Luk 17 - Papang Yulni

Dutni yakat buknin yamadangni kidika

¹ Jisas yaklau disainipil balna yakat diyulna: “Di dutni kidika laih ban kaput kaiwarang; kaunah ¡alakaih angdika muihni yaklau muih ūk balna yakat diyamwakat dutni yayamwarang kidika laih!

² Baisa yamni karangki dinimak yakat kipala kau sitwi kuma yakat ruhm'ahawarang kat, adika dibinina yakat diyamwakat dutni yayamwarang kidika karak dawakat.

³ ¡Manna amung talnauh! “Man wirahma kidika dutni yamwa kat, biltah; kaunah di yamwa balna kidika wirlawarang kat, dutni datang diswang.

⁴ Ma as pasyakat wat tiaskaubu man namangkauh dutni yamwi dawi kaiwi wat tiaskaubu aput mayulwarang kat: ‘Wattik kaput yamtas awaki’, man lawa dutni datang disnin karangki.”

Rahm kulnin lani parasni kidika

⁵ Apostel balna yaklau Dawan yakat kalyuyulna: —Rahm kulnin lani kidika baisa mayatah.

⁶ Dawan yaklau nangnitnalana: —Manna rahm kulnin lani kidika dutamana kat laih, mustat minik kaput dai karang bik, adika panan yakat kalyulnamna sipdai: ‘Akaupak dutta alahwa kuma yakat yawa kaldahtah’, dawak yulmana dakawarang ki.

Muih di yamyang witing di yamnin dini kidika

⁷ “Manna kaupak as di yamyang muihni as dutamana kat di dahnin pāni kaupak sau tukwi kidik awaskat tinglau balna maintalwa sakkauna nawatwi kaiwakat, ¿ais aput kalyultamahn: ‘Ū pasyakat āwa di kastah’?

⁸ Dikah, kaunah aput kalyultaman: ‘Masan kasnin dini kidika ridi yamta yatah, dawak diki balna kidika yamta awah yang laih di kastik dawak ditayang kat. Usnit kat man di kasma dawak bik dima.’

⁹ Dawak dima yamyang yakat kalyultang kat dima yamwi mana kidika yulni bik tingkih kalyultasman.

¹⁰ Kaput bik manna, Papang yaklau yamnin manayulna kidika bitik yamta datanama usnit kat, aput yultanama: ‘Yangna laih di yamyang dudutni yangna, kat yangna yamnikna dini dai kidika laih bitik yamnayangna bahang.’

Jisas yaklau pilau muihni balna salap yakat yamni diyamna kidika

¹¹ Jisas laih Jerusalén yakat kiwi Samaria dawak Galilea sauni munah bayakna dai.

¹² Dawak tawan bin as yakat kiwi kawakat, pilau duyang ahalni balna salap witing niningkauh aiwi naikau wawatna dai

¹³ aput sarahwinah: —¡Jisas, Maestro, yangna yakat miknakun yanatalah!

¹⁴ Jisas yaklau ditalwi aput diyulna: —Sumalyang balna muhnina yakat yawanauh. Dawak uiwabang kat sikninanis kidika kaupak yamni diyamna dai.

¹⁵ Witingna kaupak as kaltalwakat sikninis kaupak yamni kalyamna kat, sarahwi Papang yakat ayangni nuhni yamwīnah nawatwi kaina dai,

¹⁶ dawak Jisas muhnit yakat limbabahwi sau kat abukwi tingkih kalana dai. Adika alni laih Samaria kaupakdai.

¹⁷ Jisas laih aput yulna: —¿Ais witingna muih salap awasdaih sikninanis kaupak yamni diyamna kidika? ¿Ūk balna tiaskau arungka kidika laih angkat bangyah?

¹⁸ ¿Adika pa ūk muihni adika manah kulnin wirlanayah Papang yakat ayangni nuhni yamna atnin?

¹⁹ Dawak muih al yakat aput kalyulna: —Lawah dawak yawah; rahm kulnin lani dutaman kidika yulni yamni mayamna.

Papang king kāwa sauni amput kaiwarang kidika

²⁰ Fariseo muihni balna yaklau Jisas yakat kalyulwi dakakana dai mampat Papang king kāwa sauni kaiwarang kidika, dawak witing yaklau nangnitnalana: —Papang king kāwa sauni kaiwarang kidika laih muih balna bitik talninna dini awaski.

²¹ Sip aput yulwas karangki: ‘Akat sakki’, kidik awaskat ‘Yakat sakki’; kat Papang king kāwa sauni kidika laih manna pasmangna yakat uman sakki.

²² Dawak disainipil balna yakat diyulna: —Muih Walanibis al mani kidika talkih mananin mani kiwi kawarangki, kaunah talas awanama ki.

²³ Muih buas kidika balna laih aput yuyulwarang: ‘Akat sakki’, kidik awaskat ‘Yakat sakki’; kaunah manna uiwinih dawak bik usnitna uhuiwinih.

²⁴ Kat alwana lapwakat kisang sutni kaupak sutni nakas kat yaringni kidika, muih Walanibis al kidika laih kapat karangki nawatwi kainin mani yakat.

²⁵ Kaunah tatuna laih wauhnin mahni palni wauhnin karangki dawak adika mani muihni balna yaklau dutni bik kaltalninna karangki.

²⁶ Noa mani balna yakat bayakna kapat, sihm kapat bayakwarangki muih Walanibis al kaiwarang mani balna kidika.

²⁷ Muih balna kidika laih di kakaswadai, didiwadai dawak bik marid kalalahwadai, Noa kuring yakat kana mani kat kidika, dawak was nuhni āwakat bitik dadauna dai.

²⁸ Lot mani balna yakat bik kapat kalahna dai: muih balna kidika laih di kakaswadai, didiwadai, di bakakanwadai, wauhwi bakakanwadai, di dadahwadai dawak bik ū papakwadai;

²⁹ kaunah Sodoma tawanni nuhni kaupak Lot kalahwi kiuna mani kat, kisang kaupak kuhpau dawak sulhpa karak uhwakat muih balna bitik dadauna dai.

³⁰ Kapat karangki muih Walanibis al kidika kalahwarang mani kat.

³¹ “Kidika mani, angdika muihni ū tuna yakat sakkarang kidika, dawak ū pasyakat dini balna bangkarang kat, yaklakwi yaknin awaski; dawak angdika muihni di dahnin pāni yakat sakkarang kidika laih, ūni yakat nawatwi kiunin awaski.

³² Lot yalni dai kidika yakat ismangnakattanauh.

³³ Angdika muihni sangnika laihtik yakkuh tarang kidika laih diswarang ki; kaunah angdika muihni diswarang kidika laih, laihwi yakwarangki.

³⁴ “Manayultayang kidika puknita payahnin pāni yakat muih bu bangkat as kidika laih duwi kiuna karangki dawak ūk kidika laih dana karangki.

³⁵ Muih yayal bu libitni kiwatak tikwarau kat, as kidika laih duwi kiuna karangki dawak ūk kidika laih dana karang ki.

³⁷ Bahang kalyulwi dakakana: —¿Dawan kidika dini angkat kalahwarangyah? Dawak witing yaklau nangnitnalana: —Muih dauna muihninuh angkat tuskarang kidika, kidika yakat upam balna kidika kalududuhwarang ki.