Números 11 - Papang Yulni

Dawan yaklau Israel muihni balna yakat dimuihni dianin pramis kalahna

¹ Mani as kat Israel balna Dawan nining yakat yuyulna dai, dutni wawauhwa kidika yulni. Dawan kidika dakawi, kasak kulnin daukalwi kuhpau sihna dai, dawak Israel balna panina bang kidika yaihnitna awaih kidika kuhpau manah dahlna dai.

² Muih bitik sarahwi Moses yakat ilp yayulna, dawakat Moses yaklauwi Dawan kalni dinit yakat bukwi ilpnina yulna dai. Kaput laih kuhpau kidika pina dai.

³ Kidika yulni kidika pāni ayangni laih Tabera papakna dai, kat Dawan kuhni kidika witingna niningna yakat dahlna bahang.

⁴ Israel balna pasyakat, muih ūk balna bitik manas kakana dai, kaunah kidika balna di kasnin manah kukulwa dai. Kidika muihni balna yulnina dakakana dai Israel balna, kaput laih kaidi yuyulna: “¡Dimuihni kasnin duda katlaih!

⁵ ¡Amput makulnik yakat kaiwih Egipto yakat waspa dini minit dis kasdadai kidika! Dawakat kasdadai pepino, inyan, kiarlik, melon.

⁶ Kaput dai kaunah waradika laih yuh daudi, di ūk taldas ki maná kamana taldi, waradika laih.”

⁷ (Maná kidika, cilantro, miniksani kapat dai, lalahni kapat duwa dai, pan yani balna kapat,

⁸ dawakat kidika kau plawar yamwi, disala karak banawi yayamwa dai. Muih balna kidika kalahwi anawi dawi wauhnin dini kau āwi wawauhwa dai, kidika awaskat titikwa dai, kaput dawi plawar busna kapat yayamwa dai.

⁹ Pukta yakat, diwas ū minit yakat bukwa kat maná bik uhwa dai.)

¹⁰ Moses dakana dai, Israel balna kidika kakaidakat, ūnina pasyakat. Dawan uba kulnin daukalna dai, Moses bik kulnin daukalna dai,

¹¹ dawakat Dawan yakat aput kalyulna: —¿Ais yamta dutni yayamtamahn? ¿Yang niking yakat ais dutaman kat, adika muihni balna yatang truktayahng?

¹² ¿Yang adika papangnina yangh, kidika awaskat nanangnina yang katpah, yapaktang tingki kau dulau datik duyawaki bahang, muih bin ta suyang kapat, dinina almuk balna kau diyulnaman dai sau as dianam, kidika pāni kat?

¹³ ¿Angkaupak dimuihni yaktik bayahki yah adika muihni balna? Kaidīnah aiwi yayuyulwi: ‘Dimuihni yanatang kastanakuh.’

¹⁴ Yang alas adika muihni balna sip duyawas yang; yang niking yakat uba tikini ki.

¹⁵ Ban kaput yayamma kat, kau yamni ki sangkika dakyakta, rahm yangkau dalani yatalaman kat. Kaput laih wauhnin manas kidika talas awaki.

¹⁶ Kaunah Dawan yaklauwi biriwi nangnitlana: —Israel muihni balna muihbararak kidika, 70 uduhta yatah, kaunah witingna la parasni duduwa kidika tawan pasyakat, dawakat kalpaknin ūni labanni yakat taki tahatanauh.

¹⁷ Yang yakat lakwik man karak yulbauki, man spirit dutaman kidika kaupak apis dutik, witingna yakat diaki, dawakat, tingmasut laihwi duwi uiwarang adika tawanni. Kaput laih man alas awas awama.

¹⁸ Usnit dawak muih balna kidika sihtang dutnina kaupak suhwi kalalahwang, yahan mani, dawakat dimuihni kakaswarang. Kaidi yuyulwak dakanayang: ‘¡Dimuihni kasnin duduwa kat laih! ¡Egipto pāni yakat tanit yamni mayang dai!’ Kaput bahang yang lawik dimuihni diating kakaswarang.

