Luk 18 - Papang Yulni

Yal tingmak dawak wihta karak malni yulni

¹ Jisas yaklau malni yulni as diyulna dai amput kulninna bukwas ban kaput minitna yulninna kidika disumalna atnin yulni.

² Aput diyulna dai: “Tawan as yakat wihta as sakdai witing laih Papang yakat yamaniduwasdai dawak muih balna yakat bik rispik lani diawasdai.

³ Sihm kidika tawanni yakat yal tingmak as sakdai witing laih muih ūk karak kalbilna dai dawak wihta yakat kiunadai la kat kidika yamna atnin witing niningkauh yaklauwa muihni kidika niningyakat.

⁴ Wihta kidika laih ma mahni yal tingmak lani kidika yamnin yulwasdai, kaunah usnit kat aput kulna: ‘Papang yakat yamanidutasyang karang bik dawak muihni balna yakat risninapik lani diatasyang karang bik,

⁵ kaput kaunah, adika tingmak yal laih yauswa kidika dawas bahang, tanit dakki ki, baisa baisa kaiwi kulnik laihwatnik lani kidika disnin awas yulni.’ ”

⁶ Dawak Dawan yaklau minitlakwi yulna: “Wihta dutni kidika laih aput yulna dai.

⁷ Bahang yamni, ¿ais Papang bik witing walwi yakna balna kidika yakat tanitna dakwas karangyah, madah bitik dawak pukta bitik yakat kalyuyulwa balna kidika? ¿Diyulwakat tahahawarangpah?

⁸ Manayultayang tahawas tanitna dakwarang ki. Kaunah muih Walanibis al kidika kaiwarang mani kat, ¿sau akat muih balna rahm kulnin lani duduwa kidika baisa duduwa kat yakwarangpah?”

Fariseo muihni dawak tunan minit dakyang muihni karak malni yulni

⁹ Jisas yaklau adika malni yulni yulna dai muih buas balna la kat kaldakawi muih ūk balna yakat dutni diyayamwa dai kidika balna yulnina:

¹⁰ “Muih ahal bu makat yulnin ūni yakat minitna yulna uinadai: as kidika laih fariseo muihni dai dawak ūk kidika laih Roma dini tunan minit dakyang muihni as dai.

¹¹ Fariseo muihni kidika laih kasakni aput minityulwadai: ‘Papang, yang tingkih matayang kat muih ūk di malyang balna, dutni muihni balna dawak marid lani bahyang balna, dawak bik tunan minit dakyang muihni kidika kapat awasyang kidika yulni.

¹² Yang laih sandi as pasyakat wat bu yuh wauhtayang dawak ais dutayang kidika kaupak sahyakna salap kidika bik matayang.’

¹³ Kaunah tunan minit dakyang muihni kidika laih naikau watnadai, dawak minikpa balna kidika kisang yakat bik wauhyaklauwi talwasdai, kaunah pasni yakat bauwi aput yulwadai: ‘¡Papang, yang yakat mikun yatalah, yang laih dutni muihniyang adika!’

¹⁴ Manayultayang kidika tunan minit dakyang muihni kidika laih Papang yaklau dutni dawak diswakat ūni yakat kiunadai, kaunah fariseo muihni kidika laih kaput awasdai. Kat angdika muihni witing alas nuhni kalyamwa kidika laih, sau yakat lakna karangki; dawak angdika muihni sau yakat bukwa kidika laih, nuhni kalyamna karangki.”

Jisas yaklau muihbinina yakat blis diyamna kidika

¹⁵ Jisas yakat bik muihbinina uiwi kalalawadai, dilaihna atnin yulni; kaunah disaipil balna tatalna mani kat, duwi uiwa muihni balna yakat dibibilna dai.

¹⁶ Bahang Jisas yaklau diyulwak uiwakat diyulna: —Datanangkat muihbinina kidika yang yakat aiwang, dawak dilaihwawatwinih, kat Papang king kāwa sauni kidika laih witingna kapapat kidika dinina.

¹⁷ Barangni manayultayang angdika muihni kat Papang king kāwa sauni kidika sihm muihbin kapat duwas karangkat, kidika yakat kawas karangki.

Muih al di duyang as Jisas karak yulbauna kidika

¹⁸ Tunan muihni balna kidika kaupak as yaklau Jisas yakat kalyulwi dakana: —Maestro yamni, ¿ais yamtik ban sangka atnin lani kidika dukiyah?

¹⁹ Jisas yaklau nangnitlana: —¿Ais yulni yamni yatimahn? Yamni kidika laih aslah ki: Papang.

