Luk 22 - Papang Yulni

Jisas yakat malni kau laihnin yayamna kidika

¹ Plawar pupuhnin dini dis busna kasnin alasnina mani kidika ulisdai, yuldarangkat insal kaiwi bayakna mani alasnina kidika.

² Sumalyang balna taninatuna balna dawak lā sumalniyang balna kaunah, witingna muih balna yakat yamaninaduduwadai kidika, Jisas yakat amput īnin kidika wawalwadai.

³ Bahang sitan kidika laih disaipil balna kidika kaupak as Judas Iscariote kalatwadai kidika kulnin yakat kanadai.

⁴ Adika muihni laih sumalyang balna yakat dawak makat yulnin ūni tunan muihni balna yakat bik ditalna kiunadai, dawak witingna yakat diyulna dai witing yaklau amput yamwi Jisas kidika witingna tingnina yakat ānin kidika.

⁵ Witingna laih alasna kalahwi Judas yakat lalah kalanin pramis yayamnadai.

⁶ Dawak witing laih dunin yulna dai dawak amput yamni muih balna tatalwas kat tingnina yakat ānin kidika walna dai.

Dawan masan kasnin dini kasna kidika

⁷ Plawar pupuhnin dini dis busna kasnin alasnina mani kidika laih kiwi kanadai, kidika mani laih insal kaiwi bayakna mani kidika sīp kurih as laihna kidika sakripais yayamwadai.

⁸ Jisas yaklau Pita dawak Jan kidika balna yakwi disihna dai, aput diyulwīnah: —Manna yawa insal kaiwi bayakna mani masan kasnin dini kidika ridi yamtanauh.

⁹ Witingna yaklau kalyulwi dakakana: —¿Angkat pāni ridi yamnikna dukih mawih?

¹⁰ Jisas yaklau nangnitnalana: —Manna tawan nuhni yakat āwanama mani kat, muih al as was butnin dini as duwi kiwalik kat talnama ki. Witing angdika ūni yakat kawarang kidika kat usnit uita yawanama,

¹¹ dawak ū dawan yakat kalyultanama: ‘Maestro yaklau yulwi dakawi: ¿Ūpas daklana angdika yakat yang disaikipil balna karak insal kaiwi bayakna manisan kasnin dini kidika kastanakiyah?’

¹² Witing yaklau ū mayakat namangnakawarang ki daklana as yamni yamna sakkat masan kasnin pāni kidika. Kidika pāni yakat di balna kidika ridi yamtanama.

¹³ Witingna laih uiwi kalpapakna dai Jisas yaklau amput diyulna dai kidika kaput, dawak kidika yakat masan kasnin dini kidika ridi yayamnadai.

¹⁴ Awarni kiwi kana mani kat, Jisas dawak apostel balna karak tibil yakat yalalahna dai.

¹⁵ Jisas yaklau diyulna: —¡Yang ampus manna karak kasnik kulnayangdai insal kaiwi bayakna mani masan kasnin alasnina adika baisa dautasyang tanitkauh!

¹⁶ Kat manayultayang wattik kasnin alasnina yamtas awakiki, mampat mani Papang kingni lani kidika kiwi kawarangkat.

¹⁷ Bahang tingni yakat sutak as duwi Papang yakat tingkih kalana usnit kat, aput yulna: —Adika duta manna pasyakat wayahtanauh;

¹⁸ kat manayultayang wattik wain wasni kaupak ditas awakiki, mampat mani Papang kingni lani kidika kaiwarangkat.

¹⁹ Usnit kat tingni yakat plawar busna kidika duwi Papang yakat tingkih kalana usnit kat, bahwi witingna yakat diawi aput diyulna: —Adika ki yang muihki nuhni, daunin tingni yakat āna kidika manna yulmana. Adika yamtanauh yang ayangki usnit yakat.

²⁰ Masan kasnin dini kidika kakasna usnit kat sutak kidika bik duwi sihm kaput yamnadai, aput yulwinah: —Adika sunitak laih yang āki karak wisamni pramis yamna, dawak manna yulmana sau yakat utuhna.

²¹ Kaunah waralaih yang akat yalaihwi malni kau pāt yakat yahawarang kidika laih, yang karak tibil yakat sakki.

²² Bahang muih Walanibis al kidika laih angdika tani yakat kiunin kalyulna kidika yakat kiwarang ki, kaunah ¡alakaih angdika muihni yaklau malni kau pāt yakat āwa kidika laih!

²³ Bahang witingna biri biri yulwi dakakana dai wais yaklau malni kau pāt yakat āwarangpa.

Wais kidika kauh tanit nuhni kalkulna kidika

²⁴ Disaipil balna kidika laih witingna biri biri kalmuhwi yuyulna dai wais kidika kauh tanit nuhni kalkulnapa kidika yulni.