¹⁹ Ma as, ma bu, ma salap, kidika awaskat, ma muihasluih manah awas barang,

²⁰ waiku as pasyakat dimuihni manah kakaswarang dawakat nangninatak kaupak kalahwak, tiningna dulihwarang, kat yang adika yaruhmwi yadadana bahang, Dawan witingna pasningna yakat sakyang kidika, dawakat niking kauh bik yuyulna: ‘¿Ais yamdi Egipto kaupak malahwanayah?’

²¹ Dawakat Moses nangnitlana: —Tawan yangkarak kalkau aiwabang kidika laih ahal tausin andat tiaskauas. ¿Dawakat man yultamanh dimuihni diating kakaswarang ki waiku as?

²² ¿Angkat sīp mahni bangyah, dawakat turuh bik bangyah, dawakat bitik dilana atnin? Kuma kau waspadini balna kidika bitik diadarang bik dikuihwas karang ki.

²³ Kaunah Dawan yaklauwi nangnitlana: —¿Yang paraski kidika dibin kultamahn? Waradika talma yamkipa, kidika awas kat yamtas awakipa, yultikda kidika.

Muihbararak 70 kidika prapit kapat yulbabauwi

²⁴ Moses tawan yakat kalahwi diyulna dai, Dawan witing yakat ais kalyulna dai kidika, dawakat Israel muih bararak kidika 70 uduhwi dukiwi, kalpaknin ūni yaihnit yakat awaihla danadai.

²⁵ Kaput laih Dawan mukus pasmunah yaklakkaiwi Moses karak yulbauna; usnit kat Moses piritni apis duwi, muihbararak muihasluih bās minitkau salap yakat diana. Spirit kidika witing yakat kiwikana kat, prapit kapat yulbabauna dai; kaunah adika dini watwi kaput yamwas dai.

²⁶ Ahal bu, ayangnina laih Eldad, dawakat ūk laih Medad, kidika balna bik, Moses yaklauwi yakna dai, kaunah uiwas ūnina yakat wawatna dai. Kaunah witingna yakat bik spirit kiwi kana dai, dawakat ūk balna yulbabauna kapat, witingna bik yulbabauna dai, ūnina pasyakat.

²⁷ Muih al wahma bin as kalahwi kiri kiwi Moses yakat kalyulna: —¡Eldad dawi Medad karak yulbabauwi, prapit balna kapat!

²⁸ Josué, Nun walanibis, witing laih wahmabin kaupak Moses tingnisut laihyang dai, bahang aput yulna: —¡Yang dakiwan, Moses, kidika yayamwa kidika diyultang dadawang, yamninna awas!

²⁹ Kaunah Moses nangnitlawadai: —¿Yang mikit antamahn? ¡Dawan spiritni kidika muih bitik yakat diana kat laih yamni dai, bitik kidika prapit kakalna dai katlaih!

³⁰ Kidika usnit kat, Moses dawi muihbararak balna karak bitik kalpakwi mahka ūnina kau uina dai.

Dawan yaklau wang sihna dai

³¹ Dawan yaklauwi wing as kalawak paraswi wauhna dai kuma kaupak, kidika wingni pasyakat wang binina mahni duaiwi lakna dai, Israel balna ūnina yaihnit yakat, ū labanni kaupak ma as lapakdi mawa kaput pa nuhni kidika wang binina manah dai, dawak uduhna nuhni maluihni niningkauh kidika metro as kapat duwadai.

³² Kidika mani bitik dawak pukta bitik dawak payahwakat mapiris kaupak masan kat muih balna kidika wang ananawadai. Bulah ananana kidika laih uduhna salap manahdai, kidika balna laih ū yaihnit yakat bubukna dai.

³³ Kaunah Israel muihni balna laih waralaihtakat kaswabang kat Dawan yaklau witingna niningnakauh anwi wah diawakat muih mahni palni dadauna dai.

³⁴ Kidika yulni kidika pāni laih Kibrot-hataava papakna dai, kat kidika pāni yakat muih balna di kasnin manah kukulwadai kidika nununa yulni.

³⁵ Tawan muihni balna kidika laih Kibrot-hataava kaupak tanitna yakat lapapakna dai Hazerot kat, dawak kidika yakat wawatna dai.