Números 12 - Papang Yulni

Mery dawi Aarón karak Moses yakat dutni yamwi kalyuyulna

¹ Mery dawak Aarón karak kalpakwi, Moses yakat dutni kalyuyulna, kat Moses etíope yal as barak kalduduna dai kidika yulni.

² Kidika minit yakat ūk yuyulna kidika: “Dawan kidika Moses barak mana yulbauwas ki; mayang karak bik yulbauna.” Kidika yulni Papang dakana dai.

³ Rahm kidika laih, Moses laih alas kulnin buknin nuhni duwadai.

⁴ Kaput bahang, Dawan yaklauwi, Moses, Aarón dawi Mery yakat diyulna: “Manna bāspak, kalpaknin ūni yakat yawanauh.” Bāspak yakat uina dai.

⁵ Dawan kidika mukus minit munah kai'bukwi kalpaknin ūni dūrni yakat kaiwi watna; usnit kat, Aarón dawi Mery karak diyulwak uina witing yakat,

⁶ dawakat Dawan aput diyulna: “Yamni dakanauh manayulna adika: Manna pasmangna yakat, prapit as yang lawik sihki kat, yang witing karak yulbautayang amana kapat kau, dawak amana kau bik;

⁷ kaunah diki yamyang Moses karak laih kaput yamtas yang. Diki yamyang bitik kau witing laih kau barangni ki,

⁸ witing karak laih muihkina biri biri talik yulbautayangna, yul bik laih yultayang. Witing yang muihki talwakat, ¿manna ais yamta witing yakat dutni kalyultaman?”

⁹ Dawan witingna niningna yakat karak kulnin daukalwi dawi mahka kiuna.

¹⁰ Mukus kidika kalpaknin ūni kaupak kalahwi kiwakat, Mery yakat pilau lahna dai, unitak bitik pihni mana balna. Aarón wiryaklawi Mery yakat talwak pilau mana dai,

¹¹ Moses yakat kalyulna: “Plisma palni, dakiwan, mutu kapat adika dutni yamnayangna adika yulni wah yanawinih.

¹² Datang kat yal adika, muih bin batanh dawas dauwa kapat atnin awaski, unitak dutlana kapat.”

¹³ Kaput laih Moses Dawan kalni dinit yakat bukwi yulna: “Papangki plisma, kalma dinit yakat buktayang, yal adika sikninis kaupak yamni kalyamtah.”

¹⁴ Dawan yaklauwi biri nangnitlana: “Papangma yaklauwi muhma yakat susuih tuhwarang kat, ma tiaskaubu pasyakat risnipik dis karang ki. Kaput bahang, ū labanni kaupak yakpamtanauh ma tiaskaubu pasyakat, dawak ma tiaskaubu kat sip barang nawatwi kainin.”

¹⁵ Kaput laih Mery tawan paskaupak yakpapamna dai, ma tiaskaubu. Kidika mani balna pasyakat, tawan kidika panina kat ban bang dai.

¹⁶ Mery watwi pasningna yakat kiwi kana kat, Hazerot kaupak dawi kalahwi lapapakna, Parán kauhnimak wanilang kat uiwi wawatna.