Matyu 8 - Papang Yulni

Jisas yaklau pilau muihni as yakat sikninis kaupak yamni kalyamna

¹ Jisas witing asang kaupak yaklakna mani kat, muih mahni palni usnit uhuina dai.

² Kidika yakat muih al pilau duyang muihni as witing yaihnit yakat kiuna dai, dawi witing muhni yakat limbabahwi aput kalyulna dai: —Dawan, mikun yatalaman kat, yang sikkinis kaupak yayamnam sip ki.

³ Jisas yaklau tingni kau sukwi aput kalyulna: —Dukih yawi. ¡Maisihni dis alahwanaman! Kidika minitni yakat, pilau duwa muihni kidika witing sikninis kaupak maisihni dis kalahna dai.

⁴ Jisas yaklau baisa minit lakwi yulna: —Talah, muih as kau bik kalyulwinih; dauh manah yawa sumalyang muhni yakat lawah, dawak Moses yaklau minit dis kalanin dini duwi kiunin yulna dai kidika duyawah, man sikmanis kaupak maisihni dis alahwanaman kidika witingna bitik amanglana atninna yulni.

Jisas yaklau Roma kaupak kalbauyang tunan muihni dini yamyang as sikninis kaupak yamni kalyamna

⁵ Jisas witing Capernaum yakat kana kat, Roma kaupak kalbauyang tunan muihni as witing yaihnit yakat kiwi kalni dinit bukna dai.

⁶ Aput kalyulna: —Dawan, yang diki yamyang as ū yakat siknis tuski, muihni kalkukuslana kat dalani nuhni wauhwatuski.

⁷ Jisas yaklau nangnitlana: —Yang yawik yamni kalyamna awaki.

⁸ Kalbauyang balna taninatuna kidika yaklau nangnitlana: —Dawan, yang ūki yakat āwanam kidika sip awaski; dauhmanah yamnin kalyultah dawak diki yamyang kidika sikninis kaupak yamni kalyamwarang ki.

⁹ Kat yang palni bik tunan nunuhni balna tingnina dinit yakat sakyang, dawak kaput bik yang tingki dinit yakat soldado balna kidika dutayang. Kidika balna kaupak as yakat yawah kaltiang mani kat, kiwi; dawak ūk yakat aiwah kaltiang mani kat, kaiwi; dawak yang diki yamyang yakat yamtah kaltiang kidika yamwi.

¹⁰ Jisas laih kidika yulni dakawi yamni kaldakana dai, dawak usnit uhuiwa muihni balna yakat diyulna: —Rahm manayultayang Israel yakat muih al as bik kalpaktasyang adika alni rahm kulwa adika kaput.

¹¹ Dawak manayultayang, muih mahni palni aiwarang ma kilwa dawak ma kawa niningkaupak bik, dawak Abraham, Isaac dawak Jacob kidika balna karak yalahwi kasnin dini kakaswarang Papang king kawa sauni yakat,

¹² kaunah king kawa sauni yakat bang-atnin muihni balna dai kidika laih, ahni puksani yakat ruhm'yakna karang, kaidi ananina kakarswarang kidika pāni yakat.

¹³ Usnit kat Jisas yaklau kalbauyang balna taninatuna yakat kalyulna: —Ūma yakat yawah, dawak man kulnaman kaput kalahwarang. Kidika minitni yakat dini yamyang kidika laih sikninis kaupak kalyamna dai.

Jisas yaklau Pita unisah yal kidika sikninis kaupak kalyamna

¹⁴ Jisas laih Pita ūni yakat kiuna dai, kidika yakat Pita unisah yal kidika yamah kalbuswakat payahnin pāni yakat tuskat talna dai.

¹⁵ Bahang Jisas laih yal kidika tingni yakat sukna, dawak yamahni kidika kaldana dai, kaput dawakat yal kidika yaklauwi yuldibauna dai.

Jisas laih siknis muihni balna mahni palni yamni diyamna

¹⁶ Puklakwa yakat spirit dutni dikana muihni balna mahni palni Jisas yakat duwi uina dai; yulni aslah karak spirit dudutni balna kidika kangyakmukna dai, dawak siknis muihni balna bitik yakat bik yamni diyamna dai.