²⁵ Jisas yaklau diyulna: “Papang yakat kukulwas muihni balna pasyakat laih, king balna kidika taihnin lani karak king kakawi, dawak tunan muihni balna kidika laih yamni yamyang balna dikukulwi.

²⁶ Kaunah manna laih kaput atnamna awaski. Nawatkauh, manna pasyakat tanit nuhni kalkulna kidika laih baisa wahmabin kapat atnin ki, dawak tunan duwa muihni kidika laih di yamyang muihni kapat atnin ki.

²⁷ Bahang, ¿wais kidika kauh tanit nuhni kalkulnayah, tibil yakat di kasna yalahwa kidika kidik awaskat di lakwa muihni kidika? Wirlawakat yang laih manna pasmangna yakat sakyang sihm di yamyang as kapat.

²⁸ “Manna laih yang karak mana dai traikitalnin balna pasyakat.

²⁹ Kidika bahang, yang lawik sau as manatayang, Papangki yaklau yang yakat yana kapat,

³⁰ dawak manna laih yang tikibil yakat kastanama dawak bik ditanama king āwayang sauni yakat, dawak trun balna yakat yalahta Israel sulani balna 12 yakat lanina yamtanama.”

Jisas yaklau yulna Pita yaklau kaltalasyang tarang kidika

³¹ Dawan yaklau aput bik yulna: —Saiman, Saiman, talah sitan yaklau manna yakat manaisihnin yulna kidika manna laih sihm plawar minik mana kapat;

³² kaunah yang laih man yulma yulnayang, rahm kulnin lani kidika ban duta atnam. Dawak man laih yang yakat wirlawama mani kat, wanaihma balna yakat ilp diatangkat barangni kulnin lani duduwang.

³³ Saiman yaklau kalyulna: —Dawan, yang laih man karak silak yakat yawinik kidika kulnik ridi yamnayang, dawak man karak daunik kat bik.

³⁴ Jisas yaklau nangnitlana: —Pita, mayultayang warmani baisa sakara yulwas kat, wat bās yatalasyang tima ki.

Traini talnin uliswa kidika

³⁵ Usnit kat Jisas yaklau kalyulwi dakana: —Yang manna yakat lalah dis, kasnin dini dis dawak sus bik dis manasihnayang mani kat, ¿ais di dis manadaih? Witingna yaklau nangnitlalana: —Di bitik dutayangna dai.

³⁶ Bahang diyulna: —Waralaih, wirlawakat, wais lalah dawak kasnin dini duwa kat, duaiwang; dawak wais isparah dis kat, minitkau kāwa dini kidika bakanpamwi isparah as bakanwang.

³⁷ Kat manayultayang yang muihki yakat kalahwarang ki ulna balna yakat aput yulwa kidika: ‘Dawak muih dudutni balna pasyakat banawi kulna dai.’ Bahang yang yulki ulna kidika laih bitik kaput kalahwarang ki.

³⁸ Witingna yaklau yuyulna: —Dawan, akat isparah bu bangki. Dawak witing yaklau nangnitnalana: —Baisa yulbabauwinih.

Jisas Getsemaní yakat minityulna kidika

³⁹ Usnit kat Jisas laih kalahwi Olib asangni yakat kiunadai, nining yamwadai kaput; dawak disaipil balna kidika laih usnit uiwi uinadai.

⁴⁰ Kidika pāni yakat uiwi kakana mani kat, aput diyulna: —Manna mamatna yultanauh, trainitalnin yakat buknamna awas yulni.

⁴¹ Witingna kaupak naikau kalahwi kiwi limbabahwi minityulna dai.

⁴² Aput yulna: “Papangki, man dukih mawakat, adika dinin tapahlni kaupak yalaihta yaktah; kaunah yang kulnik lani laih yamwinih kaunah man kulnam lani yamtah.”

⁴³ [Kidika minitni yakat kisang kaupak insal as kai'kalahwi parasni kalana dai.

⁴⁴ Jisas laih wauhnin nuhni pasyakat baisa parasni palni minityulwadai, dawak walahnidana sau yakat tahwa kidika laih sihm ā kapat dai.]

⁴⁵ Minityulwi yaklauna mani kat, disaipil balna bangdai kidika yakat kiunadai, dawak kulninna bukwi minit bayakwakat kakamana bangkat ditalna dai.

⁴⁶ Aput diyulna: —¿Ais yulni amabangmanah? Lauwa mamatna yultanauh, traini talnin yakat buknamna awas yulni.

