Mark 12 - Papang Yulni

Muih dudutni balna wark yayamna yulni malni yulni

¹ Jisas laih malni yulni kau yuldibauna dai. Aput diyulna: “Muih al as wain yanimak yamna dawi daklana; dawak wain wasni yamnin pāni bik yamna, dawak makau kilwi talnin pāni bik yamna. Dawak kidika usnit kat di dahyang balna yakat wayaki diawi pa ūk kau kiuna.

² Mani kiwi kawakat, witing dini yamyang muihni as sihna dai wark kalahyang muihni balna yakat diyulwakat, wain minik balna witing yakat kalanin dini balna dai kidika kalsihna atninna.

³ Kaunah witingna laih sau dawan dini yamyang yakat laihwi babauna dawak tingmānah nawatwi sisihwak kiunadai.

⁴ Bahang sau dawan kidika yaklau dini yamyang ūk sihwakat kiuna, kaunah kidika yakat laih tunani yakat bahrwi dakwi dutni kalyayamna dai.

⁵ Dini yamyang ūk sihna, dawakat kidika yakat laih ipapamna dai. Usnit kat ūk balna mahni yakwi sihna; dawak buas kidika yakat laih dalani diayana dawak buas balna kidika yakat laih imumukna dai.

⁶ “Baisa aslah watwadai: kidika laih witing walanibis al dalani palni kaltalwa kidika dai. Witni kat kidika yakwi sihna, aput kulwinah: ‘Witingna laih amanglawi, yang walakibis yakat rispik kalyayamwarang ki.’

⁷ Kaunah wark yamyang muihni balna kidika laih biri biri yulwi dakakana: ‘Adika kuduh dipahni duwarang muihni kidika; ipamdanang, dawak sau adika laih mayang madiki kalwarang ki.’

⁸ Kaput bahang laihwi ipapamna dawak muihninuh kidika laih wain yamak paskaupak ahni naikau ruhmpapamna dai.

⁹ “¿Dawak manna ais kultamanah wain yamak kidika witing didawan kalwarang timanah? Bahang kiwi wark kalahyang muihni balna yakat imukwarang ki, dawak wain yamak kidika laih muih ūk balna yakat diawarang ki.

¹⁰ “¿Manna ulna kidika yulta talasmanah? Aput yulwi: ‘Ū yamyang balna kipala ruhmwidadana kidika laih kipala nuhni as kalna ki.

¹¹ Adika laih Dawan yaklau yamna, dawak di taldas dini talnamayang.’ ”

¹² Bahang witingna laih Jisas yakat inin yayamna, kat adika malni yulni kidika laih witingna niningna yakat yulna dai kidika yulni. Kaunah muih balna yakat yamanina duduwadai bahang, dapamwi uina dai.

Tunan minit daknin yulni kidika

¹³ Fariseo muihni balna buas dawak Herod surniyal balna karak banawi Jisas yakat sisihna dai, kaput yayamwak ais yulwakat yulni yakna atninna.

¹⁴ Adika muihni balna uiwi aput kalyuyulna: —Sumalyang, yangna amanglatayangna man laih yul rahm yultaman kidika, muih balna yuyulwa kidika yakat laih dakas, kat man laih muih muhni kidika yakat tala la kidika yamtasman. Man laih Papang yaklau amput yalahnin yulwa kidika kaput rahm sumaltaman. ¿Tunan minit Roma kingni dini dadakwa kidika minit launikna sipyah kidik awaskat sip-awasyah? ¿Minit launikna karangyah kidik awaskat minit lautas atniknayah?

¹⁵ Kaunah Jisas laih witingna sinsnina dis kidika amanglawadai, bahang aput diyulna: —¿Ais yamta manna yang takipas yakat yalaihnin dini kidika ānin kultamanah? Lalah dadasni as duaita yatanang talkuh.

¹⁶ Uiwi kalalana dawak Jisas yaklau diyulna: —¿Adika wais muhni yah dawak ulna kidika laih wais ayangni yah? Nangnitlalana: —King dini.

¹⁷ Bahang Jisas yaklau diyulna: —Bahang king nuhni dini kidika kalatanauh dawak Papang dini kidika Papang yakat kalatanauh. Dawak biriwi diyulwa kidika yamni dakakana dai.

Watwi yaklaunin yulni yakat yulwi dakanin kidika

¹⁸ Bahang saduceos muihni balna buas Jisas yakat uiwi kaltatalna dai. Adika muihni balna laih muih dadauna kidika watwi yaklalauwaski atwadai; kidika bahang adika yulni kalyulwi dakakana dai:

¹⁹ —Sumalyang, Moses yaklau aput ulwi dana muih al as yal duwi yalni karak walanibis as bik dis dauwarang kat, dauna muihni wirahni al kidika yaklau yal tingmak yakat dunin sipki, wirahni al dauna kidika yakat walanibis kalana atnin.

²⁰ Kaput bahang, wat as kat kalwirah ahal tiaskaubu dai, tatuna kidika laih yal duna, kaunah walanibis dis dauna.

²¹ Bahang usnit kidika laih yal tingmak kidika karak kalduduna, kaunah witing bik walanibis dis dauna. Bās kidika bik sihm kaput kalkalahna,

²² dawak bitik kau kapat dikalahna; kaunah as bik walaninabis yayakwasdai. Witni kat yal kidika bik dauna dai.

²³ Kaput bahang, watwi yaklauwi yalalahwarang mani kat, ¿adika yalni laih kidika ahal balna kaupak angdika yalni karangyah, witingna tiaskaubu pak yal kidika karak kalduduna dai kat?

