Números 18 - Papang Yulni

Sumalyang balna dawakat levita balna yamninna palni kidika

¹ Dawan yaklauwi Aarón yakat kalyulna: “Man dawakat walamabis balna, Leví sulani ūk balna bitik manakulna kidika, yang ayangki nuhni yamnin pāni yakat dutni yayamna karang kat, manna tunamana yakat karang; kaunah man dawi walamabis balna karak manah tunamana yakat karang sumalyang yamnin balna pasyakat dutni as yamtanama kat.

² Kaunah Leví sulani balna bitik kidika pasyakat man bik makulna kidika, yultang kat tingmasut lalaihna karang kalpaknin ūni pasyakat di yamnin balna kidika.

³ Witingna kidika man dima yayamwarang dawakat kalpaknin ūni yakat bik dini yayamwarang, kaunah ayangki nuhni yamnin pāni kau di bang kidika yaihnit yakat kiunin awas ki, dawakat sakripais busnin pāni yaihnit yakat bik kiunin awaski, kaunah uiwarang kat dadauwarang, dawakat manna bik dautanama.

⁴ Kalpaknin ūni paskau di yamnin balna yakat mamakdadana karang, dawakat di balna bitik yamnin yakat bik. Kaunah muih taldas muihni as yaihmatna yakat kiunin awaski.

⁵ Manna salahmana yakat sakki, ayangki nuhni yamnin pāni dawakat sakripais busnin pāni kau di yamnin balna kidika. Kaput laih wattik Israel balna niningna kauh kulnik daukaltas awaki.

⁶ Yang lawik silp yaknayang wirahma balna levita kidika Israel balna paskaupak manna yakat manana atnik dawakat, kalpaknin ūni kau diyamnin balna kidika witingna yamna atninna,

⁷ kaunah man dawi walamabis balna karak manah sip mana sumalyang yamnin dini balna kidika, yamna atnamna, sakripais busnin pāni kauyakat. Adika yamnin balna kidika manna tingmana yakat ki, yang lawik mananayang sumalyang yamnin balna kidika yamna atnamna. Wais kat sumalyang awas bik sumalyang yamnin balna kidika yamwarang kat, dauna karang ki.”

Sumalyang dawakat levita balna dinina

⁸ Dawan yaklauwi Aarón yakat kalyulna: “Minitdis kalanin dini yayawa kidika, man yakat manayang maintalna atnam. Minit dis kalanin dini maisihni dis yayawa kidika Israel balna man dawak walamabis balna yakat bik manatayang, manna dimana; adika lani ban kaput karang.

⁹ Sakripais bubuswa kidika kaupak, man dunaman karang minit dis kalanin dini, diminik balna duahaiwa kidika, dawakat muih dutni yamna kat sakripais buswa kidika, Israel muihni balna; minitdis kalanin dini balna maisihni dis balna kidika, man dawak walamabis balna karak dimana.

¹⁰ Manna paskaupak ahal balna bitik sipkarang, minit dis kalanin dini adika kasnin, kaunah pa as maisihni dis pāni yakat kastanama, kat maisihni as dis bahang.

¹¹ “Yaka bitik matayang man, dawak walamabis ahal, yayal balna yakat, man karak balna kidika, minitdis kalanin dini tanit yamni duaiwi yayawarang kidika dutanama. Adika lani ban kaput karang. Man wanaihma balna pasyakat maisihnidis karang kat sip karang kasna atnin.

¹² Dawakat matayang, Israel balna diminik, tatuna yakwa kidika, yang akat kurih kaiwa bitik yakat duaiyayawa kidika bik: disala tanit yamnin kidika, wain tanit yamnin kidika, dawakat diminik balna bik.

¹³ Dawakat diminik tatuna yayakwa balna yang akat yayawa kidika, man dima karang. Man wanaihma pasyakat maisihni as dis karangkat sipki dini balna kidika kasnin.

¹⁴ Minit dis kalanin dini Israel muihni balna yaklau yang diki yayakwarang kidika, man dima karang.