Jisas yakat lalaihna kidika

⁴⁷ Jisas laih baisa yulbauwa sakkat, muih mahni uiwi kakanadai. Disaipil balna kaupak as, Judas kalatwadai kidika, tunan duwalikdai. Kidika yaklau Jisas yaihnit yakat kiwi umna dai,

⁴⁸ kaunah Jisas yaklau kalyulna: —Judas, ¿umna as karak muih Walanibis al yakat malni kau pāt yakat ātamahn?

⁴⁹ Jisas karak bangdai muihni balna kidika witingna di kalahwa kidika talwi Jisas yakat kalyulwi dakakana dai: —Dawan, ¿isparah karak kalbautanakuh?

⁵⁰ Dawak witingna kaupak as yaklau sumalyang nuhni dini yamyang tapani tingpal niningkauh kidika yakat dakna dai.

⁵¹ Jisas yaklau kalyulna: —Kamanah datanauh. Dawak di yamyang tapani yakat laihwakat yamni kalyamna dai.

⁵² Usnit kat sumalyang balna taninatuna balna yakat, makat yulnin ūni tunan muihni balna yakat dawak muihbararak balna kauna witing yakat laihwi duwi uinin aina dai kidika yakat aput diyulna dai: —¿Ais yulni manna isparah dawak pan duta aiwanamanah, yang laih sihm muih dutni as yang kapat?

⁵³ Yang laih ma bitik yakat manna karak yang dai makat yulnin ūni yakat, dawak yalaihtasmana dai. Kaunah adika ki manna awarmana, puksani yaklau taihwa kidika.

Pita yaklau Jisas laih talasyang atna kidika

⁵⁴ Bahang Jisas laih laihwi sumalyang nuhni ūni yakat duwi uinadai. Pita laih naikaupak usnit uiwadai.

⁵⁵ Kidika pāni watak papusyakat kuh biwi yaihnit yakat yalalahna dai; dawak Pita bik witingna pasyakat yalahna dai.

⁵⁶ Kidika minitni yakat, di yamyang yal as witing talwakat kuh yaihnit yakat yalahna sakkat, aput yulna: —Adika muihni bik witing karak likdai.

⁵⁷ Kaunah Pita yaklau talasyang atna, aput yulwinah: —Yal, yang laih witing amangnilatasyang.

⁵⁸ Usnit kat muih ūk kaltalwi aput yulna: —Man bik witing kaupak man. Pita yaklau nangnitlana: —Dikah, witingna kaupak awasyang.

⁵⁹ Awar as bayakna usnit kat, muih ūk yaklau watwi yulna: —Rahm palni adika muihni bik witing karak likdai. Baisa kidika minityakat witing laih Galilea kaupak ki.

⁶⁰ Pita yaklau yulna: —Muih al, yang amanglatasyang ais yulni yultamanpa. Kidika minitni yakat, Pita laih baisa yulbauwa sak kat, sakara as yulbauna dai.

⁶¹ Bahang Dawan laih Pita yakat wiryaklawi kaltalna, dawak Pita laih isningkatna dai Dawan yaklau aput kalyulna dai kidika: “Warmani, sakara kidika yulwas tanitkauh wat bās yatalasyang tima ki.”

⁶² Dawak Pita laih kidika kaupak kalahwi dalani palni kaidana dai.

Jisas yakat sarahni kaltatalna kidika

⁶³ Jisas yakat maintalwabangdai kidika muihni balna laih witing yakat sarahni kaltalwi babauwadai.

⁶⁴ Minikpa balna kidika taihwi kalyulwi dakakawadai: —¡Yultah wais mabaunayah!

⁶⁵ Dawak witing niningkauh di ūk manas kalyuyulna dai.

Jisas laih lā tunan muihni balna muhnina yakat kiuna kidika

⁶⁶ Payahlana mani kat, Ju muihnibararak balna, sumalyang balna taninatuna balna dawak lā sumalniyang balna kauna kalududuhna dai Jisas kidika lā tunan muihni balna muhnina yakat duwi uina atnin. Kidika yakat aput kalyulwi dakakana dai:

⁶⁷ —Yanayultah, ¿Mesías kidika manyah? Witing yaklau nangnitnalana: —Agha manatiki kat, rahm yakultas awanamaki.

⁶⁸ Dawak yulwi dakanin yulni balna manayultik dakaki kat, nangkitlatas awanamaki.

⁶⁹ Kaunah waradika kaupak muih Walanibis al kidika laih Papang parasni bitik duwa kidika tingnipal niningyakat yalahwarang ki.

⁷⁰ Usnit kat witingna bitik kalyulwi dakakana: —¿Kapat bahang manyah Papang Walanibis al kidika? Jisas yaklau nangnitnalana: —Manna lawa yayulnamana yang laih Papang Walanibis yang kidika.

⁷¹ Bahang witingna yaklau yuyulna: —¿Ais yulni mayang baisa witnis waldarangyah? Witing silp tinpas kaupak yulwakat dakanamayang.