¹⁷ Adika dini kalahna dai prapit Isaías yulna dai kidika balna yakat kalahna atnin yulni, aput yulna dai kidika: “Witing yaklau mayang sip awas mayawa dini kidika dawak masikkinis balna kidika karak trukna.”

Jisas usnit uinin dukih diawa muihni balna dai kidika

¹⁸ Jisas witing talwakat muih mahni palni kalawaihdak kalduduwa kat, lakun nakas yakat kaldaklana atnin yulna dai.

¹⁹ Bahang lā sumalniyang as witing yaihnit yakat kiwi aput kalyulna: —Sumalyang, angkat angkat yawama bik usmat uina atnik kidika dukih yawi.

²⁰ Jisas yaklau nangnitlana: —Wassala balna kidika panina sulihni duduwi dawak di lawani balna kidika bik ūnina duduwi, kaunah muih Walanibis al kidika laih tunani laknin pāni kidika dis ki.

²¹ Witing disainipil kaupak as kidika yaklau kalyulna: —Dawan, yadatang kat yawi papangki kidika tatuna nukuh.

²² Jisas yaklau nangnitlana: —Uskit uitah, datang kat dadauna muihni balna kidika yaklau dadauna balna yakat nunuwang.

Jisas yaklau wing dawak was lalamwa balna kidika yakat laihwatwi

²³ Jisas laih kuring yakat kilna dawak, disainipil balna kidika laih witing karak kalpakwi uina dai.

²⁴ Kidika minitni yakat lakun minit yakat wing parasni as wauhna dai was lalamwa balna kidika laih kuring pasyakat kawadai. Kaunah Jisas laih kamana dai.

²⁵ Bahang disainipil balna laih witing yakat uiwi aput kalyulwi uswi sahmumuhna dai: —¡Dawan, mailaihta yaktah! ¡Was pasyakat mahamawi!

²⁶ Witing yaklau nangnitnalana: —¿Ais yamta kaput yamaduta manah? ¡Amput dawakat kaput palni kulnin lani dibindauh dutamanah! Kidika yulna usnit kat, yaklauwi wing yakat dawak kuma yakat bik yamnin kalyulna dai, dawak bitik palni lungni manah kalna dai.

²⁷ Witingna laih yamni palni talwi, biri biri kalyulwi dakakana dai: —¿Bahang waisyah adika muihni adika, wing dawak kuma kat bik witing yulni dakakawa kidika?

Gadara yakat spirit dutni dikana muihni balna kidika

²⁸ Jisas witing lakun nakas Gadara sauni yakat dakyaklana mani kat, spirit dutni dikana muihni bu sauū balna walsah kaupak kalahwi witing yaihnit yakat uina dai. Muih dudutni dai kidika tani munah muih as bik sip bayakwasdai;

²⁹ dawak witingna sararahna dai: —¡Jisas man yangna karak kawih, Papang Walanibis! ¿Adika pāni akat dalani yanana aiwanamahn baisa mani kawas yakauna?

³⁰ Kidika pāni kaupak naikau kusih mahni palni di kaswabangdai,

³¹ dawak spirit dudutni balna kidika laih Jisas yakat kalni dinit bubukna dai: —Yanayakmukma karang kat, kidika kusih balna yakat yanadatang kat awanakuh.

³² Jisas yaklau diyulna: —Yawanauh. Spirit dudutni balna kidika laih muih ahal balna kidika kaupak kalahwi kusih balna yakat kakana dai; dawak kidika minitni yakat kusih balna kidika laih kiri lakun kat yaklakkiwi was dadauna dai.

³³ Kusih maintalyang muihni balna kidika laih kalahwi kikirana dai, dawak tawan yakat ui'kakana mani kat spirit dutni dikana muihni balna yakat ais dikalahna dai kidika bitik palni muih balna yakat diyuyulna dai.

³⁴ Bahang muih balna bitik kidika Jisas sakdai pāni yakat uina dai, dawak witing yakat kaltatalna mani kat kalni dinit bukwi kalyuyulna dai kidika pāni kaupak kalahwi kiuna atnin.