Levítico 8 - Papang Yulni

Aarón dawak walanibis bik Papang dini kalnin kidika

¹ Papang yaklauwi Moses yakat kiwi kalyulna:

² “Aarón dawak walanbis ahal balna kidika duta data sumalyang balna praknina bik duma, dawak Papang dini yakwi tunan yakat dia utuhwa dini kidika bik, dawak kaput bik muih dutni yulni sakripais yamwa tuniruh almuk kidika bik, dawak kuts ahalmuk bu dawak plawar pupuhnin dini āwas busna kidika uslun kau puna kidika,

³ dawak muih balna kidika bitik uduhtah kalpaknin ūni labanni kiwikawa yakat.”

⁴ Moses witing Papang yaklauwi pakna kaput yamna, muih balna kidika kalpaknin ūni labanni kiwikawa yakat kal uduhna.

⁵ Kaput laih Moses yaklauwi muih balna yakat diyulna: “Adika kuduh Papang yaklauwi pakna yamna atnin.”

⁶ Usnit kat Moses yaklauwi yamna Aarón dawak walanibis ahal balna kidika yaihnit yakat uina atnin, kaput laih yaihnit yakat uiwak was kau disuhna.

⁷ Usnit kat Aarón yakat prak lalamni baini kidika āna, dawi banimak yamni sitna dawak minit yakat ūk muklakna, usnit kat minit yakat Efod kidika āna dawak yamnin sitna.

⁸ Usnit kat minit yakat pasni ānin dis kidika āwi kalana, dawak pasni kau alahwa kidika pasyakat Urim dawak Tumim kidika āna dai.

⁹ Usnit kat tunan yakat paknin, dawak witing minit yakat, muhnit tani niningyakat gol pīsni labanni kau ulna kidika ilna dai bahang kidika yaklauwi laih sumalyang as Dawan dini kalyakwadai, Papang yaklauwi kalyulna kaput.

¹⁰ Usnit kat Moses yaklauwi Papang dini yakwi dia utuhwa dini kidika duwa maisihni dis pāni minit yakat utuhna dawak kidika yakat di balna bangkidika bitik yakat, dawak kaput laih yamwi Papang dini yakna dai.

¹¹ Sihm diani yakau sakripais busnin pāni yakat wat tiaskaubu raswi bayakna, dawak sakripais busnin pāni minityakat, kaput bik di yusyamwa dini balna minit yakat, tingsuhnin dini minit yakat bik utuhwi lana, kidika laih Papang dini kalna atnin yulni.

¹² Kidika usnit kat Moses yaklauwi Aarón tunan yakat dia utuhna, sumalyang kapat kalyamnin Papang dini.

¹³ Aarón walanibis balna bik diyulwak yaihnit yakat uina, dawak praknina āna, baninamak sitna, tunanina yakat bik asna sitna, Dawan yaklauwi pakna dai kaput.

¹⁴ Kidika usnit kat Moses yaklauwi pakwak turuh almuk wahma bin kidika duwi uina, muih dutni yamna yulni sakripais yamwa dini kidika, Aarón dawak walanibis balna karak tingnina yuyuna tinglau tunan yakat.

¹⁵ Kaput dawak Moses yaklauwi tunan dakna, dawak āni kidika tingni kau duwi dawi, sakripais busnin pāni tamni balna yakat kahna, kaput yamwi maisihnidis yamna atnin, āni baisa sutni watna kidika laih sakripais busnin pāni sar yakat utuhna. Kaput laih sakripais busnin pāni kidika Papang dini kalna, kidika munah muih dutni dawak disnin kidika duna atnin.

¹⁶ Kidika usnit kat, Moses witing, bani salani balna kidika bitik duna, dawak isning dawak kihnimak balna minitkau salani duwa balna kidika bik duna, dawak kidika balna ilwi busna sakripais busnin pāni yakat;

¹⁷ kaunah tuniruh muihni as balna kidika laih, yuldarang kat unitak, muihni dawak ruhmnin dini kidika laih, ū lababanni balna kidika kaupak naikau yakwi busna, Dawan yaklauwi yamnin paknadai kaput.

¹⁸ Moses yaklauwi pakna sīp almuk kidika yaihnit yakat duwi uiwarang, karauni kauna sakripais busnin dini kidika, Aarón dawak walanibis balna karak tinglau kidika tunani minityakat tingnina yunin.

