Mark 10 - Papang Yulni

Jisas yaklau marid kaldakwi kalahnin lani sumalna kidika

¹ Jisas laih Capernaum kaupak kalahwi Judea sauni yakat dawak Jordán kaupak ma kilwa niningkauh sau pakkidika yakat bik kiunadai. Kidika pāni yakat watwi muih balna kidika kalududuhna, dawak witing laih nining sumalwadai kaput sumalna dai.

² Fariseo muihni balna buas Jisas yaihnit yakat uina dawak, dutni as kalyamna atnin yulni, kalyulwi dakakana marid al kidika yalni kaupak dakwi kalahnin sippa.

³ Witing yaklau nangnitnalana: —¿Moses yaklau ais yamnin manayulnayah?

⁴ Yuyulna: —Moses yaklau yulna muih al kidika yalni kaupak dakwi kalahnin sipki dakwi kalahna wauhnitaya as kalawi.

⁵ Bahang Jisas yaklau diyulna: —Moses yaklau kidika yamnin manayulna kat manna laih tunamana dadasni kidika yulni.

⁶ Kaunah tatuna kaupak di balna yamna kidika yakat, ‘Papang yaklau muih al dawak muih yal yamna dai.

⁷ Kidika yulni muih al kidika papangni dawak nanangni dawarangki yalni karak kalduna atnin yulni,

⁸ dawak witingna bu kidika laih sihm muih aslah kapat kalwarang ki.’ Kaput bahang waralaih muih bu awaski kaunah muih aslah.

⁹ Kaput bahang muih al kidika yaklau dakwi kalahnin sip-awaski Papang yaklau libitna kidika kaupak.

¹⁰ Uman ū yakat bangkat, disaipil balna yaklau watwi kidika yulni Jisas yakat kalyulwi dakakana dai.

¹¹ Jisas yaklau diyulna: —Angdika muihni kat yalni kaupak dakwi kalahwi yal ūk duwarang kat, yalni tatuna kidika niningyakat marid lani bahwi;

¹² dawak yal kidika yaklau alni kaupak dakwi kalahwi al ūk duwarang kat, kidika sihm marid lani bahwi.

Jisas yaklau muihbinina yakat blis diyamna kidika

¹³ Muihbinina buas Jisas yakat duwi uina, dilaihna atnin yulni; kaunah disaipil balna yaklau duwi uiwa muihni balna yakat dibibilna dai.

¹⁴ Jisas kidika talwi kulnin daukalwi aput diyulna: —Datanangkat muihbinina kidika yang yakat aiwang, dawak nawatta sihmumukwinih, kat Papang king kāwi sauni kidika laih sihm witingna kapapat balna kidika dinina.

¹⁵ Barangni manayultayang angdika muihni kat Papang king kāwi sauni kidika yakat muihbin kapat kaldakawi duwas karang laih, kidika yakat kawas karangki.

¹⁶ Dawak tingni balna kau muihbinina kidika dulauwi duna, dawak witingna minitna yakat tingni dulauwi blis diyamna dai.

Muih al di duyang as Jisas karak yulbauna kidika

¹⁷ Jisas witing uman kalahwi kiwarang sakkat, muih al as kiri kiwi witing muhnit yakat limbabahwi kalyulwi dakana: —Sumalyang yamni, ¿yang ais yamtik sangka ban kaput atnin lani kidika dukiyah?

¹⁸ Jisas yaklau nangnitlana: —¿Ais yulni yamni yatimahn? Yamni kidika laih aslah ki: Papang manah.

¹⁹ Man laih la balna kidika uman amanglatamana: ‘Muih īwinih, marid lani bahwinih, di malwinih, muih alasni yulwinih dawak bik muih yakat alas kalyulwinih; papangma dawak nanangma yakat rispik lani diatah’

²⁰ Muih al kidika yaklau kalyulna: —Sumalyang, adika balna bitik kidika wahma yang kaupak kaput laihtik yamnayang.

