Miqueas 2 - Papang Yulni

Muih taihyang balna parasnina nuhni

¹ ¡Alakaih, kidika balna baisa amana tatalwa kidika dutni yamnin kidika ridi kalalahwi, dawak ma payahlawak uman yayamna ki, kat tingnina yakat parasni kidika duduwa bahang!

² Sau kidika tutumwi, dawak dakyayakwi, ū balna kidika bik tumwi, dawak mamalwi. Muih balna yakat tataihwi, wanaihnina balna yakat bik, dinidawan yakat, dawak dini pahni kidika bik.

³ Kaput bahang Papang yulwi: “Yang bik witingna niningna yakat yamnik dutayang. Di dutni as sihki, kidika kaupak sip dakwi kalalahwas karang bahang, dawak baisa lapapakwas karang witingna manah kapat kat dutni mani balna karang bahang.

⁴ Kidika mani manna yakat unbabauwarang kaidinin laniwana kidika. Manayuyulwarang: ‘Bitik palni yanadaukalmukna; mayang matawanki, Dawan dini dai kidika, di dawan ūk kalahna, muih as bik laihwatwas dai; mayakimak balna wayahyakwi duduna madiki dakyakyang balna kidika.’ ”

⁵ Kidika bahang manna laih di dis awanama Dawan tawanni yakat.

Prapit dudutni balna

⁶ “¡Prapit yulni karak kainin-awas ki! —witingna yuyulwi—. ¡Di dutni kidika mailaihwas karang!”

⁷ ¿Jacob tawanni kidika la kaltuhna katpah? ¿Papang kidika kulnin laihwatwas danayah? ¿Papang kidika kaput yamwih? ¿Witing yulni munah yamni kaiwas katpah barangni muihni yakat?

⁸ Manna tawanki nining yakat lawanamana. Asninana minit nuhni kidika dakyaktamana, wār kaupak nawatwi aiwa balna yakat yaklawanamana kapat kulta.

⁹ Ūmana yamni talamana kidika yakat yalmana balna ruhmlaktamana, dawak walaninabis binina kidik bik dakyaktamana risnipik dianayang dai bik.

¹⁰ ¡Lawanauh! ¡Lapaknin! adika laih mawingkita puhnin pāni awas ki, dutni lani witing yakat sakkidika yulni, kidika bitik palni daukalpamna karang.

¹¹ Muih as alas yulwi yulwarang kat: “Yang isningna paktayang wain dawak wasni daihni”, adika laih prapit yamni as ki tawan akat.

Papang pramis yamwi witing tawanni laihwi yaknin

¹² Jacob tawanni kidika bitik uduhki; dawak Israel tawanni bubin kidika bik uduhki. Sihm sīp uduhwa kapat uduhki, sīp balna sihrsihr kaswa bangkapat, muih mahni diparasni atwa kapat karang.

¹³ Papang yaklauwi ta balna kidika yamwarang, dawak witingna usnit uhuiwarang dawak tawan nuhni dūrni munah kalalahwarang. Witingna kingnina, Dawan, witingna bitik tanitna yakat lapakwarang.