Luk 9 - Papang Yulni

Jisas yaklau disaipil balna yakat sihna kidika Papang king kāwa sauni yulni kidika sumalna atninna

¹ Jisas yaklau disainipil balna 12 kidika uduhwi parasnina diana dai spirit dutni satni balna bitik kangwi yakna atninna dawak siknis muihni balna bik yamni yamna atnin.

² Papang king kāwa sauni yulni kidika sumalna atninna dawak siknis muihni balna yakat bik diyamna atninna disihna dai.

³ Aput diyulna: —Ta yakat di as bik duwi uiwinih: tulnah, bik, plawar busna, lalah, dawak buhni kalahnin asnina bik duwi uiwinih.

⁴ Ū as kau yawa āwanama kat, kidika ūni yakat manah bangkauna alahwa yawanama.

⁵ Dawak tawan as kau manaparasnin yuyulwas karangkat, kidika kaupak alahwa kalmana yakat sau yahamni manalaihna kidika usta yaktanama, kidika laih witingna yakat isningnapaknin lani as karang.

⁶ Bahang witingna laih kalahwi tawanbinina bitik yakat uiwi laihwi yaknin yulni kidika sumamalna dai dawak bik siknis muihni balna yakat yamni diyayamna dai.

Herod rahm kulwas dana kidika

⁷ Herod laih yuyulwakat dakana dai Jisas yulni dawak ais yamwadai kidika bitik; dawak ais yamninpa amanglawasdai, kat muih buas laih yuyulwadai Jan watwi yaklauna,

⁸ ūk balna laih yuyulwadai prapit Elías laih watwi kalahna, dawak ūk balna laih yuyulwadai muhnilaukau pranipit balna dai kidika watwi yaklalauna.

⁹ Kaunah Herod laih yulna: —Yang palni lawik sihtingkat Jan tunani kidika dadakna dai. ¿Bahang adika muihni waisyah, witing yulni di manas yuyulwakat dakayang kidika? Kidika yulni Herod laih Jisas yakat talnin kulna dai.

Jisas yaklau muih 5,000 dibayahna kidika

¹⁰ Apostel balna kidika nawatwi aina mani kat, Jisas yakat kalyuyulna dai ais yayamna dai kidika. Witing yaklau diduwi kiunadai tawan as ayangni Betsaida yakat.

¹¹ Kaunah muih balna kidika dakakana kat, usnit uhuina dai; dawak Jisas yaklau diparaswi Papang king kāwa sauni yulni kidika diyulna dai dawak siknis muihni balna yakat bik yamni diyamna dai.

¹² Ma ulah dana mani kat, disaipil balna 12 kidika laih Jisas yaihnit yakat uiwi aput kalyuyulna: —Muih balna kidika sihmuktang kat uiwang, uiwi yakurupdana atninna dawak bik kasnin dini walna atninna tawanbinina yakat dawak di dadahwa pāni balna yakat bik, kat adika pāni akat laih di diski.

¹³ Jisas yaklau diyulna: —Manna lawa di bayahtanauh. Witingna yaklau nangnitlalana: —Plawar busna singka dawak waspa dini bu kidika manah dudi, adika muihni balna bitik kasninna dini yawik bakantanaki laihtakat sip karang bayahnikna.

¹⁴ Bahang bitik muih 5,000 dai. Kaunah Jisas yaklau disainipil balna yakat aput diyulna: —Diyultanangkat uduhni as yakat muih 50, 50 yalalahwang.

¹⁵ Kaput diyuyulwakat bitik yalalahna dai.

¹⁶ Usnit kat Jisas yaklau plawar busna singka kidika dawak waspa dini bu kidika tingni yakat duwi kisang yakat talwi Papang yakat tingkih kalana dai kidika dini balna yulni, dawak bahwi disainipil balna yakat diana dai muih balna yakat diana atninna.

¹⁷ Muih balna kidika laih kaswi isningnalak danadai, dawak baisa kidika minityakat yayahni balna watna kidika uslun 12 puwi babanghna dai.

Pita yaklau lāih yakwi yulna Jisas laih Mesías kidika

¹⁸ Ma as kat Jisas witing alas minityulwasakdai, dawak disainipil balna laih witing karak bangkat aput diyulwi dakana dai: —¿Muih balna laih yang adika waisyang yatwih?

¹⁹ Witingna yaklau nangnitlalana: —Muih buas balna laih man kidika Jan muih was utuhwi yakyang man matwi, ūk balna laih Elías man matwi, dawak ūk balna laih muhnilau pranipit balna kaupak as watwi yaklauna matwi.

²⁰ Jisas yaklau diyulwi dakana: —Dawak manna laih, ¿waisyang yatimanah? Dawak Pita yaklau nangnitlana: —Man laih Mesías Papang kaupakman.