¹⁵ “Israel balna walaninabis tatuna dawakat, tingninalau tatuna yakwak, yang akat yayawa kidika, man dina karang. Kaunah muih walanbis tatuna dawakat tinglau tatuna yakna balna dutni di kulna kidika, maisihni, laihta yaknaman karang.

¹⁶ Laihwi yaknin yulni minit launin kidika laih, batahn dawak waiku as kat minit launin karang ki, dawakat kidika minit laih, lalah pihni dadasni singka karangki, Papang ayangni nuhni yamnin pāni lalahni kau, kidika tikini laih yayahni (gramos) salap minitkau as ki.

¹⁷ Kaunah turuh yal walanbis tatuna yakwa kidika laih, datang kat laihwi yaknin awaski, sīp dawakat kuts bik. Kidika balna laih yang diki apakna ki, dawakat inam karangki; āni kidika sakripais busnin pāni yakat utuhma, dawakat, salani kidika laih, walapni yamni as busnaman karang yang diki.

¹⁸ Dimuihni balna laih man duna dawakat pasni kidika bik, bahang pasni kidika kuduh, minitdis kalanin tanit yamni kidika dawakat barahnimak tingnipal niningkau kidika bik.

¹⁹ Israel balna yang akat yanin dini yayakwa kidika, man yakat matayang, man walamabis ahal, yayal balna mankarak kidika balna bik. Adika lani kaput ban karang. Kidika laih pramis as satuk wirlawas karang, ban kaput atnin, yang man yakat yamtayang dawakat sulama balna kau bik.”

²⁰ Dawan yaklauwi Aarón yakat aput kalyulna: “Man Israel pasyakat sau dis awama, man alas dima kidika diskarang, Israel ūk balna kapat awas awama. Yang kuduh man dima awaki, dawakat dimapahni awaki, Israel pasyakat.

²¹ Israel muihni balna di dahwi yakwi sahyakna salap kalpaknin ūni labanni yakat wark yayamwa kidika minit duahaiwarang kidika, levita muihni balna yakat witingna dinina diatayang.

²² Israel as balna kidika laih kalpaknin ūni yaihnit yakat kiunin awaski, uina karang kat dutni as yayamna karang ki, aput laih dauna atnin karangki.

²³ Levita muihni balna manahki kalpaknin ūni kau di yamnin balna kidika yamna atnin, dutni yayamna karang kat, witingna yakat bukna karang ki. Adika lani tanit yakat ban kaput karangki, papangni, walanibis ban tanit yakat tilahwi kiwarang, levita balna.

²⁴ Witingna dinina dianayang, Israel balna di yayawarang kidika kaupak salap sahyakna kidika witingna dinina. Kidika bahang di yulnayang Israel balna pasyakat witingna silp dinina laih diskarang.”

²⁵ Dawan yaklauwi Moses yakat kiwi aput kalyulna:

²⁶ “Levita balna yakat diyulta, Israel balna di duahaiwi yayawarang kaupak sahyakna salap kidika witingna yakat dianayang kidika kaupak sahyakna salap yakwi yang akat yayana karang.

²⁷ Witingna laih kidika kau yayana karang, Israel balna yang akat yayawa kaput di minik dawakat wain minik yayakwa mani kat.

²⁸ Israel balna yaklauwi sahyakna salap diayawa kidika kaupak, levita balna bik Dawan kau kalanin kidika yayakwarang, dawakat sumalyang Aarón yakat kalalana karang.

²⁹ Di kalalawarang bitik kidika, yang diki bik yakna karang; yang ayangki kau yayawa kidika laih tanit yamnin karang.

³⁰ “Dawakat bik diyulta: ‘Yang di tanit yamnin kidika yayakwarang kat, dawakat sutni bayakna kidika laih, diminik kapat wain kapat kukulna karang,

³¹ dawakat sip awanama kasna atnin wanaihmana balna bitik pa pāni yawa. Kaput mamatna dunamana karang, Kalpaknin ūni labanni kau, diyamtamana kidika.

³² Di balna tanit yamni kidika yang diki yaktanama usnit yakat sutni kidika sip karang kasnamna dutni as bik diskarang; kaput laih Israel balna minit dis kalanin dini duahaiwa kidika, minit nuhni kultanama, dawakat lik dautas awanama.’ ”