²¹ Jisas yaklau dalani kaltalwi, nangnitlana: —Baisa di aslah yamtasman: yawa ais dutaman balna kidika bitik bakanmukta muih miniknakunni balna yakat diatah. Kaput laih kisang yakat ritsma duma. Usnit kat aiwa uskit uitah.

²² Muih al kidika laih kidika dakawi kulwi kalbauna; dawak kulnin bukwak kiuna, kat di duyang dai bahang.

²³ Bahang Jisas laih yaihnit balna yakat, disainipil balna yakat diyulna: —¡Ampus dadasni karangyah di duyang balna kidika Papang king kāwa sauni yakat kana atninna!

²⁴ Adika yulni balna laih disaipil balna amanglawas dadanadai, kaunah Jisas yaklau watwi diyulna: —Walakibis balna, ¡Ampus dadasniyah Papang king kāwa sauni yakat kana atnin!

²⁵ Kiamil niningyakat laih baisa īsi ki silip minikpa munah kawi bayakna atnin, muih di duyang as Papang king kāwa sauni yakat kanin karak dawakat.

²⁶ Disaipil balna laih kidika dakawi baisa amanglawas dadanadai, dawak biri biri yulwi dakakana: —¿Dawak wais sip karangyah laihwi yaknin lani kidika duna atnin?

²⁷ Jisas yaklau ditalwi nangnitnalana: —Muih ahal balna niningna yakat laih dadasni ki, kaunah Papang niningyakat laih dadasni awaski, kat witing niningyakat laih di as bik dadasni diski.

²⁸ Pita yaklau kalyulna: —Yangna laih di dutayangna dai kidika bitik damuktik, man usmat uinayangna.

²⁹ Jisas yaklau nangnitlana: —Barangni manayultayang angdika muihni kat yang dawak laihwi yaknin yulni kidika yulni ū, wirahni ahal balna, wirahni yayal balna, nanangni, papangni, walanibis ahal, sauni dana karang kidika,

³⁰ sau akat baisa kidika minityakat andat praisni ū balna, wirahni ahal balna, wirahni yayal, nanangni balna, papangni balna, walanibis ahal balna, sau balna duwarang ki kal-uhuiwa karangbik; dawak ma balna kaiwarang kidika yakat laih sangka ban kaput atnin lani kidika duwarang ki.

³¹ Kaunah waradika muih mahni palni tatuna balna kidika laih, witni yakat yaklalana karang; dawak muih mahni palni waradika witni yakat balna kidika laih, tatuna yakat yaklalana karang.

Jisas witing daunin yulni wat bas yakat yulna kidika

³² Jerusalén niningyakat uiwadai, dawak Jisas laih disaipil balna tanitna yakat lapakwadai. Witingna laih amanglalawasdai, dawak dangnitna yakat muih balna uiwadai kidika laih yamaduduwadai. Jisas yaklau watwi disainipil balna yakat ahni naikau diyulwak uina dai, dawak witing yakat ais kalkalahwarang kidika diyulna dai:

³³ “Manna talamana kaput, Jerusalén yakat mawi, muih Walanibis al kidika laih sumalyang balna taninatuna balna dawak la sumalniyang balna tingnina yakat kawarang kidika, dawak īwi sau ūk muihni balna tingnina yakat ahawarang ki.

³⁴ Witing yakat sarahni kaltatalwarang ki, susuih kaltuhwi, wiswi dawak ihiwarangki; kaunah ma bas bayakwakat usnit kat watwi yaklauwarangki.”

Jims dawak Jan karak ilp yuyulna kidika

³⁵ Sibidi walanibis balna Jims dawak Jan karak, Jisas yaihnit yakat uiwi aput kalyuyulna: —Sumalyang, yangna dukih yanawi ilp mayultanaki kidika yanana atnam.

³⁶ Jisas yaklau diyulwi dakana: —¿Yang lawik ais yamnik kidika dukih manawih manna yulmana?

