Miqueas 5 - Papang Yulni

Devid kingni lani kidika watwi laihwi dulauna

¹ “Kauna waralaih, Jerusalén, man tamat daknin kidika ridi alahwa, kat ma-awaihdadakna bahang, dawak Israel tanituna kidika parasni palni dalani wauhwarang bahang.

² Belén Efrata, man laih Judá sulani pasyakat dibin man, man kaupak Israel kabamintni as kalahwarang kidika laih sara sulani dai kidika kaupak kaiwi.”

³ Waralaih Dawan witing dini balna dawi, kaunah walanibis yakwarang kat manah yal as muih bin dunin tahawa sakkidika. Kaput dawak kalududuhwarang pa aslah balna karak Israel balna pa ūk kau duwi uina bangkidika.

⁴ King kidika yaklauwarang dawak tawanni kidika tunan duwarang, Papang parasni bitik duwa kidika kau, dawak witingna kidika kulnninna aslah yalalahwarang, kat Papang kidika laih nuhni kalyamna karang sau sutni bitik kau.

⁵ Witing yaklauwi kulnin aslah lani kidika duaiwarang. Asirio balna mayang masauki akat aiwi kakawarangkat, dawak makingki uni balna yakat kakawakat witingna niningna yakat tunan muihni tiaskaubu, dawak ahal nunuhni dikulna kidika tiaskaubās sihdarang.

⁶ Witingna kabamint kakawarang Asiria yakat, Nimrod sauni yakat, isparah baini karak, dawak Asiria balna kaupak mailaih'yayakwarang mayang masauki lainni bayayakna kidika, dawak masauki akat aiwi kakana kidika.

⁷ Kaput laih, tawan mahni pasyakat Jacob tawanni muihni buas wawatna bangkidika laih sihm Dawan was sihwak kaiwa kapat karang, dibasta minit yakat waslauwa kapat, kidika laih muih kulnin lani awaski.

⁸ Kaput laih tawan mahni pasyakat Jacob tawanni sutni watna bangkidika laih sihm layan as asangpas dini anyang balna pasyakat kapat karang, kidika awaskat, layan, sīp balna pasyakat kana kapat karang, bayakwi kiwa kidika tipisnimak kau laihwi iwi, dawak asbik kiri yaklawas ki sangnika karuk.

⁹ Kaput diyamma Papang, man waihmala balna yakat, bahtadis yamma.

¹⁰ Papang kaput yulwi: “Kidika mani amaras balna kidika imukki, dawak wār kalbautaman kārni balna bik bahtik dis yamki;

¹¹ tawan nunuhni balna kidika daukalmukki, kalbauyang balna ūnina pararasni balna kidika bitik tuklakki;

¹² sukmayah balna kidika bitik dahnyamki, dawak di kaikalahwas kau talwi yuyulwa balna kidika bik disyamki;

¹³ dawan dauh wayani balna kidika daukalmukki, dawak kimapala dawan dini ti dutaman kidika bik; kaput laih dawan dauh balna man silp yamtada, kidika yakat mamat yultaman, bahang kidika laih dama.

¹⁴ Damawan dauh ayangni kau duta pan dahnaman balna kidika duttik yakki ki, dawak tawanma nunuhni balna kidika bitik daukalki.

¹⁵ Yang kulnik daukalwa yulni biritik diyamki ki, muih balna yang yulki kat dakawi yayamwas balna dai kidika yakat.”