²⁴ Jisas yaklau nangnitnalana: —Manna laih dutni yul kultamana, kat ulna balna kidika dawak Papang parasni kidika bik amanglatasmana bahang.

²⁵ Muih dadauna balna kidika watwi yaklalauwarang mani kat, muih ahal balna dawak yayal balna kidika laih watwi kalduduwas karangki, bahang witingna laih sihm kisang kau insal balna bangkidika kapat karangki.

²⁶ Dawak muih dadauna balna watwi yaklalauwa yulni kidika niningkauh laih, ¿manna Moses wauhnitaya yakat baisa yulta talasmanah kuh dahlwa yulni kidika? Papang yaklau Moses yakat kalyulna: ‘Yang kuduh Abraham, Isaac dawak Jacob Papangnina.’

²⁷ ¡Dawak Papang laih muih dadauna balna Papangnina awaski, kaunah muih sangka balna Papangnina! Kaput bahang manna laih uba palni dutni yul kultamana.

La as baisa nuhni kalkulna kidika

²⁸ Jisas yaklau yamni diyulwakat dakakana mani kat, kalmuhwi yuyulwakat la sumalniyang as dakana dai kidika yaklau, Jisas yaihnit yakat kiwi kalyulwi dakana: —¿La balna bitik pasyakat angdika kauh baisa nuhni kalkulnayah?

²⁹ Jisas yaklau nangnitlana: —La balna bitik pasyakat tatuna kidika laih adika ki: ‘Dakah, Israel: mayang maPapangki laih aslah Dawan kamanah ki.

³⁰ Man Papangma Dawan yakat dalani kaltalah ismang bitik, sangmaka bitik, sinsma bitik dawak parasma balna bitik kau bik.’

³¹ Dawak usnit kidika laih adika ki: ‘Man wanaihma yakat dalani kaltalah sihm man muihma kapat.’ La as bik nuhni kalkulna diski adika balna karak dawakat.

³² La sumalniyang kidika yaklau kalyulna: —Yamni palni ki, Sumalyang. Man yultaman kidika rahmki: Papang aslah ki, dawak witing kaupak ūk diski.

³³ Dawak Papang yakat isning bitik, sinsni balna bitik dawak parasni balna bitik dalani talnin kidika dawak wanaihni yakat sihm witing muihni kapat dalani talnin kidika balna kauh nunuhni ki, sakripais karauni kauna buswa kidika, dawak sakripais busnin pāni yakat sakripais buswa balna bitik karak.

³⁴ Jisas witing talwakat la sumalniyang kidika sinsni lani yamni karak nangnitlawakat, Jisas yaklau aput kalyulna: —Man laih Papang king kāwa sauni kaupak naikau awasman. Dawak muih as bik baisa yulwi dakanin yulni kalyulwi dakakawasdai.

¿Mesías kidika wais sulani kaupak kaiwi kalahwih?

³⁵ Jisas laih makat yulnin ūni yakat sumalwa sakkauna, aput yulwi dakana: —¿Ais yulni la sumalniyang balna kidika yaklau Mesías kidika Devid sulani kaupak kaiwi kalahwi atwih?

³⁶ Bahang Devid witing palni Spirit Holi yaklau yulkalbauwakat, aput yulna: ‘Dawan yaklau yang akat yayulna: Tingkipal niningyakat yalahtah, mampat mani yang lawik man namangkauhyaklalauwa balna kidika kalma dinityakat āki mani kat.’

³⁷ ¿Kaunah amput Mesías kidika Devid sulani kaupak kaiwi kalahwarang yah, Devid witing palni Dawan kalyulwih? Muih balna mahni dai kidika, Jisas sumalwa yakat isningnalak dakakawadai.

Jisas yaklau la sumalniyang balna yakat yulnina yakna kidika

³⁸ Jisas sumalwa yakat aput yulwadai: “La sumalniyang balna yakat amungtalnauh, bahang witingna laih prak nanaini kawi muih kalududuhwa pāni balna yakat tulu tulu kat muih ūk balna yaklau rispik lani karuk diparasna atnin kidika dukih diawi.

³⁹ Witingna laih Papang yulni sumamalwa ūni balna yakat rispik sinini balna kidika yakat yalahnin wawalwi dawak kasnin dini yayamni balna kidika bik wawalwi;

⁴⁰ dawak muih yayal tingmak balna ūnina kidika dakyayakwi, dawak sihm witingna yayamwas kapat makat yulnin kidika naini yuyulwi. Witingna laih wah nuhni kidika duduna karang.”

Tingmak yal minikunni minitdis kalanin dini āna kidika

⁴¹ Wat as kat Jisas witing minitdis kalanin dini ānin baksni balna kidika muhnityakat yalahna talwasakdai, kidika baks balna yakat muih balna yaklau amput lalah ahawadai kidika. Di duyang muihni balna mahni kidika laih lalah mahni ahawadai.

⁴² Kidika minitni yakat tingmak yal minikunni as kiunadai, dawak baks balna kidika kaupak as yakat bras lalahni dadasni binina bu āna dai, kidika lalahni laih dibindauh palni kalkulna dai.

⁴³ Bahang Jisas yaklau disainipil balna yakat diyulwakat aiwak, aput diyulna: —Barangni manayultayang tingmak yal minikunni adika kauh nuhni āna, muih ūk balna baks yakat lalah ahawa kidika karak dawakat;

⁴⁴ Bahang witingna bitik kau laih lalah mahni minittang bayak duduwa yakaupak ahawi, kaunah yal adika laih minikunni pasyakat, witing kaswi sangka atnin dini duwadai kidika bitik palni āna.