Matyu 25 - Papang Yulni

Sirarau salap yulnina, malni yulni

¹ “Bahang Papang king kawa sauni kidika laih sihm muih yayal sirarau salap balna kat marid alasnina as kau awasnina balna duwi marid al yakat kalahwi kalpararasna kapat karang ki.

² Witingna kaupak singka kidika laih kulwi tatalwa dai dawak singka uk balna kidika laih kulwi tatalwas dai.

³ Kulwi tatalwas muihni balna kidika laih awasnina duwi uina dai, kaunah wasni laih duwi uiwas dai dahn kalwa kat watwi puna atnin;

⁴ kaunah wirlawa kat, kulwi tatalwa muihni balna kidika laih awasnina dawak wasni kauna duwi uina dai.

⁵ Marid al kidika laih sirihni kiwi kawas dai bahang, witingna bitik kau miniknakauhwa kat kakamana dai.

⁶ Pukpapusnin manah kat sararahna dai: ‘¡Marid al kidika laih uman kaiwi! ¡Alahwa kalparastanauh!’

⁷ Yayal sirarau balna kidika bitik laih yaklauwi awasnina ridi yayamna dai.

⁸ Bahang sirarau singka kulwi tatalwas balna kidika laih sirarau uk singka kulwi tatalwa balna yakat diyuyulna: ‘Awasmana wasni kidika kaupak apis yanatanauh, kat yangna awaskina kidika laih wasni dis kat piyayamwi.’

⁹ Kaunah sirarau kulwi tatalwa balna kidika yaklau nangnitnalalana: ‘Ahmdeh, kat kidika yamtanaki kat yangna dawak manna kat bik manalaihwas karang ki. Baisa yamni ki bakakanwa pani yakat yawa manna silp dimana bakantanama kat.’

¹⁰ Kaunah sirarau singka kulwi tatalwas balna dai kidika laih awasnina wasni bakanna uidadawa kat, marid al kidika laih kaina dai, dawak kulwi tatalna balna dai kidika laih marid alasnina yakat kakawa kat dur kidika putna dai.

¹¹ Usnit kat sirarau uk balna kidika laih aput yulwinah uikakana dai: ‘¡Dawan, Dawan dur apahtah!’

¹² Kaunah witing yaklau nangnitnalana: ‘Barangni manayultayang manna kidika waismanapa amangmanalatasyang.’ ”

¹³ Jisas yaklau minit lakwi diyulna: “Sahmuhni bang-awanauh, kat manna laih mani kidika dawak awarni kidika bik amanglatasmana bahang.

Lalah yulni malni yulni kidika

¹⁴ “Papang king kawa sauni kidika laih sihm muih al as kat sau uk kau kalahkiwi lalahni kidika laih dini yamyang balna yakat maintalnin diawa kapat ki.

¹⁵ Witingna kaupak as kidika yakat laih lalah dadasni 5,000 kalana dai, uk yakat laih 2,000 kalana dai dawak witni kidika yakat laih 1,000 kalana dai: witingna ais sip kidika kaput diana dai. Bahang muih al kidika laih mahka kalahwi kiuna dai.

¹⁶ Wark muihni 5,000 dunadai kidika laih lalah warkni yamwi 5,000 uk yakna dai.

¹⁷ Wark muihni uk lalah 2,000 duna dai kidika bik sihm lalah 2,000 uk win kalna dai.

¹⁸ Kaunah lalah 1,000 duna dai kidika muihni laih duwi kiwi sau yakat kuhrwi nuna dai.

¹⁹ “Ma mahni bayakwa kat wark muihni balna daninawan dai kidika laih kaina dai, dawak witingna karak yalahwi lalah kidika kulwi talna dai.

²⁰ Lalah dadasni 5,000 duna dai kidika muihni tatuna kiuna dai, dawak tanituna yakat aput kalyulwinah lalah dadasni 5,000 uk kalana dai: ‘Dakiwan man lawa lalah dadasni 5,000 yanaman dai dawak akat 5000 uk sakki win kalnayang dini kidika.’

²¹ Tanituna kidika yaklau kalyulna: ‘Yamni ki, man laih wark muihnni as yamni man; di dibindauh yakat yamni man dai kidika yulni, baisa di nuhni kidika tingma yakat akiki. Aiwa awa yang karak alasna awah.’

²² Usnit kat lalah dadasni 2,000 duna dai kidika muihni kiwi kana dai, dawak aput yulna: ‘Dawan, man lawa lalah 2,000 yanaman dai, dawak akat sakki lalah 2000 uk win alahwanayang dini kidika.’

²³ Tanituna kidika yaklau kalyulna: ‘Yamni palni ki, man laih wark muihni as yamniman; di dibindauh yakat yamniman dai kidika yulni, baisa di nuhni kidika tingma yakat aki ki. Aiwa awa yang karak alasna alahwah.’