¹⁹ Kidika usnit kat Moses yaklauwi dinimak dakna, dawak kidika āni kau sakripais busnin pāni yaihnit balna kidika yakat rasna,

²⁰ dinimuihni kidika sahrna, dawak tunan kidika busna, sahrna balna kidika dawak salani bik;

²¹ kidika usnit kat bani balna kidika dawak barahnimak kidika, was kau suhna, dawak bitik laih sakripais buswa pāni yakat ilwi busna, kidika laih walapni yamni as Dawan yakat, Dawan yaklauwi yamnin pakna dai kaput.

²² Kidika usnit kat Moses yaklauwi pakna sīp almuk ūk kidika duwi kiunin, Papang dini yaknin kat, prinias kapat yamwa kidika yamnin, Aarón dawak walanibis balna karak tinglau minit yakat tingnina yuyuna.

²³ Kidika usnit kat Moses yaklauwi dinimak dakna, āni kidika apis duwi Aarón tani sutni yakat kahna, tingnipal niningyakauh kidika, tingni bikis nuhni kidika, kalni tuna yakat bik, kidika bitik laih tingnipal kau manah dai.

²⁴ Kidika usnit kat, Aarón walanibis balna yakat bik diyulwak yaihnit yakat uiwak sihm kaput dikahna dai, dawak āni sutni kidika sakripais busnin pāni yaihnit yakat rasna dai.

²⁵ Kidika usnit kat Moses, witing salani balna kidika duna, mamahni, bani salani balna kidika bitik, dawak isning minitkau salani kidika bik, kihnimak bupak dawak salani kidika dawak barahnimak tingni palni kauh kidika bik duna.

²⁶ Uslun bin kau plawar pupuhnin dis āwi busna kidika, Dawan muhnit kau lakwa kidika, dawak Moses witing plawar pupuhnin āwas kuruhwi busna kidika bik duna, plawar kuruhwi disala karak āwi busna kidika, plawar laihwi baini dawi kiswi dawi minit yakat damni kahna kidika balna bitik laih libitwi lakna, salani dawak barahnimak balna kidika karak libitwi;

²⁷ kidika usnitkat, dini balna kidika bitik Aarón dawak walanibis balna tingnina yakat āna, kaput laih amput dawan muhni yakat duwi kiunin kidika yamna atnin.

²⁸ Kidika usnitkat, witingna tingnina kaupak Moses duna, dawak sakripais karauni kauna buswa kidika karak libitwi busna, minit dis kalnin dini walapni as: dawak bik kidika laih Dawan risnipik kau busna.

²⁹ Kidika usnit kat Moses witing duna, pasni kidika, dawak amput Dawan muhni yakat duwi kiunin prinias kapat kidika yamna. Kidika muihni pīsni laih Papang dini yaknin karang kat kidika kau duwi yamwi, bahang Moses laih kidika laihna, Dawan yaklauwi pakna dai kaput yamnin.

³⁰ Kidika usnit kat Moses witing apis duna Papang dini yaknin diani kidika, dawak ā bik sakripais busnin pāni kau sakdai kidika bik, dawak Aarón, walanibis balna bik minitna yakat rasna, dawak witingna praknina sumalyang prakni kidika balna bitik.

³¹ Kidika usnit kat Moses yaklauwi Aarón dawak walanibis balna yakat bik diyulna: “Di muihni kidika lahtanauh, kalpaknin ūni kiwikawa yakat, dawak kidika pāni yakat kastanauh, uslun bin kau plawar buswi puna sakkidika karak, Dawan yaklauwi yayulna dai kaput: ‘Aarón dawak walanibis balna bik kakaswarang adika dimuihni.’

³² Kidika usnitkat, sutni balna bayakwarang kat bustanauh,

³³ dawak manna naikau kalalahwinih, kalpaknin ūni labanni kiwikawa kidika kaupak, ma tiaskaubu kat, kidika mani kaput bayakwak Papang dini kalalahwi.

³⁴ Dawan yaklauwi yulna, manna dutni yamnamana kidika dawak disnin kat, warmani yamna kaput yamnin karang.

³⁵ Kaput bahang, manna wattanama pukta madah, kalpaknin ūni labanni kau kiwikawa yakat, ma tiaskaubu. Dawan yamnin yulna balna kidika yamtanauh, kaput laih dautas awanama, kidika yulni balna kuduh dunayang dai kidika.”

³⁶ Aarón dawak walanibis balna karak, witingna yayamna dai Dawan yaklauwi yamnin yulna dai kaput, Moses munah.