Matyu 20 - Papang Yulni

Wark muihni balna yulnina malni yulni

¹ “Papang king kawa sauni kidika laih sihm yamak dawan as mapiris palni kalahwi wainni yamak yakat wark muihni balna yakat wark yamnin diawa kapat ki.

² Witingna karak yulbauwi talna warknina minit kidika ma kau lauwi diana atnin, dawak usnit kat wainni yamak yakat wark yamnin disihmukna.

³ Matunaknin manah awar tiaskauarungka kat watwi kalahwi talna, dawak muih kalududuhwa pāni yakat muih buas wark kalalahwas bangkat talna.

⁴ Diyulna: ‘Manna bik aiwa yang wainki yamak yakat wark alahwanauh, dawak mananik dini yamni kidika manaki.’ Dawak witingna laih uina dai.

⁵ Yamak dawan kidika laih matunak kat watwi kalahna, dawak ma ulahu kat watwi kalahwi ais yamna dai kat sihm kaput yamna dai.

⁶ Masan kat watwi muih kalududuhwa pāni yakat kiuna, dawak muih ūk dauh bangkat kalpakna. Diyulwi dakana: ‘¿Manna ais yamta akat dauh bangmanah wark as bik yamtas?’

⁷ Witingna yaklau nangnitlalana: ‘Kat muih as bik wark yamnin yanayulwas bahang.’ Bahang diyulna: ‘Manna bik yang wainki yamak yakat yawa wark alahwanauh.’

⁸ “Puklakna mani kat, yamak dawan kidika yaklau wark minit talyang muihni yakat kalyulna: ‘Wark muihni balna kidika yultang kat aiwa kat minitna lauta diatah, witni kakana balna kidika tatuna dawak tatuna kakana balna kidika laih witni yakat lauta diatah.’

⁹ Bahang wark muihni balna masan yakat kakana balna kidika tatuna uina dai, dawak witingna laih ma as yakat ampus duninna kidika kaput duduna dai.

¹⁰ Usnit kat, tatuna yakat kakana balna dai kidika uina mani kat, witingna laih baisa minit yakat duduwarang kapat kukulna dai; kaunah witingna laih ma as yakat ampus duninna kidika sihm kaput duduna dai.

¹¹ Witingna warknina minit kidika duduna mani kat, wark dawan niningyakat yaklauwi,

¹² aput yuyulna dai: ‘Adika balna witingna witni yakat ui'kawi, awar aslah wark kalalahna, dawak man laih yangna mapiris kaupak masan kat ma daihni kalbustik wark alahwik dunayangna kapat lauta dianaman.’

¹³ Kaunah wark dawan kidika yaklau kidika balna kaupak as yakat nangnitlana: ‘Yang karak kaltalyang yamni, yang man yakat la awas kidika mayamtasyang. ¿Ais yang karak yulbautasman dai katpah ma as warkni minit kidika?

¹⁴ Bahang man mamat kidika duta yawah. Witni yakat kawi wark kalahna kidika yakat sihm man manayang kaput kalanik yulki kat kalaki ki,

¹⁵ kat yang rahmki dutayang yang lalahki kidika ais yamna atnik kat. ¿Kidik awas kat tumnin lani dutamahn yang dalani lani dutayang kidika yulni?’

¹⁶ “Kaput bahang waradika witni yakat balna kidika laih, tatuna yakat yaklalawarang ki; dawak waradika tatuna yakat balna kidika laih, witni yakat yaklalawarang ki.”

Jisas yaklau wat bas yakat yulwi witing daunin yulni kidika

¹⁷ Jisas witing Jerusalén tani yakat kiwalik kauna disainipil balna 12 yakat ahni naikau diyulwak uiwa kat diyulna:

¹⁸ —Manna waradika talnama mayang Jerusalén yakat mawi, kidika yakat muih Walanibis al kidika laih sumalyang balna taninatuna dawak lā sumalyang balna kidika tingnina yakat bukwakat daunin yakat wirlalawarang ki

¹⁹ dawak sau ūk muihni balna tingnina yakat ahawa kat dutni kalyulwi niningkakari, dalani kalawi dawak pan prihni yakat ilwi papawarang ki; kaunah ma bas yakat laih yaklauwarang ki.

