Luk 21 - Papang Yulni

Yal tingmak minikunni as kalik āna kidika

¹ Jisas laih talwasakdai di duyang muihni balna kidika kalik baksni balna yakat lalah ahawakat,

² dawak yal tingmak minikunni as bik bras lalahni dadasni bu āwakat talna dai.

³ Bahang aput yulna: —Rahm palni manayultayang adika yal tingmak minikunni lalah āna kidika kauh nuhni āna ūk balna kidika karak dawakat;

⁴ bahang witingna laih lalahnina sutni bayakwa kidika duwi kalik ahawi, kaunah yal adika laih, witing minikunni pasyakat, kaswi sangka atnin dini duwadai kidika bitik āna.

Jisas yaklau yulwi makat yulnin ūni kidika laih daukalpamwarang ki

⁵ Muih buas laih makat yulnin ūni kinipala balna yayamni kidika dawak minitdis kalanin dini balna yaklau yaksihn kalyakwadai kidika yulni yulwabangdai. Dawak Jisas yaklau aput diyulna:

⁶ —Mani kaiwarangki adika dini balna bitik talamana kidika kipala as bik kipala ūk minityakat watwas karangki. Bitik laih daukalna karang ki.

Ma witni mani kawas tanitkauh yakat sain balna kalahwarang kidika

⁷ Bahang kalyulwi dakakana: —Maestro, ¿mampat mani kalahwarangyah adika dini? ¿Angdika sainni karangyah adika dini balna kalahnin manah kat?

⁸ Jisas yaklau nangnitnalana: “Manna amung talnauh datanangkat muih alas manayulnin awaski. Kat muih mahni yang ayangki duwi aiwarangki. Aput yuyulwarang: ‘Yang kuduh’, dawak ‘Waralaih mani kidika kana.’ Kaunah manna laih witingna usnitna uhuiwinih.

⁹ Dawak manna war yulni dakanama mani kat, muihsakdadauwinih, kat adika tatuna kalahwarang bahang; kaput bik, baisa witni mani kidika laih kiwi kawas karangki.”

¹⁰ Baisa aput diyulna dai: “Nisan as kidika nisan ūk niningyakat kalbauwarang dawak sau as kidika sau ūk niningyakat war yamwarangki.

¹¹ Sau pararasni bik isihwarang ki, pa balna bitik yakat yuh dawak siknis bukwarang ki, dawak kisang yakat laih di yamadadangni dawak sain nunuhni balna kalahwarang ki.

¹² “Kaunah kidika kalahwas tanitkauh, manalalaihwarang ki dawak bik manauhuiwarang ki. Papang yulni sumamalwa ūni balna yakat manaduwi uiwi lamana yayamwarangki, silak yakat manaahawarang ki dawak yang yulki king balna dawi kabamint kayang balna muhnina yakat manaduwi uiwarangki.

¹³ Kaput laih manna yang yulki yulnamna sip awanama ki.

¹⁴ Manna tamatna daknamna yulni balna kidika baisa kau ridi kakalwinih,

¹⁵ kat yang lawik yul balna sins lani yayamni kidika manaki ki, manna namangnakauh yaklalauwa muihni balna as bik mamatna bayakwi namangnakauh di as bik yulwas atnin.

¹⁶ Kaunah manna laih papangmana balna, wirahmana balna, wanaihmana balna dawak manna karak kaltalyang yayamni balna kidika yaklau malni kau pāt yakat manaahawarang ki. Manna kaupak buas mana kidika laih manaihiwarang ki,

¹⁷ dawak muih balna bitik dutni manayayamwarang ki yang yulki;

¹⁸ kaunah tunamana kaupak basmana as bik diswas karangki.

¹⁹ ¡Barangni lawanauh, manalaihwi yakna atnin yulni!

²⁰ “Jerusalén kidika kalbauyang muihni balna awaihdak kat talnama mani, amanglatanama kidika laih sirihni palni daukalwarang kidika.

²¹ Bahang Judea sauni yakat bangkarang kidika laih, asang balna yakat kikirang; Jerusalén yakat bangkarang kidika laih, tawan nuhni kaupak kalalahwang, dawak di dahnin pāni yakat bangkarang kidika laih, Jerusalén yakat nawatwi uinin awaski.

²² Kat kidika mani balna laih wah mani karang ki, dawak bik Ulna balna yakat ais yulwa kidika bitik kaput kalahwarang ki.

²³ ¡Kidika mani muih yayal balna muihkararuk kidik awaskat muihbinina ta susuwa kauna duduwa karang kidika laih miniknakun palni karangki! Kat adika sauni akat dalani wauhnin nuhni as sakkarang bahang, dawak bik adika tawanni minityakat wah yamadangni as kaiwarang bahang.

²⁴ Buas balna kidika laih isparah baini kau dadauwarang ki dawak ūk balna kidika laih silak muihni diduwi uiwarang nisan balna bitik yaklau; dawak Papang yakat kukulwas muihni balna kidika laih Jerusalén kidika atakwi duduwarang ma balna āna kidika kiwi kawarang kat.

Muih Walanibis al nawatwi kaiwarang kidika

²⁵ “Ma yakat, waiku yakat dawak yala balna yakat bik sain balna kalahwarang ki; dawak sau akat laih nisan balna kidika barangni lāih awas karangki dawak bik kuma lalamwi parasni yamadangni yulwa kidika yakat dakawi muihsakdadauwarang ki.

²⁶ Muih balna kidika laih sangka dadauwarang ki sau akat di balna kalahwarang kidika yakat kulwi; bahang kisang parasni balna kat bik isihna karangki.

²⁷ Bahang muih Walanibis al kidika laih mukus yakat witing parasni karuk dawak alasnina yaksihni karuk lāih kaiwarangki.

²⁸ Adika dini balna kalahwarang mani kat, kulnamna dulautanauh dawak tunamana bik dulautanauh, kat sirihni palni manalaihwi yakna karang bahang.”

²⁹ Aput bik libitwi diyulna dai: “Ani damni panan yakat yamni talnauh, kidik awasbik pan pini balna yakat.

³⁰ Pan basni balna kidika bubukwa mani kat, manna amanglatamana ma daihnin kidika laih uliski.

³¹ Sihm kaput bik, adika dini balna kalahwakat talnama mani kat, amanglatanauh Papang king kāwa sauni kidika laih uman ulisdana.

³² “Barangni manayultayang adika dinin balna bitik kalahwarang ki adika mani muihni balna dadauwas tanitkauh.

³³ Kisang dawak sau balna kidika laih bayakwi uiwarangki kaunah yang yulki balna kidika laih bayayakwas karangki.

³⁴ “Manna amung talnauh dawak datanangkat kulnamna kidika dadasni kalnin awaski di suhl suhl dini balna yakat, wasak balna yakat dawak kulwi kalbaunin dini balna yakat bik, kaput laih kidika mani manna mamatna yakat bukwas atnin yulni

³⁵ sihm laihnin dini as kapat. Kat sau muihni balna bitik minitna yakat kaiwarang bahang.

³⁶ Manna laih ma balna bitik yakat mamatna yulta ridi awanauh, di balna kalahwarang adika kaupak ira lawanamna dawak muih Walanibis al kidika muhni yakat bik yawanamna yulni.”

³⁷ Jisas laih madah sumalwadai makat yulnin ūni yakat, dawak pukta laih Olib asangni yakat payahwadai.

³⁸ Dawak muih balna bitik laih ma baisa makat yulnin ūni yakat uiwadai Jisas sumalwa kidika yakat dakana atnin.