Levítico 7 - Papang Yulni

Pātni yulni sakripais amput yamnin kidika sumalna

¹ “Pātni yulni sakripais yamnin kidika balna laih maisihnidis palni. Bahang kidika yamnin laih aput yamnin karang ki:

² Pātni yulni tinglau as dukiwa kidika, tinglau ihiwa pāni yakat dukiwi dinimak daknin karang, bahang kidika laih busnin dini karang dawak āni kidika laih rasnin karang sakripais busnin pāni kidika minit yakat dawak yaihnit balna yakat bik.

³ Tinglau salani kidika laih bitik palni kalanakarang ki: mamahni kau duwa kidika, dawak bāni paskau duwa kidika bik,

⁴ kihnimak bu kidika dawak salani mukna duwa sak kidika, dangni kau salani duwa kidika, kaput bik isning yaihnit kau salani kidika balna bitik libitwi kihnimak balna karak yakna karang.

⁵ Usnit kat sumalyang kidika yaklauwi sakripais busnin pāni minit yakat ilwi busna karang, minitdis kalanin dini Papang ayangni kau busna as. Kidika laih pāt duwa kidika yulni sakripais busna,

⁶ dawak sumalyang balna bitik sip karang kidika dini kasna atnin, kaunah kidika laih pa as Papang dini yakna pāni yakat sip karang yamna atninna kat kidika dini laih maisihni dis palni bahang.

⁷ “Pātni yulni sakripais yamwa kidika laih, sihm dutni yamna kat sakripais yamwa kapat ki, dawak amput yamnin balna sumalwa kidika sihm bupak kapapatki duaina dini kidika laih sumalyang witing warkni yamwa kidika dutni dawak disnin yulni, witing dini karang dini balna duaina kidika.

⁸ Sihm kaput bik laih sumalyang kidika sakripais yamwarang kat, muih as sakripais karauni kauna busnin kidika duaiwakat, sakkarang unitak kidika sumalyang witing duna atnin.

⁹ Kaput bik laih minitdis kalanin dini plawar kat bitik ban āwi buswi duaina balna kidik, sumalyang witing wark yamwa kidika duna karang.

¹⁰ Sihm kaput bik laih minitdis kalanin dini plawar kat duaina kidika, disala karak āwi laih, kidika awaskat buhni duaiwarang bik, kidika balna kidik Aarón sulani balna bitik dinina karang, bahang kapapat sahyakwi duduwarang.

Dawan karak watwi yamnin kalahnin yulni amput sakripais yamnin kidika sumalna

¹¹ “Sumalna balna kidika adika ki, watwi Dawan karak yamni kalahnin kat amput sakripais yamnin kidika papang muhni yakat:

¹² Sakripais kidika tingki dini as karang, kat plawar kuruhwi busna bik duwi kiunin karang, disala karak awi busna kidika, kaput bik plawar pupuhnin dini dis laihwi baini dawi busnin minit yakat disala karak rasna kidika, dawak kaput bik plawar tanit yamnin kidika disala karak āwi laihna kidika bik;

¹³ dawak, tingkih kalanin sakripaisni kidika dawak Dawan karak yamni kalahnin karak libitwi dawi plawar kuruhwi pupuhnin dis busna kidika karak duwi kiuna karang.

¹⁴ Minitdis kalanin dini duaina balna bitik kau apis duwi Papang yakat duwi kiuna karang, kalawa dini kidika, dawak angdika sumalniyang kat sakripais yamwa āni raswa kidika watwi yamni kalahnin yulni sakripais buswa kidika dini laih witing duwarang.

¹⁵ “Tingki kalawa yulni, Dawan karak watwi yamni kalanin yulni tingkih kalanin dawak sakripais buswa dini muihni balna kidika laih, duwi kiwa mani kasnin karang, apis bik danin-awaskarang ma payahwak kau dini.

¹⁶ Tinglau as dukiwa kidika pramis as yulni kat dukiwa kat, kidika awas bik witing silp kulnin lani minitdis kalanin dini as dukiwakat, sihm kidika mani bitik kasna atninki, sutni watwarang kat sipki payahwak kau bik kasna atnin;

¹⁷ ma bās kat dimuihni kidika baisa bangkarang kat, bitik busna atnin karang.

¹⁸ Muih as kat ma bās bayakwak, Dawan karak watwi yamni kalahnin sakripais busna dini muihni kidika kaswarang kat, kidika sakripais laih duwas karang dawak kulnin bik awas karang, dawak dini muih kidika laih dutni kulna as karang. Wais kat kidika dini muihni kaswarang kat, kidika dutni laih witing trukna karang.

