Mark 7 - Papang Yulni

Muih maisihni kalwa kidika

¹ Fariseo muihni balna kidika laih Jerusalén kaupak lā sumalniyang balna buas uina kat kidika balna karak kalpakwi Jisas yaihnit yakat uina.

² Witingna laih, Jisas disainipil balna buas tingnina maisihni yakauna di kakaswakat, yuldarang kat tingnina susuhwas, niningnakauh yuyulna.

³ (Kat fariseo muihni balna dawak Ju balna kidika laih muihnina bararak balna lanina kidika ban tanitna yakat laihwi duwi uiwi, ting suhwas tanitkauh laih di kasnin awas.

⁴ Dawak di bakakanwa pāni kaupak nawatwi aiwa kat, tingnina suhwas laih di kakaswas dai. Dawak baisa lanina satuk balna bik duduwi sutak balna suhnin, sau kau sutak balna yayamna kidika, suba balna kidika dawak krikri balna kidika suhna atnin.)

⁵ Kidika yulni fariseo muihni balna dawak lā sumalniyang balna bik yaklau kalyulwi dakakana: —¿Ais yulni disaimapil balna kidika muihkina bararak balna lanina kidika kaput yayamwasyah, kaunah tingnina maisihni yakauna di kakaswih?

⁶ Jisas yaklau nangnitnalana: —Prapit Isaías yamni yulna manna sins dis mana kidika yulni, aput ulna kidika: ‘Adika tawanni laih tinipas kaumanah riskipik lani yawi, kaunah isning laih yang kaupaknai kau ki.

⁷ Yang yakat prias yamwarang bikdauhmanah ki: witingna sumamalwa kidika laihmuih lanimanah ki.’

⁸ Kat manna laih Papang lani kidika datamana muih balna lanina yakat usnit uina atnin.

⁹ Aput bik diyulna: —Manna lamana kidika ban duna atnin yulni, Papang lani kaupak makau bayaktamana.

¹⁰ Bahang Moses yaklau yulna: ‘Papangma dawak nanangma yakat risninapik lani diatah’, dawak ‘Wais kat papangni yakat dawak nanangni yakat bik la kaltuhwarangkat, daunin yakat wirlana karang.’

¹¹ Kaunah manna laih yultamana muih as kidika papangni kidika awas kat nanangni yakat aput kalyulnin sipki timana: ‘Yang sip ilp matasyang, kat di balna dutayang kidika laih korban’ (yuldarang kat: “Papang yakat kalanik dini”);

¹² dawak aput bik yultamana angdika muihni aput yulna laih papangni yakat dawak nanangni yakat bik ilp kalanin sip awaski.

¹³ Aput karak manna lawa Papang lāni kidika dispamtamana kidika lani balna biri duta. Dawak di ūk balna mahni yamtamana sihm kapapat.

¹⁴ Usnit kat Jisas yaklau muih balna yakat diyulwak uiwakat, aput diyulna: —Manna bitik yadakanauh, dawak amanglatanauh:

¹⁵ Di as bik ahni yakaupak kāwa kidika yaklau muih al yakat maisihni yamwas karang ki. Muih al isning kaupak kalahwa kidika ki maisihni yamwa kidika.

¹⁷ Jisas yaklau muih balna kidika damukwi ū pasyak kana kat, disainipil balna yaklauwi kidika sumalna yulni kidika kalyulwi dakakana dai.

¹⁸ Witing yaklau diyulna: —¿Kaput bahang manna kat bik amanglatasmanah? ¿Manna amanglatasmanah ahni kaupak di kāwa kidika laih muih al yakat maisihni yamwas kidika,

¹⁹ kat isning yakat kawas, bani yakauh kāwa kidika, kidika usnit kat muihninuh munah kalahna atnin? Jisas witing aput yulnin dukih kalana dai, di kasnin dini balna kidika bitik laih maisihni diski.

²⁰ Aput bik yulna dai: —Muih al kaupak kalahwa kidika laih, rahm maisihni kalyamwi.

²¹ Kat paskaupak, yuldarang kat, muih ahal balna isningna kaupak, kulnin lani dudutni balna, la munah kalpayayahwas kidika, malnin lani balna, īnin lani balna,

²² marid lani bahnin, tumnin lani, alas kalyulnin, di suhl atnin, muih yulnibauwi karinin, witing manah kapat kaldakanin, dawak la kat awas lani kidika balna kalalahwi.

²³ Adika dini dudutni balna bitik kidika paskaupak kalahwi dawak muih yakat maisihni yamwi.

Sau ūk muihni as Jisas yakat rahm kalkulna kidika

²⁴ Kidika kaupak Jisas witing Tiro sauni yakat kiunadai. Ū as kau kana, muih as bik amanglanin awas kulna; kaunah witing sip yakmaldas dai.

²⁵ Sirihni palni siraubin as spirit dutni duwadai kidika nanangni Jisas yulni dakana dai, kidika yalni kiwi Jisas kalni yakat limbabahna dai.

²⁶ Yal kidika laih sau ūk kaupak dai, sirofenicia kaupak. Bahang kiwi Jisas yakat kalni dinit bukna walanibis yal muihni kaupak sitan kidika kangwi yakna atnin.

²⁷ Kaunah Jisas yaklau kalyulna: —Datang walabis balna kidika tatuna kakaswang, kat yamni awaski walabis balna kasninna kidika dakyakwi sul balna yakat dianin.

²⁸ Yal kidika yaklau nangnitlana: —Agha, Dawan, kaunah sul balna kat bik tibil dinityakat walabis balna di kaswi sutni dadawak bubukwa kidika kakaswi.

²⁹ Jisas yaklau kalyulna: —Yamni yulnaman; yawanam sipki. Sitan kidika laih walamabis yal muihni kaupak uman kalahna.

³⁰ Muih yal kidika ūni yakat kiwi kana mani kat, yalbin kidika laih krikri yakat tusdai, kaunah sitan kidika laih witing kaupak uman kalahwi kiunadai.

Jisas yaklau muih as tapani pukna, dawak tubi muihni as yamni kalyamna kidika

³¹ Jisas laih watwi Tiro sauni kaupak kalahwi Sidón munah dawak Decápolis sauni tawanni balna munah bayakwi kiwi, Galilea lakunni yakat kiwi kanadai.

³² Kidika pāni yakat tapani pukna dawak tūni bik yulbauwas muihni as uiwi kalalana dai, dawak witing minityakat tingni dulauna atnin kalyuyulna dai.

³³ Jisas yaklau pirini yakat duwi kiuna, muih bangkidika kaupak, dawak tapani pasyakat tingni kau urh-āna, dawak susuih tuhwi tuni yakat laihna.

³⁴ Usnit kat, kisang yakat talwi, wingnita puhwi, muih al yakat kalyulna: “¡Efata!” (yuldarangkat: “¡Apahtah!”)

³⁵ Kidika minitni yakat, muih tapani pukna dai kidika ahlna dai, dawak tūni kidika bik yamni kalwakat yamni yulbauna dai.

³⁶ Jisas yaklau diyulna dai, muih as kau bik yulnin awaski; witingna yakat kaput diyulwak, baisa tanit muih kau yuyulna.

³⁷ Yamni palni talwi aput yuyulwadai: “Di bitik laih yamni yamwi. ¡Tapanina pukna balna kidika dawak yulbabauwas muihni balna kidika bik sip diyamwakat yulbabauwi!”