Jisas witing dauwarang yulni yulna kidika

²¹ Kaunah Jisas yaklau diyulna dai adika dini muih as kau bik yulninna awas.

²² Dawak aput diyulna: —Muih Walanibis al kidika laih dalani mahni wauhwarang ki, dawak muihbararak balna, sumalyang balna taninatuna balna dawak lā sumalniyang balna yaklau bik yamni kaltatalwas karangki. Ihiwarang ki, kaunah ma bas laihwa yakat watwi yaklauwarangki.

²³ Usnit kat bitik yakat aput diyulna: —Angdika muihni yang disaikipil atnin dukih kalawakat, witing silp muihni kidika ruhmwi dawang, dawak ma bitik yakat panan prihni kidika trukwi uskit uiwang.

²⁴ Kat angdika muihni witing silp sangnika laihtik yakkuh tarang kidika laih diswarang ki; kaunah angdika muihni yang yulki sangnika diswarang kidika laih, laihwi yakwarangki.

²⁵ ¿Muih niningyakat ais as yamniyah sau adika bitik duna atnin, witing alas diswakat kidik awaskat kaldaukalwakat?

²⁶ Bahang angdika muihni yang nikingyakat dawak yulki kidika niningyakat yakasaldakat, muih Walanibis al kidika bik witing nining yakasaldarang ki witing alasnina yaksihni, Papangni alasnina yaksihni karuk dawak insal holi balna alasninana yaksihni karuk bik kaiwarang mani kat.

²⁷ Manna yakat barangni manayultayang akat bangmana adika as bik dautas awanamaki Papang king kāwa sauni kidika talasmana kat.

Jisas muihni nuhni satuk kalahna kidika

²⁸ Kidika yulbauna kaupak ma tiaskaubās laihna usnit kat, Jisas laih Pita, Jims dawak Jan kauna kalpakwi asang as kau kilwi kiunadai minityulna atnin.

²⁹ Jisas laih minityulwa sakkat, muhni pīsni kidika satuk kalnadai, dawak prakni kidika laih pihni yaringni kalnadai;

³⁰ dawak muih ahal bu kalahwi witing karak yulbabauna dai. Kidika balna laih Moses dawak Elías balna dai

³¹ yaringni yaksihni as awaihdak pasyakat bangdai kidika, witingna laih Jerusalén yakat Jisas dalani wauhwarang kidika yulni yulbauwabangdai.

³² Pita dawak witing karak kaltalyang muihni yayamni balna kidika miniknakauhni karangbik, sahmuhni bangdai, dawak Jisas alasnina yaksihni kidika dawak witing karak muih ahal bu raudai kidika bik tatalna dai.

³³ Kidika ahalni balna witingna Jisas kaupak kaldakwi kalalahna mani kat, Pita yaklau Jisas yakat kalyulna: —Sumalyang, ¡yamni palni karangki mayang laih akat bang-atnin! Ū binina bās yamtanaki ki: as man dima, ūk kidika Moses dini dawak ūk kidika laih Elías dini. Kaunah Pita laih ais yulwapa amanglawasdai.

³⁴ Pita laih yulbauwa sakkat, mukus as witingna minitna yakat kaiwi bukna dai, dawak witingna mukus pukni kidika pasyakat kakana mani kat, yamaduduna dai.

³⁵ Bahang mukus paskaupak yulni as aput yulna dai: “Adika ki yang Walakibis, waltik yaknayang kidika: dakanauh.”

³⁶ Yulni as kalahwakat dakakana minitni yakat, Jisas laih alas sakdai. Kaunah witingna laih kidika dini kidika malwi duduwadai dawak kidika mani balna yakat witingna ais tatalna kidika muih as kau bik yuyulwasdai.

Jisas yaklau muih al wahmabin as spirit dutni duwa kat yamni kalyamna kidika

³⁷ Kidika payahwakat, asang kaupak yaklalakna mani kat, muih mahni palni kalahwi Jisas niningkauh uinadai.

³⁸ Dawak muih balna paskaupak muih al as yaklau Jisas yakat parasni sarahwi aput kalyulna: —Sumalyang, plisma palni yang walakibis al aslah dutayang yakat talah;

³⁹ spirit dutni as yaklau kallaihwakat sarahwi dawak sangka dauwi dawak bik tinpas kaupak luhusni yakwi. Dutni kalyamwi dawak bik sip kaldawas ki.

⁴⁰ Man disaimapil balna yakat kalninadinit buknayang kidika spirit dutni kidika yakwi kalana atninna, kaunah witingna sip yakwas dadana.

⁴¹ Jisas yaklau nangnitlana: —¡Rahm kulnin lani dis dawak dutni muihni! ¿Mampat mani kat manna karak awakiyah dawak namangnalaukiyah? Walamabis kidika akat duaitah.

