Matyu 2 - Papang Yulni

Sins duyang balna ma kilwa niningkaupak aina kidika

¹ Jisas laih Judea sauni Betlehem yakat batahnna dai, king Herod mani balna yakat. Kidika mani balna yakat sins duyang balna ma kilwa niningkaupak Jerusalén yakat ui'kakana dai, witingna laih yala balna kidika yakat lakwi tatalwadai,

² dawak yulwi dakakana: —¿Angkat sakyah Ju balna kingnina batahndana kidika? Bahang witing yalani kidika kalahwak talnayangna, dawak yangna aiwayangna witing ayangni tanit nuhni kidika yamna atnin.

³ King Herod laih adika yulni dakawi witing yama duna dai, dawak Jerusalén muihni balna bik sihm yamaduduna dai.

⁴ King Herod yaklau sumalyang balna taninatuna balna kidika bitik dawak lā ulyang balna kidika bik diyulwak uiwakat diyulwi dakana dai Mesías kidika angkat batahndanin dai pa.

⁵ Witingna yaklau diyuyulna: —Judea sauni Betlehem yakat; kat prapit kidika yaklau kaput ulna:

⁶ ‘Judá sauni, Betlehem man namangkauh laih, dibindauh palni awasman kidika sauni tawanni nunuhni balna kidika pasyakat; kat man kaupak kabamint kayang as kalahwarang ki yang tawanki Israel tanituna kawarang kidika.’

⁷ Bahang king Herod yaklau sins duyang balna yakat malni kau diyulwakat uina dai, dawak witingna kaupak amanglalana dai mampus palni yakat yala kalahna dai kidika.

⁸ Usnit kat Betlehem yakat disihwi aput diyulna dai: —Manna kidika pāni yakat yawa muihbin kidika walta talnauh; yaktamana kat isingpaktanama, yang bik yawik witing ayangni tanit nuhni yamna atnik.

⁹ Sins duyang balna kidika laih king yulni balna kidika karak dakawi uina dai. Dawak yala kalahwakat tatalna dai kidika witingna tanitna yakat kiuna dai, witni kat muihbin tusdai kidika minit yakat kiwi watna dai.

¹⁰ Sins duyang balna yala kidika tatalna mani kat alasna palni kalalahna dai.

¹¹ Usnit kat ū pasyakat kakana kat, muihbin kidika nanangni Mery duwa sak kat tatalna dai; dawak limbabahwi ayangni tanit nuhni yayamna dai. Baksnina kidika apahwi gol, busnin dini walapni dawak pan yani walapni kidika kalalana dai.

¹² Usnit kat, Papang yaklau amana kau diyulna witing watwi king Herod sakdai yakat uinin awas, bahang witingna ta ūk duwi saunina yakat nawatwi uina dai.

Egipto yakat kikirana kidika

¹³ Sins duyang balna kidika uman uina mani kat, Dawan innisal as aminin kau kalkalahna dai José yakat, dawak aput kalyulna: “Lauwa muihbin kidika dawak nanangni kidika duta Egipto yakat irah. Kidika yakat watta sakawama angkat mani yang lawik ismangpakki kat, kat Herod laih muihbin kidika īnin walwarang ki.”

¹⁴ José laih yaklauwi, muihbin kidika dawak nanangni kidika kauna duwi pukta kalahwi uina dai Egipto kiwa tani munah,

¹⁵ kidika pāni yakat watna raudai Herod dauna mani kat. Adika dini kalahna dai Dawan yaklau prapit munah yulna dai kidika kaput kalahna atnin yulni: “Yang Walakibis kidika Egipto kaupak kalyultingkat kaina.”

Herod laih walabis ahal balna kidika īnin sihna

¹⁶ Herod witing amanglawak sins duyang balna kidika alas kalyuyulna kat, kulnin daukalwi muih sihna dai Betlehem dawak yaihnit balna yakat walabis ahal kurih bu dinitkauh duduwa balna yalalahwadai kidika bitik imukna atnin, sins duyang balna yaklau ma awi diyuyulna dai kidika kaput.

¹⁷ Kaput kalahna dai prapit Jeremías yaklau ulna dai kidika kaput:

¹⁸ “Ramá yakat yulni as yulna dai, kaidinin dalani dawak kaidinin nuhni. Kidika laih Raquel kaidadai walanibis balna yulnina dawak walaniānin yulwasdai kat uman dadauna dai bahang.”

¹⁹ Kaunah Herod dauna usnit kat, Egipto yakat Dawan innisal as aminin kau José yakat kalahwi aput kalyulna:

²⁰ “Lauwa muihbin kidika dawak nanangni kidika bik duta Israel sauni yakat nawatta yawah, kat muihbin yakat īnin wawalwadai kidika balna laih uman dadauna.”

²¹ Bahang José laih yaklauwi muihbin kidika dawak nanangni kidika kauna duwi Israel yakat duwi kiuna dai.

²² Kaunah dakawakat Herod walanibis Arquelao kidika Judea sauni yakat kabamint kawa sakkat, papangni pāni yakat, kidika pāni yakat kiunin yamaduna dai; dawak Papang yaklau amana kau kalyulwakat, Galilea sauni yakauh kiuna dai.

²³ Kidika yakat kiwi kana mani kat, Nazaret tawanni yakat kiwi yalahna dai. Adika dini balna kalahna dai prapit balna yul yuyulna dai kidika kaput kalahna atnin yulni: Jisas laih Nazaret muihni pakna atnin dai kidika.