Matyu 9 - Papang Yulni

Jisas yaklau muih balna sikninanis kaupak diyamwi

¹ Kidika usnit kat, Jisas laih kuring as kau kawi lakun nakas yakat dakyakwi witing palni tawanni yakat kiwi kana dai.

² Kidika yakat muih sininwah buhlana muihni as muih lakwi truknin dini kau laktuswi duwi uina dai; dawak witingna rahm kulnin lani duduwa kidika Jisas yaklau ditalna mani kat, siknis muihni yakat kalyulna: —Yang walakibis, kulnam dulautah; man dutma balna kidika laih dating kat disna.

³ Lā sumalniyang balna buas witingna kukulna: “Adika muihni yul yulna kidika laih Papang niningyakat dutni as yulna.”

⁴ Kaunah witingna ais kukulwa kidika Jisas amanglana dai bahang, diyulwi dakana: —¿Ais yulni manna kulnin lani dutni palni dutamanah?

⁵ ¿Angdika kauh yulnin sipyah: ‘Dutma balna kidika laih dawak disna’, kidik awas kat aput kauh yulnin: ‘Lawah dawak yawah’?

⁶ Bahang muih Walanibis al sau akat muih dutni dawak disnin parasni duwa kidika namangna kaki ki. Bahang sininwah buhlana muihni yakat kalyulna: —Lauwa alangwanam dini kidika duta ūma kau yawah.

⁷ Sininwah buhlana muihni kidika laih yaklauwi ūni kau kiuna dai.

⁸ Adika dini muih balna tatalna mani kat yamaduduna dai dawak Papang yakat tanit ayangni nuhni yamna dai muih balna yakat parasni diana kidika yulni.

Jisas yaklau Matyu yakat kalyulwakat kiwi

⁹ Jisas witing kidika kaupak kalahwi kiwi muih al as talna dai ayangni laih Matyu, witing laih tunan minit yakyang pāni yakat yalahna sakdai, kidika lalah yakwa kidika laih Roma dini dai. Jisas yaklau kalyulna: —Uskit uitah. Bahang Matyu laih yaklauwi usnit uina dai.

¹⁰ Jisas witing ū yakat di kaswa sak kat, Roma dini tunan minit dakyang balna kidika kaupak mahni palni dawak muih balna ayangnina dutni dikukulwa kidika kaupak bik, uikawi Jisas witing disainipil balna karak tibil yakat yalahna bangdai kidika yaihnitna yakat yalalahna dai.

¹¹ Kidika dini parisi balna tatalna mani kat, disaipil balna yakat diyulwi dakakana dai: —¿Ais yulni manna sumalnayang kidika tunan minit dakyang muihni balna dawak dutni yamyang muihni balna karak bik kalpakwi di kaswi?

¹² Jisas yaklau didakawi diyulna: —Muih muihnina sanni yayamni balna kidika laih daktar dukih diawas ki, kaunah siknis muihni balna kidika laihtakat.

¹³ Manna yawa adika Ulna tannika adika lan alahwanauh: ‘Yang dukih yawa kidika laih minikun talnin lani kidika duna atnamna kaunah sakripais busnamna kidika laih awaski.’ Bahang yang laih muih yayamni balna yakat diyulna aiwasyang, kaunah dutni yamyang muihni balna yakat diyulna aiwanayang.

Yuh wauhnin yulni kidika

¹⁴ Jan muih wassiyang usnit uiyang balna kidika laih Jisas yaihnit yakat uiwi kalyulwi dakakana: —Yangna dawak parisi muihni balna karak laih uba palni yuh wauhtayangna, ¿ampadawakat man disaimapil balna laih di kaswas dawi yuh wawauhwasyah?

¹⁵ Jisas yaklau nangnitnalana: —¿Sip karangyah marid alasnina yakat muih balna diyuyulwa kat uina kidika kulninna bukna atnin, marid al kidika witingna karak sak kat? Kaunah mani kiwi kawarang ki marid al kidika yakat laihwi duwi uina atnin; kaput dawarang laih takat yuh wawauhwarang ki.

¹⁶ “Muih as bik asna umani kidika asna wisam kau pislakwaski, kat pislakna wisam kidika yulni laih asna umani kidika biswi, dawak bisna kidika laih nuhni palni kalwi.

¹⁷ Dawak bik wain wisam kidika di utak bina uni umani balna yakat utuhwas ki, kat di utak balna kidika laih bisyayamwa bahang, dawak wain dawi di utak balna kidika laih pini didiswi. Kaput bahang wain kidika laih di utak bina uni balna wisasam kat puna atnin ki, kaput karak di bupak kidika duna atnin yulni.