Jims dawak Jan nanangni dukih kalawa kat yulna kidika

²⁰ Sibidi walanibis balna nanangni kidika, walanibis balna karak, Jisas yaihnit yakat kiwi witing muhnit yakat limbabahwi kalni dinit bukwi kalyulna.

²¹ Jisas yaklau kalyulwi dakana: —¿Ais dukih mawih? Yal kidika yaklau kalyulna: —Man king āwaman kidika sauni yakat paktang kat yang walakibis balna kidika tingmapal niningyakat as dawak wadahma niningyakat as yalalahwang.

²² Jisas yaklau nangnitlana: —Manna laih baisa amanglatasmana ais yultamana kidika. ¿Manna sip ditanamayah yang wasni tapahlni diki kidika? Witingna yaklau yuyulna: —Sip yangna.

²³ Jisas yaklau nangnitnalana: —Manna adika wasni tapalhni kidika ditanama ki, kaunah yang tingkipal kidik awas kat wadahki yakat yalahnin kidika laih yang lawik mananik dini awas ki, kaunah angdika muihni balna yakat yang Papangki yaklau dianin ridi yamna kidika balna yakat manah diawarang ki.

²⁴ Disaipil ūk salap balna kidika dakakana mani kat, kalwirah bu kidika balna yakat kulninna daukakalna dai.

²⁵ Kaunah Jisas yaklau diyulwak uiwak diyulna: —Manna yamni amanglatamana, Papang yakat kukulwas muihni balna pasyakat laih tatuna balna kidika dutni kabamint kakawa kidika witingna dinina yamyang tatuna balna yakat, dawak tunan nunuhni balna kidika laih witingna parasnina kidika ūk balna minitna yakat ditataihwi.

²⁶ Kaunah manna pasmangna yakat laih kaput atnin awas ki. Kaunah nawat kauh, angdika muihni manna pasmangna yakat nuhni atnin kulwa muihni kidika laih, muih ūk balna yakat dinina yamna atnin ki;

²⁷ dawak angdika muihni manna pasmangna yakat tatuna atnin kulwa kidika laih, manna dimana yamyang atnin ki.

²⁸ Kat, sihm kaput bik, muih Walanibis al kidika laih witing yakat dini yamwi kalana atnin yulni kaiwas ki, kaunah witing yaklau yamwi diana atnin dawak bik muih mahni pri lani dianin kidika witing sangnika kau minitlauna kaina.

Jisas yaklau muih bu miniknapa dis kat miniknapa diana

²⁹ Witingna Jericó kaupak kalalahna mani kat, muih mahni palni Jisas yakat usnit uhuina dai.

³⁰ Muih bu miniknapa dis ta kung yakat yalahna raudai kidika, witingna dakakawa kat Jisas kidika bayakwi kiwa kat, parasni sarahwi yuyulna: —¡Dawan, Devid Walanibis, yangna yakat miknakun yanatalah!

³¹ Muih balna kidika laih dibibilwadai ap dana atninna, kaunah baisa parasni sararahwadai. —¡Dawan, Devid Walanibis, yangna yakat miniknakun yanatalah!

³² Bahang Jisas laih watwi muih miniknapa dis muihni balna yakat diyulwak uiwakat diyulwi dakana: —¿Manna yulmana ais yamna atnik kidika dukih manawih?

³³ Witingna yaklau nangnitlalana: —Dawan, miknapa kidika wattik dukih yanawi.

³⁴ Jisas witingna yakat miniknakun ditalwi miniknapa yakat sukna dai. Kidika minitni yakat miniknapa di tatalwas muihni balna dai kidika laih watwi miniknapa duwi Jisas usnit uhuina dai.