³⁷ Witingna yaklau kalyuyulna: —Man king āwaman sauni alasnina yaksihni kidika yanatangkat tingmapal niningyakat as dawak wadahma niningyakat as yalahtanakuh.

³⁸ Jisas yaklau nangnitnalana: —Manna amanglatasmana ais yultamana kidika. ¿Ais yang dinin tapahlni diki kidika dinamna sipmanah, dawak was yautu'yakwarang kidika, manna bik dunamna?

³⁹ Witingna yaklau nangnitlalana: —Sipyangna. Jisas yaklau diyulna: —Manna adika dinin tapahlni adika ditanama, dawak was yautuk'yakwarang kidika dunamna;

⁴⁰ kaunah yang tingkipal niningyakat dawak wadahki niningyakat yalahnamna kidika laih sip yang lawik manatasyang, kaunah angdika muihni balna ridi kakalna balna kidika yakat diana karang.

⁴¹ Disaipil balna ūk salap kidika adika yulni dakakana kat, Jims dawak Jan niningyakat kulninna daukakalna dai.

⁴² Kaunah Jisas yaklau diyulwakat uiwak aput diyulna: —Manna amanglatamana kaput, Papang yakat kukulwas balna pasyakat tunan muihni balna as as kidika rahmnina duwi kabamint kakawa kapat kaldakakawi taninatuna balna niningnayakat, dawak tunan muihni balna nunuhni kidika yaklau witingna minitna yakat parasnina kau wark yayamwi.

⁴³ Kaunah manna pasmangna yakat laih kaput atnin awaski. Nawatkauh, manna pasmangna yakat angdika muihni kat nuhni kaldakawarang kidika laih, muih ūk balna yakat dinina yamnin karangki,

⁴⁴ dawak manna pasmangna yakat angdika muihni tatuna kaldakanin kulwarang kidika laih, muih ūk balna dinina yamyang atnin karangki.

⁴⁵ Kat muih Walanibis al karang bik witing dini yamwi kalanin yulni kaiwaski, kaunah muih dinina yamna kaina dawak bik witing sangnika diana kaina muih mahni yakat pri lani diana atnin yulni.

Jisas yaklau Bartimeo minikpa di talwas yakat yamni kalyamna

⁴⁶ Jericó yakat uiwi kakana. Dawak Jisas witing tawan nuhni kaupak kalahwi kiwarang sakkat, disainipil balna dawak muih mahni karak kalpakwi, di yulyang muihni minikpa di talwas as ayangni laih Bartimeo, Timeo walanibis al, ta yaihnit yakat yalahna sakdai.

⁴⁷ Witing dakawakat Jisas Nazaret kaupak kat, muih minikpa di talwas kidika laih parasni sarahna: —¡Devid walanibis al Jisas, yang akat mikun yatalah!

⁴⁸ Muih mahni yaklau witing yakat bibilna ap dana atnin, kaunah witing laih baisa parasni yulwi sarahwadai: —¡Devid walanibis al yang akat mikun yatalah!

⁴⁹ Bahang Jisas witing watwi aput yulna: —Yultanang kaiwang. Muih minikpa di talwas yakat kainin kalyuyulwi aput kalyuyulna: —Kulnam dulautah, dawak lawah; mayulwasakki yawanam.

⁵⁰ Muih minikpa di talwas dai kidika laih kalmuknin dini kalmukna kidika yakpamwi Jisas yaihnit yakat kaina,

⁵¹ aput kalyulwi dakana: —¿Yang man yulma ais yamnik kidika dukih mawih? Muih minikpa di talwas kidika yaklau nangnitlana: —Sumalyang, yang mikpa di talnik kidika dukihyawi.

⁵² Jisas yaklau kalyulna: —Sipman yawana atnam; man rahm kulnin lani dutaman kidika yulni yamwi mayamna. Kidika minitni yakat muih minikpa di talwasdai kidika di talna dai, dawak ta munah Jisas usnit uiwi kiunadai.