²⁴ “Kaunah wark muihni lalah dadasni 1,000 duna dai kidika kiwi kana mani, tanituna yakat kalyulna: ‘Dawan, yang nuyang dai man laih muih al as dadasniman dai kidika, di dahtasman pani kaupak di minik yaktaman kidika dawak di minik ratasman pani kaupak anataman kidika.

²⁵ Kidika bahang yamadunayang dai, dawak lalahma kidika laih dutik yawik sau pasyakat malpamnayang dai. Kaunah man dima kidika laih akat sakki.’

²⁶ Tatuna kidika yaklau nangnitlana: ‘Man laih wark muihni as dutniman dawak bik baskiwahman, bahang yang di dahtasyang pani kaupak di minik yaktayang kat dawak di minik ratasyang pani kaupak di minik dulautayang kat,

²⁷ yang lalahki kidika laih bank yakat duta yawanam dai, dawak yang nawattik aiwik lalahki minit kau kilna kidika yaknik dai.’

²⁸ Dawak kidika yakat bangdai kidika muihni balna yakat diyulna: ‘Lalah dadasni 1,000 duwa kidika dakyaktanauh, dawak lalah 10,000 duwa muihni kidika yakat kalatanauh.

²⁹ Kat angdika muihni mahni duwa kidika laih minit yakat baisa lakwi kalana karang ki, dawak minit bayak duwa karang ki; kaunah dis muihni kidika laih, ais ampus duwa kat kidika bitik dakyakna karang ki.

³⁰ Dawak adika wark muihni di sip awas kidika laih, puksani yakat ruhmyaktanauh. Bahang kaput laih kaidinin lani dawak anani karksnin lani kidika kaiwarang ki.’ ,

Nesan balna lanina yamwarang kidika

³¹ “Muih Walanibis al kidika yaringni dawak innisal balna karak awaihdak kaiwarang mani kat, witing tronni yaksihni yakat yalahwarang ki.

³² Nesan muihni balna bitik laih witing muhnit yakat kalududuhwarang ki, dawak witing yaklau muih balna kidika dakwi yakwarang ki, sihm sīp maintalyang muihni kat sīp dawi kuts balna karak dakwi yakwa kapat.

³³ Sīp balna kidika laih tingnipal niningyakat lawarang ki dawak kuts balna kidika laih wadahni niningyakat lawarang ki.

³⁴ Dawak King laih tingnipal niningkauh bangkidika yakat diyulwaran: ‘Papangki yaklau blis manayamna kidika laih aiwanauh; Papang sau yamna mani kaupak manna saumana ridi yamna kidika dutanauh.

³⁵ Bahang yuhyang kat manna lawa di yabayahnamana dai; dikit buhni kat manna lawa dinin dini yanamana dai; ū disyang kat manna lawa ū yanamana dai.

³⁶ Asna disyang kat manna lawa asna yanamana dai; siknisyang kat manna lawa yawa yatalnamana dai; silak yakat tusyang kat manna lawa yawa yatalnamana dai.’

³⁷ Bahang barangni muihni balna kidika yaklau yulwi dakakana: ‘Dawan, ¿man mampat mani man yuhman kat di matining kat kasnamahn? ¿Kidik awas kat mampat mani man was dikih mawak matining kat dinamahn?

³⁸ ¿Kidik awas kat mampat mani man kidika ū disman kat ū manayangnah, dawak asna disman kat asna manayangnah?

³⁹ ¿Kidik awas kat mampat mani siknisman kat dawak silak yakat bik tusman kat yawik matalnayangnah?’

⁴⁰ King kidika yaklau nangnitnalana karang: ‘Barangni manayultayang yang wirahki balna miniknakunni akat ais yamnamana bitik kidika, yang akat yayamnamana.’

⁴¹ “Usnit kat king witing wadahni niningkauh bangkidika yakat diyulna karang: ‘Yang kaupak naikau alahwanauh, daunin yakat walnamana kidika; ban atnin kuhni muih alasni yulyang dawi innisal balna karak dinina ridi yamna kidika yakat yawanauh.

⁴² Bahang yang yuhyang kat manna di yabayahtasmana dai; was dikih yawakat was yatanangkat ditasyang dai;

⁴³ ū disyang kat ū yatasmana dai; asna disyang kat asna yatasmana dai; siknisyang kat dawak silak yakat bik tusyang kat yawa yatalasmana dai.’

⁴⁴ Bahang witingna yaklau nangnitlalana: ‘Dawan, ¿mampat mani yuh, was dikih, ū dis, asna dis, siknis, silak yakat tusman kat ilp matasyangna daih?’

⁴⁵ King kidika yaklau nangnitnalana karang: ‘Barangni manayultayang adika muihni miniknakunni balna akat ilp diatas danamana kidika laih, yang yakat bik ilp yatasdanamana.’

⁴⁶ Kidika muihni balna laih ban kaput dalani wauhnin yakat uina karang ki, dawak barangni muihni balna kidika laih ban kaput sangka atnin yakat uiwarang ki.”