Luk 20 - Papang Yulni

Jisas parasni duwa kidika

¹ Ma as kat, Jisas witing makat yulnin ūni yakat muih balna yakat disumalwa sakkat dawak yul yamni kidika bik diyulwa sakkat, sumalyang balna taninatuna balna, lā sumalniyang balna dawak muihbararak balna kidika kauna kalpakwi uikawi,

² aput kalyuyulna: —¿Ais parasni karak duta adika dini yamtamahn? ¿Wais yaklau adika parasni manayah?

³ Jisas yaklau nangnitnalana: —Yang bik manna yakat yulwi dakanin as manayultik dakaki ki. Nangkitlatanauh:

⁴ ¿Wais yaklau Jan kidika sihnayah muih was utuhwi yakna atnin, Papang kidik awaskat muih balna?

⁵ Biri yulwi dakakana: “Yuldarang Papang yaklau sihna, kaput kat yulwarang ki: ‘¿Ais yulni rahm kalkultasmanadaih?’

⁶ Dawak muih balna yaklau sisihna yuldas karangki, kat muih balna yaklau kipala kau maibahrwi ihiwarang bahang, kat muih balna bitik laih amanglalawi Jan laih prapit as dai kidika.”

⁷ Kaput bahang witingna amanglalawas ki atwi yuyulna dai Jan kidika wais yaklau sihnapa muih balna yakat was utuhwi yakna atnin.

⁸ Bahang Jisas yaklau nangnitnalana: —Bahang yang bik manayultasyang ais parasni kau dutik adika dini yamtayangpa.

Wark yamyang balna dudutni yulnina malni yulni

⁹ Usnit kat Jisas yaklau muih balna yakat yuldibauwi adika malni yulni diyulna dai: “Muih al as wain yamak as dahwi wayaki dibakanna dai wark kalahyang muihni balna buas yakat dawak kalahwi kiunadai ma mahni tani.

¹⁰ Di minik balna kalahwa mani kat, dini yamyang as sihna dai wark kalahyang muihni balna yakat diyulwakat di minik balna witing dini kidika kalsihna atninna; kaunah witingna laih bauwi tingni panimanah nawatwi sihpapamna dai.

¹¹ Bahang yamak dawan kidika yaklau dini yamyang ūk sihna dai; kaunah kidika yakat bik niningkauh yulwi, bauwi dawak tingni panimanah nawatwi sihpapamna dai.

¹² Watwi dini yamyang ūk sihna dai, kaunah wark kalahyang muihni balna kidika yaklau muihni yakat dakwi kangwi yakpapamna dai.

¹³ “Witni kat sau dawan kidika yaklau aput yulna: ‘¿Ais yamkiyah? Yang walakibis al dalani kidika sihki ki; sip ki kidika yakat laih rispik kalyamninna.’

¹⁴ Kaunah wark muihni balna kidika yaklau kaltatalna mani kat, biri biri aput yuyulna: ‘Adika ki dipahni duwarang muihni kidika; ipamdanang, sau adika mayang madiki kalna atnin.’

¹⁵ Kaput bahang wain yamak kaupak yakwi ipapamna dai. “¿Dawak yamak dawan yaklau kidika muihni balna yakat ais diyamwarang kultamanah?

¹⁶ Bahang kiwi wark muihni balna kidika imukwi wain yamak kidika muih ūk balna yakat diawarang ki.” Kidika yulni dakawi aput yuyulna: —¡Kidika laih sip kaput kalahwas karangki!

¹⁷ Kaunah Jisas yaklau ditalwi aput diyulna: —Bahang ¿ais tanka yah adika dini Ulna balna yakat yuyulwa kidika?: ‘Ū yamyang balna yaklau kipala ruhmwi dadana kidika laih kipala nuhni as kalna.’

¹⁸ Angdika muihni kidika kinipala minit yakat bukwarang kidika laih, muihni balna dakwi dis dawarangki; dawak kipala kidika muih as minityakat bukwarangkat, tikwi yahamni yamna karangki.

¹⁹ Sumalyang balna taninatuna balna dawak lā sumalniyang balna kidika laih Jisas yakat laihnin kukulna dai kidika minitni yakat, kat amanglalana dai kidika malni yulni yulna kidika laih witingna yakat dikulwi yulna dai kidika. Kaunah witingna laih muih balna yakat yamaninaduduwadai.

Tunan minit daknin yulni kidika

²⁰ Pakwi talnin muihni balna buas sisihna dai sihm rispik ahalni balna kapat, witingna yaklau Jisas yakat kalyayamwakat yul as yulwakat kidika karak kabamint tingni yakat āna atnin yulni.

²¹ Adika yulni balna kalyulwi dakakana dai: —Maestro, yangna amanglatayangna man lawa yultaman kidika dawak sumaltaman kidika bik rahmki, dawak man laih muih balna dukih diawa kidika kaput waltasman. Man laih rahm amput Papang yaklau yalahnin yulwa kidika sumaltaman.

