Miqueas 3 - Papang Yulni

Kabamint dudutni balna niningna yakat yulna

¹ Waralaih dakanauh, kabamint balna dawak Israel tunan muihni balna, ¿manna amanglanamana-awas katpah la kat yamnin kidika?

² Kaput kauna, yamni kidika dutni talaman, dawak dalani talamana dutni kidika; tawanki unitak taktamana wakalni manah kaldatamana.

³ Tawanki kidika sangka palni kakaswi; unitak tuturwi dawak wakalni balna babahwi, suba yakat āwi lahnin dinimuihni kapat yayamwi.

⁴ Ma askat manna Dawan yakat yultanama, kauna witing nangmatnalawas karang. Kidika mani manna kaupak yakmaldarang dutni yamnamana kidika yulni.

⁵ Tawanki kidika ta pini yakat kiwi prapit balna alas kalyuyulwa kidika yulni, kulnin aslah lani yuyulwi, di diayawak kakaswa muihni balna yakat, kauna war duahaiwi tininapas yakat puwi babangwas balna yakat. Dawan yaklauwi prapit balna yakat diyulwi:

⁶ “Manna watta dutas awanama prapit amana talwa kapat kidika pukta yakat dawak tanit kau ma balna yakat di kalahwarang kidika yultas awanama.” Ma kidika kawi kiuna karang kidika prapit balna yakat, madah kidika puksani manah kalwarang, witingna yakat.

⁷ Kidika di talyang balna kidik asalnina kalahna karang. Witingna bitik ap dadawarang, Papang kaupak di as bik diyulwas dawakat.

⁸ Nawatni kauh laih yang nikingyakat, Papang spiritni yaklauwi paraski yana, la kat yaka bik dawak kulnik parasni atnik bik, kaput laih Israel muhni kat witing kulnin dutni dawak dutni balna yamna kidika yaktik yulnik.

⁹ Waralaih adika dakanauh kabamint balna, dawak, Israel tunan muihni balna, manna la yamni kidika dutni talamana, dawak di barangni kidika kawaini yamtamana,

¹⁰ Jerusalén kidika watta lahta dulauta yamtamana, Sayan asangni nuhni rahni balna kidika laih inin lani karak, dawak la dutni karak.

¹¹ Tawan nuhni wihnita balna kidika dadawak yakauh dimurna ki, sumalyang nunuhni balna kidika laih lalah yulni manah sumamalwa dai, dawak prapit balna laih, witingna di baisa kaikalahwas yulni balna kidika bakakanna, dawak yuyulna Papang yaklauwi ilp diawi bahang aput yuyulna: “Papang laih mayang karak ki, di dutni as bik mailaihwas karang.”

¹² Kaput bahang manna dutmana yulni Jerusalén Sayan tawanni nuhni kidika daukalna karang, dawak kidika asangni kau Papang uni kidika laih minit yakat dibasta manah ukusna karang.