Números 24 - Papang Yulni

¹ Balaam amanglawadai Dawan witing Israel yakat bliskalyamnin kulwa kidika, dawakat watwi kiwi prapit yulni kidika tahawasdai dakanin, muhnilau yamna dai kaput, nawatkauh laih kauhmak wanilang yakat muhwi talna.

² Balaam, Israel balna yakat talna minitni yakat, Papang piritni witing muihni yakat kallaihna;

³ dawakat Balaam adika yulni balna yulwa dai: “Balaam yulni balna, Beor walanbis, muih al as di paskau talwi āwa kidika,

⁴ witing muihni kidika spirit yaklauwi satuk kalyampamwak kau lāih talna, yul balna kidika kalyulwak dakawi, dawakat, minikpa yakat bik talwi amana kapat, Papang parasni nuhni duwa kidika yaklauwi niningkawak.

⁵ ¡Jacob, ūma lababanni kidika ampat yayamnin yah! ¡Amput yaksihni yah, Israel, ūma lababanni kidika!

⁶ Kuku satni balna lain kau dahna kapatki, waskung yakat dipulu pa nuhni dahna kapatki, Dawan yaklauwi dahna, ¡suhun waskung yakat dahna!

⁷ Israel laih was manas dunakarang, dina atnin, dawakat bik, di dahna balna kidika utuhna atnin bik. Agag kidika, witing kingni tingni dinit yakat karang parasni kidika nuhni palni duwarang.

⁸ Papang yaklauwi, Egipto kaupak diyakna kidika, witingna palni Papangnina, sihm turuh almuk tamni kidika, witing tamni, turuh ūk tamni awas ki sihm kapat ki, Papang dawi Israel balna karak. Israel yaklauwi waihnila yakat ina karang; wakalni balna bik bahna karang; dawakat sinibang kau pāni karang.

⁹ Kalangwi yakurupwa kidika laih, sihm layan kapatki: muih as bik uswi sahmuhnin sip awaski. ¡Yang mayulna kidika yamni awama dawak dutni mayulna kidika dutni awama!”

Balaam prapit yulni yulna

¹⁰ Adika yulni dakawi, Balac, Balaam king yak parasni anna, dawak tingni tiswi kalyulna: —Yang mayulting kat aiwanaman, waihkila balna yakat dutni diyulnam, dawak warakat wat bas yamni di yultaman.

¹¹ ¡Kau yamni ki mahka uma kau yawama kat! Yana ayangma nuhni yamnik mayulnayang dai, kaunah Dawan yaklauwi taki putna.

¹² Dawak Balaam biri nangnitlana: —Yul sihnaman muihni balna karak uman diyulnayang dai,

¹³ gol dawi lalah, uma nuhni pas kau buhng dutaman kidika bitik yama bik, Dawan yulni dakasdatik, yang alas kulnik kau dutik dutni dawak yamni bik yamta awaki, kaunah nawatkauh Dawan yulnin yapakna kidika manah yulki ki.

¹⁴ Bahang yamniki wattik sauki paki kau mahka yawayang, kaunah baisa yawasyang kau mayultayang, adika muihni balna yayamwarang kidika tawanma yakat.

¹⁵ Kaput Balaam adika yulni yulna: “Beor walanibis, Balaam yulni balna, minikpa talwa kidika dadasni alni ki,

¹⁶ witing muihni kidika spirit yaklau kalyamwakat baisa laih talwi, Papang amanglawa dini kidika bik amanglawa kidika, yul balna dakawa kidika dawak sahmuhni amana kapat bik talwa kidika Papang parasni bitik duwa kidika kaupak.

¹⁷ Nai mani kaiwak di as kalahwarang kidika, naikau talayang: kidika kuduh Jacob kaupak yalani as kalahna, Israel pāni kaupak king as yaklauwi. Moab tunan kidika atakwarang ki, sihm kaput Set sulani balna bik.

¹⁸ Edom sauni pāni kidika laihwi duwarang, waihnila pāni Seir bik, sihm laihwi duwarang. Israel muihni balna parasni kalbabauwarang.

¹⁹ Minit bayaknin alni kidika Jacob sulani kaupak kalahwarang, dawak tawan yak wawatna balna bitik daukalna karang.”

²⁰ Usnit kat Balaam kidika Amalec yak talwi, adika yulni yulna: “Amalec kidika tawan tanit nuhni kalkulna, kaunah kaldaukalna karang.”

^21-22 Sihm quenita balna yak bik talwi dawak adika yulni yulna: “Caín sulani balna: maldanamna pāni kidika daukalwas kapat karang bik, dawak kipala walsah yak yamna mana karang bik, kidika pāni kuh kau buswi daukalwarang Asiria manabalakwi manadukiwarang mani kat.”

²³ Usnit kat adika yulni yulna: “¡Alakaih! ¿Wais kidika sangka karangyah, Papang aput yamwarang manikat?

²⁴ Chipre kumani kung munah kalbaunin kuringni kidika kaiwi, dawak Asiria, Heber daukalpamwarang ki, kat Heber kaldaukalwarang.”

²⁵ Kidika usnit Balaam mahka ūnikau kiuna dawak Balac bik tani walna dai.