⁴² Muih al wahmabin kidika Jisas yaihnit yakat kiuna mani kat, spirit dutni kidika yaklau sau yakat kalruhm'lakwakat sangka dauna dai; kaunah Jisas yaklau spirit dutni yakat bilna dai, dawak muih al wahmabin kidika laih yamni kalyamwakat watwi papangni yakat kalana dai.

⁴³ Dawak muih balna bitik laih Papang parasni nuhni kidika yamni tatalna dai. Muih balna bitik witingna Jisas di yamwadai kidika yakat talwi amanglalawas kat, Jisas yaklau disainipil balna yakat aput diyulna:

Jisas witing dauwarang yulni wat bu yakat yulna kidika

⁴⁴ —Manna adika dini yamni dakanauh dawak damatnakahnin awaski: muih Walanibis al kidika laih muih balna tingnina yakat kawarangki.

⁴⁵ Kaunah witingna laih amanglalawasdai Jisas yaklau diyulwa kidika, kat Papang yaklau amanglawas atnin diyamna dai bahang; baisa kidika minityakat Jisas yakat kalyulwi dakakawakat tanka diyulna atnin kidika yamaduduwadai.

¿Wais kidika kauh baisa nuhni kalkulnayah?

⁴⁶ Kidika mani balna yakat disaipil balna laih witingna pasyakat wais kidika kauh nuhni kalkulnapa kidika yulni yulwi kalbibilna dai.

⁴⁷ Kidika kaput kukulwa kidika Jisas witing amanglana mani kat, muihbin as witing yaihnit yakat duna

⁴⁸ dawak aput diyulna: —Angdika muihni adika muihbin kidika yang ayangki usnit yakat duwa kidika laih, yang yakat yaduwi; dawak yang yakat yaduwa kidika laih, yang yasihna muihni yakat bik duwi. Kidika bahang, manna pasyakat di awas kalkulna muihni kidika ki, nuhni kalkulna kidika laih.

Mayang manikingkauh awas kidika laih, mayang mailpki yakat sakki

⁴⁹ Jan yaklau kalyulna: —Maestro, yangna muih as talnayangna man ayangma kau duwi spirit dutni balna kangwi yakwadai; dawak yangna lawik yamnin awas kalyulnayangna, kat mayang kaupak awas kidika yulni.

⁵⁰ Jisas yaklau nangnitlana: —Manna witing yamwas atnin kalyuyulwinih, kat angdika muihni mayang manikingkauh awas kidika laih, mayang mailpki yakat ki.

Jisas yaklau Jims dawak Jan yakat dibilna kidika

⁵¹ Jisas witing kisang yakat kilwi kiunin mani kidika ulisna kat, kulnin dadasni yamnadai Jerusalén yakat kiuna atnin.

⁵² Witing tanityakat yul trukyang muihni balna sihna dai, witingna laih Samaria yaihnit yakat tawan bin as kau uinadai ū as walwi yakna atnin;

⁵³ kaunah Samaria muihni balna laih dunin yulwas dadanadai, kat Jisas laih Jerusalén niningyakauh kiwi atwak dakakana dai kidika yulni.

⁵⁴ Disainipil balna Jims dawak Jan witingna kidika kaput tatalna mani kat, Jisas yakat aput kalyuyulna: —Dawan, ¿yuldakat kisang kaupak kuhpau bukwi adika muihni balna yakat dismuknin dukih mawih?

⁵⁵ Kaunah Jisas wiryaklawi dibilna.

⁵⁶ Usnit kat tawan dibin ūk kau uinadai.

Jisas yakat usnit uinin dukih diawadai kidika balna

⁵⁷ Ta yakat uiwabang kat, muih al as yaklau Jisas yakat aput kalyulna: —Dawan, usmat uinik dukih yawi angkat yawama bik.

⁵⁸ Jisas yaklau nangnitlana: —Wassala yayal balna kidika panina sulihni duduwi dawak di lawani balna kidika bik ūnina duduwi; kaunah muih Walanibis al kidika laih tunani ānin pāni diski.

⁵⁹ Jisas yaklau ūk yakat kalyulna: —Uskit uitah. Kaunah witing yaklau nangnitlana: —Dawan, tatuna kidika yadatangkat yawik papangki kidika nukuh.

⁶⁰ Jisas yaklau nangnitlana: —Datang dadauna balna kidika yaklau dadauna balna yakat nunuwang; man laih yawa Papang king kāwa sauni yulni kidika yultah.

⁶¹ Ūk yaklau kalyulna: —Dawan, usmat uinik dukih yawi, kaunah yadatangkat ūki yakat yawik wanaihki balna yakat diparaskuh.

⁶² Jisas yaklau nangnitlana: —Angdika muihni sau sahnin yakat tingni āwi dawak usnit kat dangnit yakat wiryaklawi talwa kidika laih, Papang king kāwa sauni yakat kanin sip-waski.