²⁰ Man lā balna kidika uman amanglataman: ‘Man marid lani bahwinih, muih īwinih, di malwinih, muih as kau bik alasni yulwinih, dawak papangma dawak nanangma yakat rispik diyamtah.’

²¹ Muih al kidika yaklau kalyulna: —Kidika dini balna bitik laih yamnayang wahmabin yang kaupak.

²² Kidika dakawi Jisas yaklau nangnitlana: —Baisa di as yamtasman: di balna dutaman kidika bitik bakanmukta muih miniknakunni balna yakat diatah. Kaput laih kisang yakat rits lani kidika duma. Usnit kat aiwa uskit uitah.

²³ Kaunah muih al kidika adika yulni dakana kat, uba palni kulnin bukna dai, kat di duyang dai kidika yulni.

²⁴ Kidika kaput kaltalwi Jisas yaklau kalyulna: —¡Di duyang balna Papang king kāwa sauni yakat kaninna kidika laih dadasni palni ki!

²⁵ Baisa isi ki kiamil as silip minikpa munah bayakna atnin dawak di duyang muihni as Papang king kāwa sauni yakat kanin karak dawakat.

²⁶ Dakakana muihni balna kidika yaklau kalyulwi dakakana: —¿Dawak wais laih laihwi yaknin lani kidika dunin sipyah?

²⁷ Jisas yaklau nangnitnalana: —Muih balna niningna yakat dadasni kidika laih Papang niningyakat dadasni awaski.

²⁸ Pita yaklau kalyulna: —Dawan, yangna laih dikina balna bitik damuktik man usmat uinayangna.

²⁹ Jisas yaklau nangnitnalana: —Barangni manayultayang angdika muihni Papang king kāwa sauni yulni ūni, yalni, wirahni balna, papangni balna, kidik awaskat walanibis balna dana kat,

³⁰ witing sangka mani balna yakat laih kidika kaput baisa minitkau duwarang ki, dawak sangnika tanitkau kaiwarang kidika yakat laih sangka ban atnin lani kidika duwarang ki.

Jisas witing daunin wat bas yakat yulna kidika

³¹ Jisas yaklau disaipil balna 12 kidika naikau diyulwakat uiwak aput diyulna: “Waralaih Jerusalén yakat mawi, kidika yakat di balna bitik kalahwarang ki prapit balna yaklau muih Walanibis al yulni uhulna kidika kaput.

³² Bahang pa ūk muihni balna tingnina yakat ahawarang ki, dawak witing yakat sarahni kaltatalwarang ki, niningkauh dutni kalyuyulwarang ki dawak bik susuihwas kaltutuhwarang ki.

³³ Babauwarang ki dawak ihiwarang ki; kaunah ma bās yakat watwi yaklauwarangki.”

³⁴ Witingna laih kidika dini di as bik amanglalawasdai ais yulni diyulwapa, bahang kidika dini balna laih witingna amanglaninna dini awasdai.

Jisas yaklau Jericó yakat muih minikpa di talwas as yakat yamni kalyamna

³⁵ Jisas witing Jericó yakat kiwi kanin manah ulis dana mani kat, muih minikpa di talwas as ta yaihnit yakat yalahna lalah yulwasakdai kidika,

³⁶ muih mahni bayayakwakat dakawi, yulwi dakana dai ais kalahwapa.

³⁷ Jisas Nazaret kaupak kidika bayakwi kalatwi kalyuyulna dai,

³⁸ dawak witing laih parasni sarahwi aput yulna: —¡Jisas, Devid Walanibis, yang yakat minikun yatalah!

³⁹ Tuna yakat uiwabang muihni balna kidika yaklau bibilna dai ap dana atnin, kaunah witing laih baisa parasni sarahwadai: —¡Devid Walanibis, yang yakat minikun yatalah!

⁴⁰ Jisas laih watwi diyulna dai duaiwi kalana atninna. Yaihnit yakat kaina mani kat, aput kalyulwi dakana:

⁴¹ —¿Man yulma ais yamnik kidika dukih mawih? Muih minikpa di talwas kidika yaklau nangnitlana: —Dawan, mikpa kidika di talnik dukih yawi.

⁴² Jisas yaklau kalyulna: —¡Man mamakpa dutah! Man rahm kulnin lani dutaman kidika yulni yamni mayamna.

⁴³ Kidika minitni yakat muih minikpa di talwasdai kidika laih di talna dai, dawak Jisas usnit uiwi kiunadai Papang yakat ayangni nuhni yamwīnah. Dawak muih balna mahni tatalna kidika bik Papang yakat ayangni nuhni yayamna dai.