¹⁹ “Dimuihni kidika, di as dutni maisihni kulna kidika karak libitna, kidika awaskat uswi bayakna karang kat, kasnin sip-awaskarang, kaunah kuh kau busnin karang. “Maisihni dis balna kidika bitik sipkarang di muihni kasna atnin.

²⁰ “Muih as witing kidika muihni yakat maisihni dutni karang, kaunah ban kaput, Dawan karak watwi yamni kalahnin yulni sakripais busna kidika Papang yakat bahang kidika muihni laih tawan pas kaupak yakwi ipamna karang.

²¹ “Muih as kat maisihni dutni kalna kidika laihwarang kat —muih karang pa tinglau karang kidika awaskat di ūk balna dutni kulna kidika—, dawak usnit kat Dawan karak watwi yamni kalahnin yulni sakripais mana kidika Papang yakat kidika dini kaswarang kat, kidika muihni laih īna atnin karang.”

Salani dawak ā kidika bik amput yamnin kidika sumalna

²² Papang yaklauwi kiwi Moses yakat kalyulna:

²³ “Israel balna yakat aput diyulta: Turuh salani, sīp salani dawak kuts salani balna kidika kasnin awas ki.

²⁴ Tinglau dauna, kidika awaskat nawah yaklawi īna balna salani kidika salani laih sipki ais yakat duwi yusyamna atnin, kaunah kasnin laih awaski.

²⁵ “Wais karang bik, Papang yakat minitdis dini uiwi kalawak busna salani kidika, kaswarang kat, kidika muihni laih īna atnin karangki.

²⁶ “Manna angkat yalahtanama kat, di lawani balna tinglau āni balna kidika kasnin-awaski.

²⁷ Angdika muihni ā kaswarang kat kidika muihni laih dauna atninki.”

Sumalyang witing dini karang kidika

²⁸ Papang yaklauwi Moses yakat kiwi kalyulna:

²⁹ “Israel balna yakat diyulta, angdika muihni Papang yakat sakripais dukiwarang kat watwi Dawan karak yamni kalahnin yulni, bahang kidika dini laih Papang muhni kat dukiuna atnin karang.

³⁰ Witing silp tingnina kau duwi uina karang Papang muhni tani yakat minitdis kalnin dini busna kidika, pasni kau salani duwa kidika dawak pasni kidika palni bik, Papang muhni yakat amput duwi kiunin balna kidika kat yamna atnin.

³¹ Sumalyang yaklauwi salani balna kidika sakripais busnin pāni yakat ilwi busna karang, kaunah pasni kidika laih Aarón dawak sulani balna karak dinina karang.

³² Dawak watwi Dawan karak yamni kalahnin yulni tinglau duaina kidika barahnimak tingni palni niningkauh kidika laih sumalyang yakat kalana karang.

³³ Kidika tingnipal nining kauh barahnimak sumalyang dini karang, kidika salalani dawak āni kidika bik sakripais yamnakarang, Dawan karak watwi yamni kalahnin sakripaisni kidika,

³⁴ Israel balna, watwi Dawan karak yamni kalahnin sakripaisni yang akat yayamwa kidika pasni kidika dunayang minitdis kalanin dini tanit yamni as. dawak barahnimak kidika laih, dauh ilp as kalana karang, bahang kidika laih sumalyang Aarón yakat kalanayang dawak sulani balna yakat bik bahang kidika balna laih ban kaput witingna dinina duduwa karang, minitdis dini Israel balna duwi aiwa kidika.”

³⁵ Minitdis kalanin dini buswa kidika Papang ayangni nuhni kau, adika pīsni dakna balna kidika Aarón dawak witing sulani balna dinina karang, papang yaklauwi angdik mani kaupak sumalyang kapat witing dini yakwi duna mani kaupak.

³⁶ Papang yaklauwi Israel balna yakat pakna diana atnin, angdika mani kaupak witing dini yakwi duna kidika bahang kidika witingna ban kaput yamwa atninki papangnina kaupak walaninabis balna kat.

³⁷ Adika sumalna balna kuduh, sakripais karauni busnin kidika amput yamnin kidika, minitdis kalanin dini plawar minik kidika, dutni yamna yulni dawak pātni yulni bik, minitdis kalanin dini Papang dini yakna kidika, dawak Dawan karak watwi yamni kalahnin yulni sakripais buswa kidika.

³⁸ Papang yaklauwi Moses yakat kalana Sinaí asangni yakat, wanilang yakat dipakna dai kidika minitdis kalanin dini kidika duwi uina atnin.