Números 19 - Papang Yulni

Maisihnidis kalahnin kidik amput yamnin kidika

¹ Dawan yaklauwi Moses dawi Aarón, witingna yakat kiwi aput diyulna:

² “Yang, Dawan yang adika lawik adika lani ātayang: Israel balna yakat diyultang turuh yal butuni papauni kat duahaiwang, kaunah sakahwa awaskat dawakat watas bik tamni yakat pan sisitwas kat.

³ Manna duyawa sumalyang Eleazar tingni yakat kalatanama, dawakat, tawan paskaupak naikau yakwi muih yakat pakwak Eleazar yaklauwi, tingni talwa sakkat.

⁴ Sumalyang Eleazar yaklauwi, tingni kau āni kidika laihwi, wat tiaskaubu raswi lawarang, kalpaknin ūni kidika.

⁵ Usnit kat tuniruh yal kidika bubuswarang witing talwa sakkat, busna karang, unitak, muihni, āni dawak bāni bitik.

⁶ Usnit kat sumalyang yaklauwi, suhun panani as duwi, pan walapni kidika tingni as kahlyakwi dawi asna pauni as duwi, di muihni buswarang pasyakat ruhm'āwarang;

⁷ usnit kat asnina dawi muihni bitik suhnakarang was kau, kaput laih sip karang muih balna pasyakat kanin, kaunah witing ban laih muihni kidika dutni kalkulna karang ki masan kat.

⁸ Turuh yal ina alni kidika bik, asnina suhwi dawakat muihni bik suhna karang waskau, dawakat muihni kidika dutni kalkulna karang, pukta kat.

⁹ Muih al ūk dutni dis karang kat witing muihni yakat wanani balna kidika duwi tawan paskaupak naikau uiwi lakwarang pa as dutni as luk dis pāni kat Israel muihni balna kidika wanani kau duwi, muih dutni suhwi yaknin wasni yayamwarang adika bitik laih sakripais as karang, muih dutni yulni.

¹⁰ Wan dukiuna muihni kidika asnina suhwarang, kaunah ban muihni kidika dutni kalkulna karang masan kat. Adika laih lā as ban kaput karang tamatna yakat, dawakat adika lani parasni duwarang,

¹¹ “Angdika muihni muih dauna muihni laih karang kat, kidika muihni laih ma tiaskaubu dutni kalkulna karang, witing muihni kidika.

¹² Ma bās dawakat, ma tiaskaubu laihwak, muih dutni yamwak suhwi yaknin wasni kau duwi suhwi kalahwarang, dawakat muihni kidika dutni dis kalahna karang.

¹³ Muih as muih dauna muihni laihwi dawi muihni kidika suhwi kalahwas dawarang kat, Dawan pāni holi kidika yakat dutni yamna ki, kaput bahang, Israel paskaupak dakwi yakna karang. Bahang kidika muihni laih, maisihni dis kalahnin wasni kau raswas bahang muihni yakat ban maisihni kidika duwi.

¹⁴ “U labanni pasyakat muih as dauwak amput yamnin lani laih aput karang: Kidika ūni paskau, muih bang kidika bitik dutni di kulnakarang muihnina, dawakat kidika ūni pasyakat wais kiwi karang kat sihm kaput kalkulna karang, bahang witingna bitik ma tiaskaubu, muihnina kidika dutni dikulna karang.

¹⁵ Di punin dini putwas balna kidika, dawakat wayaka putna balna kidika dutni dikulna karang.

¹⁶ “Ahni kau, muih ihina muihni laihwarang kat, kidika awas bik daunin mani kaiwak dauna pa, muih wakalni karangpa, kidika awaskat sau-ū karangpa laihna karang kat, ma tiaskaubu witing muihni kidika dutni kalkulna karang.

¹⁷ “Muihni yakat dutni kalkana karang kat, muih dutni yamna yulni turuh yal sakripais yamna wanani yakau duwi, di kau puwi minit yakat was sanni yamni kat utuhwarang.

¹⁸ Usnit kat maisihni dis muihni kidika, pan walapni, tingnirahni kau duwi rasna karang ū yakat, di punin dini balna yakat, muih balna yakat, dawakat muih wakalni laihna pa, muih as ihina muihni kat laihna pa, kidika awaskat sau ū laihna pa, bahang kidika muihni yakat rasna karang.

¹⁹ Muih al as maisihni dis kidika yaklauwi rasna karang, muihni dutni dauwa muihni yakat rasna karang, ma bās kidika awaskat ma rasna karang, ma bās kidika awaskat ma tiaskaubu laihwakat. Ma tiaskaubu laihwak mahka suhwi yakana karang, kaput dawak, muih muihni dutni duwa dai kidika asnina kauna ban muihni yakat dutni kalkulna karang masan kat.

²⁰ Muih as witing muihni yakat dutni duwa bik suhwi kalahwas karang kat, tawanni paskaupak, dakwi yaknin karangki. Kat Dawan pāni holi kidika rispik dis yamwi. Was maisihni dis kidika raswas dai kidika yulni maisihni ban ki.

²¹ Adika lani laih ban kaput karang. Angdika muihni kat, ūk yakat, suhwi yaknin wasni kau duwi raswarang kat, witing asnina kidika suhna karangki kaunah muihni yakat dutni duwa kidika ban duwarang ki masan kat.

²² Muih as muihni yakat dutni duwa kidika di balna yakat laihwarang, kat kidika dini bik dutni laihna karangki, dawakat muih ūk yakat tingni kau sukwarang kat, kidika muihni laih dutni kaltilahna karangki masan kat.”