²² ¿Roman kingni tanit nuhni yakat tunan minit launikna kidika yamniyah kidik awaskat dutniyah?

²³ Jisas laih witingna kulninna lani dutni duduwadai kidika amanglawi aput diyulna dai:

²⁴ —Lalah dadasni as nikingkatanauh. ¿Wais muihniyah dawak wais ayangniyah akat ulna kidika? Witingna yaklau nangnitlalana: —King tanit nuhni kidika.

²⁵ Jisas yaklau diyulna: —Bahang king tanit nuhni dini kidika king tanit nuhni yakat kalatanauh, dawak Papang dini kidika Papang yakat kalatanauh.

²⁶ Dawak muih balna muhnina yakat yul yulna kidika yakat di as bik yayakwasdai kidika karak laihna atninna, kaput bahang biriwi yul diyulna kidika yakat yamni dakawi ap dadanadai.

Watwi yaklaunin yulni kidika

²⁷ Usnit kat saduceos muihni balna buas Jisas yakat kaltalna uinadai. Saduceos muihni balna laih muih dadauna balna kidika watwi yaklalauwas karang ki atwi; kidika bahang adika yulni kalyulwi dakakana dai:

²⁸ —Maestro, Moses yaklau aput ulwi dana, muih al as yal duwi yalni karak walanibis dis dauwarang kat, muih al dauna wirahni al kidika dunin sipki yal tingmak kidika, wirahni al dauna yakat walanibis as kalana atnin yulni.

²⁹ Bahang yamni, wat as kalwirah ahal tiaskaubu dai, tatuna kidika laih yal duna, kaunah walanibis dis dauna dai.

³⁰ Usnit kidika,

³¹ dawak bas kidika laih yal tingmak kidika karak kalduduna dai, dawak ūk balna kidika bik sihm kaput yayamna dai, kaunah tiaskaubu pak walabis dis dadauna dai.

³² Witni kat yal kidika bik dauna dai.

³³ Bahang yamni, watwi yaklaunin mani yakat, ¿witingna kaupak angdika yalni karangyah adika yalni, witingna tiaskaubu pak yal adika karak kalduduna dai kat?

³⁴ Jisas yaklau nangnitnalana: —Adika mani balna akat laih, muih ahal dawak yayal balna kidika kalduduwi;

³⁵ kaunah angdika muihni balna ban sangka atnin mani balna kaiwarang yakat alasna karang kidika dawak watwi yaklalauwarang kidika balna yakat Papang yaklau lanina yamwarang kidika laih, muih ahal karangpa kidik awaskat yayal balna karangpa, witingna watwi kalduduwas karangki,

³⁶ kat witingna watwi dadauwas karang bahang. Bahang witingna laih sihm insal balna kapat karangki, dawak bik Papang walanibis balna karangki watwi yaklalauna kidika yulni.

³⁷ Moses witing palni, kuh dahlwa yulni yulna kidika yakat manikingkawi muih dadauna balna kidika laih watwi yaklalauwarang ki. Kidika yakat yulwi Dawan kidika laih Abraham, Isaac dawak Jacob balna Papangnina.

³⁸ ¡Dawak witing laih dadauna balna Papangnina awaski, kaunah sangka balna Papangnina, bahang witing niningkauh laih bitik kidika sangka ki!

³⁹ Bahang lā sumalniyang balna buas yaklau kalyuyulna: —Maestro, yamni yulnaman.

⁴⁰ Dawak watwi di as bik kalyulwi dakakawasdai.

¿Mesías kidika wais sulani yah?

⁴¹ Jisas yaklau kalyulwi dakana: —¿Ais yulni Mesías kidika Devid sulani timanah?

⁴² Bahang Devid witing palni, salmo wauhnitaya yakat aput yulwi: ‘Dawan yaklau yang Dakiwan yakatkalyulna: Yang tingkipal niningyakat yalahdah,

⁴³ yang lawik man namangkauhyaklalauwa balna yakat kalma laknam pāni yamki kat.’

⁴⁴ ¿Bahang amput Mesías kidika Devid sulani karangyah, Devid yaklau kalyulna kidika Dakiwan?

Jisas yaklau lā sumalniyang balna yulnina yakna kidika

⁴⁵ Muih balna bitik dakawabangkat Jisas yaklau disainipil balna yakat aput diyulna:

⁴⁶ “Manna lā sumalniyang balna yakat amung talnauh, kat witingna laih prak nanaini kakawi dawak muih kalududuhwa pāni balna yakat rispik lani karuk diparasna atnin kidika dukih diawi. Papang yulni sumamalwa ūni balna yakat rispik sinini balna kidika wawalwi dawak di kasnin yakat laih pa yayamni balna kidika wawalwi;

⁴⁷ dawak muih yayal tingmak balna ūnina kidika dakyayakwi, dawak sihm witingna yayamwas kapat naini minitna yuyulwi. Witingna laih wah nuhni duduwarang ki.”