Jairo walanibis yal. Jisas kalmukwa dini yakat sukna kidika

¹⁸ Jisas laih muih balna yakat yul dibauwasak kat, ju balna taninatuna as kiwi kawi witing muhni yakat limbabahwi aput kalyulna: —Yang walakibis yal laih wisam palni dauna; kaunah man aiwa witing minit yakat tingma kau lakma kat witing laih sangka kalwarang ki.

¹⁹ Jisas laih yaklauwi disainipil balna karak kalpakwi uina dai.

²⁰ Bahang muih yal as ā kalkalahwa sikninis kallaihna kaupak kurih 12 duwa kat, Jisas dangnit kaupak kiwi kalmukwa dini kidika sutni yakat sukna dai.

²¹ Kat kulwadai: “Kalmukwa dini kidika manah bik sukki kat sikkinis kaupak yamni alahwaki ki.”

²² Kaunah Jisas wiryaklawi yal yakat kaltalwi aput kalyulna: —Yang walakibis yal kulnam dulautah, rahm kulnin lani dutaman kidika yulni sikmanis kaupak yamni mayamna. Dawak kidika mani kaupak yal kidika sikninis kaupak kalyamna dai.

²³ Jisas witing ju balna taninatuna ūni yakat kiwi kana kat, paswi yakisdayang balna kidika laih ridi kakalna kat bangdai muih kidika uman sau yakat nuna atnin yulni dawak muih balna kidika laih sarahwi kakaidadai,

²⁴ Jisas yaklau diyulna: —Akaupak alahwanauh, kat muih yal sirau adika laih baisa dauwas ki, kaunah kamana tuski. Muih balna kidika laih Jisas yakat niningkakarana dai,

²⁵ kaunah witing yaklau diyakmukna dai; usnit kat ū pasyakat kawi muih yal sirau kidika tingni yakat laihwa kat yal kidika laih yaklauna dai.

²⁶ Dawak yul kidika laih kidika sauni bitik yakat kawi yaklana dai ais kalahna dai kidika.

Jisas yaklau muih miniknapa tatalwas muihni bu diyamna

²⁷ Kidika kaupak Jisas kalahna mani kat, muih miniknapa di tatalwas muihni bu sarahwi usnit uhuina dai: —¡Devid Walanibis, yangna yakat miknakun yanatalah!

²⁸ Jisas witing ū yakat kana mani kat, miniknapa di tatalwas muihni balna kidika laih witing yaihnit yakat uiwa kat diyulwi dakana: —¿Yang sip yamki kultamanah manna? Witingna yaklau nangnitlalana: —Agha, Dawan.

²⁹ Bahang Jisas yaklau witingna miniknapa yakat sukwi diyulna: —Manna rahm kulnin lani dutamana kidika karak yamwarang.

³⁰ Dawak witingna miniknapa kidika laih watwi yamni kalna dai. Jisas yaklau uba palni diyulna dai: —Manna muih as kau bik kalyulnamna awas ki.

³¹ Kaunah, witingna kalalahwa minitni yakat kidika sauni muihni balna bitik yakat yuyulna dai Jisas ais yamna dai kidika.

Jisas yaklau tubi muihni as yamni kalyamna

³² Muih miniknapa di tatalwas muihni balna kidika laih kalahwabangkat, muih buas witingna tubi spirit dutni kalkana muihni as Jisas yakat uiwi kalalana dai.

³³ Jisas witing spirit dutni yakat kang'yakpamna mani kat, tubi muihni kidika laih watwi yulbauna dai. Muih balna kidika laih yamni talwi, aput yuyulna dai: —¡Israel yakat wat as bik di as apat as kalahwa kat taldas ki!

³⁴ Kaunah parisi balna laih aput yuyulwadai: —Spirit dudutni balna taninatuna kidika yaklau adika muihni akat parasni kalana spirit dudutni balna yakat kangwi yakna atnin.

Jisas yaklau muih balna yakat miniknakun talwi

³⁵ Jisas laih tawan balna dawak tawan dibinina balna yakat bik awaihwi sumalwādai Papang yulni sumamalwa ūni balna yakat. King kawa sauni yulni yamni kidika yulwadai, dawak siknis dalani balna bitik kidika yamwadai.

³⁶ Muih balna yakat talna mani kat miniknakun ditalna dai, kat dilunglakna dawak bik sip awas kalalahna dai kidika yulni, sihm sīp balna kat mainditalnin muihni dis kakalna kapat.

³⁷ Bahang disainipil balna yakat diyulna: —Rahm palni di minik balna kidika laih mahni palni ki, kaunah wark kalahyang muihni balna kidika laih bulah ki.

³⁸ Kidika bahang, di minik Dawan yakat kalyultanauh wark muihni balna sihwa kat di minik balna kidika dadakwang.