Matyu 4 - Papang Yulni

Jisas traini talna kidika

¹ Usnit kat Spirit yaklau Jisas yakat duwi kiuna dai kauhmak wanilang yakat, muih alasni yulyang yaklau trainitalna atnin.

² Madah 40 dawak pukta 40 sakdai di as bik kaswas, dawak usnit kat yuh kal-laihna dai.

³ Bahang muih alasni yulyang kidika laih Jisas yaihnit yakat kiuna dai traini talna atnin, dawak aput kalyulna: —Rahm palni man Papang walanibis man kat, adika kinipala balna akat yultangkat plawar busna kakalwang.

⁴ Kaunah Jisas yaklau nangnitlana: —Ulna yakat yulwi: ‘Muih al kidika plawar busna kau manah laih sangka awas karang, kaunah sangka karang Papang kungnimak kaupak yul balna kalahwarang kidika kau bik.’

⁵ Usnit kat muih alasni yulyang kidika yaklau Jerusalén tawanni nuhni holi kidika yakat duwi kiuna dai, makat yulnin ūni baisa maluihni yakat ilna dai

⁶ dawak aput kalyulna: —Rahm palni man Papang walanibis man kat, sau yakat sutta buktah; kat ulna yakat yulwi: ‘Papang witing innisal balna kidika sihwarang ki mainmatalna atninna. Witingna tingnina kau madulalauwarang ki, kipala balna yakat buknam awas yulni.’

⁷ Jisas yaklau nangnitlana: —Ulna yakat bik aput yulwi: ‘Man Papangma Dawan yakat traini talwinih.’

⁸ Witni kat muih alasni yulyang kidika yaklau duwi kiuna dai asang as maluihni kat, dawak sau balna nunuhni kidika yakat niningkawi

⁹ kalyulna: —Limbabahta ayangki tanit nuhni yamma kat, yang lawik adika maki ki.

¹⁰ Jisas yaklau nangnitlana: —Alahyawah satanas, kat ulna yakat yulwi: ‘Man Papangma Dawan yakat ayangni tanit nuhni yamtah dawak bik witing yakat manah dini yamtah.’

¹¹ Bahang muih alasni yulyang kidika laih Jisas yaihnit kaupak kalahna, dawak insal balna buas aiwi dini yayamna dai.

Galilea yakat Jisas warkni tunan bahna kidika

¹² Jisas witing Jan silak ahana yulni kidika dakana kat, Galilea yakat kiuna dai.

¹³ Kaunah witing laih Nazaret yakat watwas dawi, Capernaum lakunni kung yakat kiwi yalahna dai, Zabulón dawi Neftalí sulanina balna saunina yakat.

¹⁴ Adika dini kalahna dai prapit Isaías ulna dai kidika kaput kalahna atnin yulni:

¹⁵ “Zabulón dawi Neftalí balna saunina, Jordán wasni nakas kau, kuma kung yakat: Galilea sauni Papang yakat kukulwas muihni balna yalalahwa kidika.

¹⁶ Tawan as puksani yakat likdai kidika yaringni nuhni as talna; yaringni as dahlna daunin puksani yakat bangdai kidika balna dinina.”

¹⁷ Kidika mani kaupak Jisas witing yulwi sumalna dai: “Papang yakat wirlawanauh, kat Papang king kawa sauni kidika laih ulis dana ki.”

Jisas yaklau dipamyang muihni balna arungka yakat diyulwak uina kidika

¹⁸ Jisas laih Galilea lakunni kung yakat lapakwi kiwalik kauna kalwirah ahal bu talna dai: as kidika laih Saiman dai, ayangni ūk kau laih Pita, dawak ūk kidika laih Andru dai. Witingna laih dipamyang ahalni balna dai, dawak waspa dini laihnin dini kidika was pasyakat ruhm-āwarau dai.

¹⁹ Jisas yaklau nangnitnalana: —Uskit uitanauh, dawak yang lawik muih pamyang manayamki ki.

²⁰ Kidika minitni yakat waspa dini laihnin dini kidika dapamwi witing karak uina dai.

²¹ Kidika tanit yakat kiwakat, kalwirah ahal ūk bu talna dai: kidika balna laih Sibidi walanibis ahal Jims dawi Jan karak dai, witingna laih papangnina karak kuring as kau bangdai waspa dini laihnin dini kidika ridi yamwa. Jisas yaklau diyulwak uina dai,

²² dawak usnit kat witingna kuringnina kidika papangnina tingni yakat dawi Jisas usnit uhuina dai.

Jisas laih muih mahni kau sumalna

²³ Jisas laih Galilea sauni bitik yakat awaihwadai, Papang yulni sumamalwa ūni balna bitik yakat. Papang king kawa sauni yulni yamni kidika sumalwadai dawak muih balna sikninanis dalani wawauhwa kidika bitik bik yamni diyamwadai.

²⁴ Jisas yulni kidika Siria sauni bitik yakat yuyulwadai, dawak siknis sat sat dalani wawauhwa balna, spirit dutni dikana balna, di iswa balna dawak sininawah buhlana balna kidika bik witing yakat duahaiwadai. Dawak Jisas yaklau yamni diyamwadai.

²⁵ Galilea muihni, Decápolis tawanni balna, Jerusalén muihni, Judá muihni dawak Jordán kaupak ma kilwa niningkauh sauni muihni balna bik mahni palni kidika Jisas yakat usnit uhuiwadai.