Mark 16 - Papang Yulni

Jisas watwi yaklauna kidika

¹ Yakurupdinin mani bayakna usnit kat, Mery Makdalen, Jims nanangni Mery dawak Salomé kauna kalpakwi kahnin dini walapni as bakakanna dai Jisas muihni nuhni kidika kahna atnin.

² Dawak sandi walsah ma tatuna yakat sau ū yakat pukkau uina dai,

³ biri biri aput yulwi dakawinah: —¿Sau ū pāni kungmak kau kipala sakkidika wais yakwi mayawarangyah?

⁴ Kaunah tatalwakat, sau ū pāni kungmak yakat kipala nuhni as taihna sakdai kidika pāni yakat sak-awasdai.

⁵ Sau ū pasyakat kakana kat, tingpal niningyakat muih al wahma as prak pihni kawi yalahna sakkat tatalna dai. Muih yayal balna kidika laih muihsakdadauna dai,

⁶ kaunah witing yaklau diyulna: —Manna muihsak dadauwinih. Manna laih Jisas Nazaret kaupak kidika waltamana, pan prihni yakat ilwi papana kidika. Watwi yaklauna; kaunah akat diski. Ahana dai kidika pāni yakat talnauh.

⁷ Manna yawa disainipil balna yakat diyultanauh, dawak Pita yakat laih kalyultanama: ‘Witing laih tatuna Galilea yakat kiwarang ki manna karak dawakat; kidika yakat kaltalnama, witing yaklau amput yulna dai kidika kaput.’

⁸ Bahang yayal balna kidika laih sau ū kaupak kalahwi kikirana, dawak muihsakdauwi diyukna dai. Dawak muih as kau bik yul yuyulwas dai kat yamaduduwadai kidika yulni.

Jisas Mery Makdalin yakat kalkalahna kidika

⁹ [Sandi walsah ma tatuna yakat Jisas watwi yaklauna usnit kat, Mery Makdalen sitan tiaskaubu kangwi yakna dai kidika yakat tatuna kalkalahna dai.

¹⁰ Yal kidika kiwi Jisas karak kalpakwi bang-atna dai kidika muihni kulninna bukwakat kaidabangdai kidika balna yakat diyulna dai.

¹¹ Kidika muihni balna witingna dakakawakat Jisas laih sangka kat, dawak yal kidika bik talnayang takat, rahm kukulwas dai.

Jisas disainipil balna bu yakat kalahna kidika

¹² Kidika usnit kat, Jisas watwi satuk kalahna dai disainipil balna bu di dahnin pāni niningyakat yakat lapakwi uiwa tulukat.

¹³ Adika balna laih uiwi ūk balna yakat diyuyulna dai; kaunah witingna yakat bik rahm dikukulwasdai.

Jisas yaklau apostel balna yakat yamnin diyulna kidika

¹⁴ Kidika usnit kat, Jisas laih disainipil balna 11 kidika tibil yakat yalahna bangkat kalahna dai. Dibilna dai rahm kulnin lani dis dawak tunanina dadasni kidika yulni, kat watwi yaklauna kidika muih balna talwi diyuyulwakat rahm kukulwas dai bahang.

¹⁵ Dawak aput diyulna: “Manna sau bitik yakat yawa muih balna bitik yakat diyultanauh laihwi yaknin yulni kidika.

¹⁶ Angdika muihni rahm kulwi was kal-utuhwi kalahwarang kidika laih, kallaihwi yakwarangki; kaunah angdika muihni rahm kulwas kidika laih, dauna karang.

¹⁷ Dawak adika sainni balna witingna karak karang rahm kukulwarang muihni balna kidika: yang ayangki kau duwi sitan balna kangwi yayakwarang; yulni wisamni yuyulwarang;

¹⁸ bil balna kidika yakat tingnina kau lalaihwarang; dawak di dutni didiwarang bik, dutni diyamwas karang; baisa kidika minityakat siknis muihni balna kidika minitna yakat tingnina dulalauwa kat sikninanis kaupak yamni diyamna karang.”

Jisas kisang yakat kilwi kiuna kidika

¹⁹ Yuldibauna usnit kat, Dawan Jisas kidika laih makau kisang yakat kilwi kiwi Papang tingnipal niningyakat yalahna.

²⁰ Witingna laih kalahwi yul kidika pa balna bitik yakat yuyulna; dawak Dawan yaklau ilp diawadai, dawak yul kidika rahm yulwadai taldas sainni balna karak libitwi.]