat,

¹⁴ kat manna bu mana kidika yang yulki dakas danamana dai, Zin kauhnimak wanilang yakat, Israel balna yang niking yakat diyuyulwak, dawakat yang riskipik yatas danamana witingna was yuyulwa kat. (Adika yulwa kidika laih, Zin kauhnimak wanilang Cades kau, Meriba wasni dai kidika.)

¹⁵ Moses yaklauwi Dawan yakat kalyulna dai:

^16-17 —Dawan dawak Papang, man lawa muih bitik yakat sangninaka diataman kidika, tunan muihni as yaktah, man tawanma kidika tanituna kana atnin, dawakat tatuna kawi dukiuna karang pa bitik yakat, kaput laih sīp daniwan dis kat pāni bang kapat awas karang.

¹⁸ Dawan yaklau Moses yakat nangnitlana: —Josué, Nun walanibis, witing laih al as spirit duwi. Bahang, witing tunani minit yakat, tingma yuma.

¹⁹ Usnit dawakat, sumalyang Eleazar, dawakat tawan bitik nuhni yakat duyawama, dawakat witing yamnin balna kidika kalama, muih balna bitik muhnina yakat;

²⁰ parasma dutaman kidika witing yakat apis kalama, kaput laih Israel balna bitik, witing yulni dakakana karang.

²¹ Kaunah Josué witing sumalyang Eleazar yakat kiuna karang, dawakat Eleazar witing ayangni kau yayulwi dakana karang Urim munah. Josué yaklauwi, Israel balna yakat pakna karang, ais yamnin kidika, dawakat di bitik yayamwarang kidika.

²² Moses yamwadai, Dawan ais yulna kaput. Josué kidika dukiwadai, sumalyang Eleazar, dawakat tawan bitik muhnina yakat.

²³ Tunan minityakat tingni lakwi dawi ais yamnin balna kidika tingni yakat āwi dana dai, Dawan yaklau yamnin kalyulna dai Moses munah.