Levítico 9 - Papang Yulni

Aarón witing sumalyang warkni yamna

¹ Ma tiaskaubās yakat Moses yaklauwi Aarón dawak walanibis balna yakat diyulna witing yakat uina atnin, dawak Israel muihnibararak balna kidika bitik.

² Dawak Aarón yakat kalyulna: “Turuh almuk as dutah muih dutni yamna kidika sakripais yamna atnin, dawak kuts almuk bik as duta karauni kauna sakripais yamnin kidika, dawak Papang muhni yakat duyawah.

³ Dawak Israel balna yakat di yultang kat kuts almuk as duwi uiwang muih dutni yamna kidika yulni sakripais yamnin dawak kaput bik turuh almuk as, dawak sīp bin as, dawak bupak laih baisa kurih lalaihwas atninki, dawak bik sakahwa awas atnin, bahang kaput laih karauni kauna sakripais busnin,

⁴ dawak turuh almuk as kaput bik kuts almuk kidika balna laih Papang muhni tani yakat īna karang, watwi Dawan karak yamni kalahnin sakripais busnin. Kaput bik minitdis kalanin dini plawar kidika disala karak āwi laihna kidika duaiwang; kat warmani Papang kidika laih kalahwarang bahang witingna yakat.”

⁵ Israel balna witingna duwi uina dai kalpaknin ūni labanni muhnitkat, Moses yaklauwi dipakna dai kaput, dawak kaput laih muih balna kidika bitik laih yaihnit yakat uina dai, dawak Papang muhni tani yakat witingna yaklauna bangdai.

⁶ kaput laih Moses yulna: “Adika kuduh Papang yaklauwi pakna yamna atnin. Yamtanauh, Papang manna yakat lāih kalahna karang witing alasnina yaksihni nuhni kidika bitik.”

⁷ Usnit kat Moses yaklauwi Aarón yak kalyulna: “Sakripais busnin pāni yaihnit yakat isyawah dawak dutni yamna yulni sakripais yamnin duainaman kidika yamtah, tinglau karauni sakripais buswa kat muih dutni dawak diswa kidika, dawak Israel balna dutnina bik kaput bik laih minitdis kalanin dini Israel balna duwi aina kidika dutnina dawak disnin yulni, kidika yamtah, Papang yaklauwi pakna kaput yamna atnin.”

⁸ Aarón witing sakripais busnin pāni yaihnit yakat īskiwi, turuh almuk witingna dutnina yulni duaina kidika dinimak dakna.

⁹ Dawak usnit kat witing walanibis ahal balna kidika yaklauwi kidika witing yaihnit yakat duwi uiwak, witing tingni yakat laihwi dawi sakripais busnin pāni kau tamni balna yakat kahna, dawak āni sutni bayakna kidika laih sakripais busnin pāni sar yakat utuhna.

¹⁰ Usnit kat salani kidika sakripais busnin pāni minit yakat ilwi busna, kihnimak balna, isning lamani yaihnit kau salani balna bik witingna dutnina yulni tinglau sakripais yayamwa kidika, Papang yaklauwi Moses yakat yamnin paknadai kaput.

¹¹ Kaunah muihni dawak unitak kidika laih ū labanni kaupak ahni yakat yakwi busna.

¹² Aarón witing tinglau karauni kauna sakripais busnin duahaina kidika bik dinimak dakna, dawak āni kidika walanibis ahal balna witing yakat duwi uiwak, Aarón yaklauwi sakripais busnin pāni minit yakat dawak yaihnit yakat dawak yaihnit yakat bik utuhna.

¹³ Usnit kat duwi uina tunan kidika, dawak dimuihni dakna balna dai kidika, karauni kauna sakripais busnin dini kidika, dawak kaput laih Aarón witing sakripais busnin pāni minit yakat ilwi busna;

¹⁴ usnit kat bāni kau kidika balna sahna dawak barahnimak balna bik, dawak sakripais busnin pāni yakat ilwi busna, sihm tinglau karauni kauna ilwi busna kapat.

¹⁵ Aarón witing, Israel balna minitdis kalanin duwi aina dai kidika bik dukiuna dai. Tawan dutni yamna yulni kuts almuk sakripais yamnin duwi aina dai kidika bik duwi kiwi dinimak dakna, muhni lau kalahnin dini witingna dutni yayamna yulni duwi aiwi yayamna dai kaput.

¹⁶ Tinglau as karauni kauna sakripais buswa lani āna yakat yamna dai.

¹⁷ Usnit kat minitdis kalanin dini plawar minik bung duwi sakripais busnin pāni minit yakat busna mapiris nining kauh, tinglau karauni kauna, sakripais buswa kidika minit yakat.

¹⁸ Aarón witing turuh almuk dawak kuts almuk bik Israel balna duahaina dai kidika dinimak dakna, Papang karak watwi yamni kalahnin yulni sakripais bubuswa kidika. Witing walanibis ahal balna yaklauwi duwi uiwak ā kidika, laihwi sakripais busnin pāni minit dawak yaihnit balna yakat bik, utuhna.

¹⁹ Kaput bik laih turuh salani, dawak kuts salani kidika bik kalalana, mamahni, bāni salani balna, kihnimak balna, dawak isning yaihnit kau salani balna bik,

²⁰ dawak salani balna kidika, pasni kidika karak libitwi lakna dai. Kaput Aarón yaklauwi salani balna kidika sakripais busnin pāni minit yakat ilwi busna,

²¹ kaunah pasni balna dawak barahnimak tingni palni nining kauh kidika balna laih, amput Papang yakat duwi kiunin yamwa tanka balna kidika manah yamna dai, Papang yaklauwi Moses yakat amput yamnin pakna dai kaput.

²² Aarón witing Israel balna minitna yakat tingni dulauwi blisyamna, dutni yayamna yulni sakripais yamwi, karauni kauna buswi sakripais yamwa kidika yamni dawak, watwi Dawan karak yamni kalahnin sakripais buswa kidika bik yamwi dawi, mahka kalahwi kiuna sakripais busnin pāni kaupak.

²³ Usnit kat Moses dawi Aarón karak kalpaknin ūni labanni yakat uiwi kakana, dawak watwi nawatwi kalalahna yakat Israel balna yakat blisyamna. Kaput dawak Papang kidika lāih kalahna alasnina yaksihni bitik tawan bitik muhni yakat:

²⁴ Papang muhni tani yakat kuhpau as kalahna dawak tinglau busnin yakna dai kidika bitik busna dawak salani balna sakripais busnin pāni minit yakat ilna dai kidika bitik. Kidika talwi, Israel balna bitik alasna duwi sararahna, dawak limbabahwi muhnina sau kat lalakna.