Levítico 25 - Papang Yulni

Yak-urupdinin dawak laihwi yaknin kurihni kidika

¹ Papang yaklauwi Sinaí asangni yakat kiwi Moses yakat kalyulna:

² “Israel balna yakat aput diyultah: Yang lawik sau manaki yakat āwanama mani kat, sau kidika yak-urupdinin karang ki Papang risnipik kau.

³ Manna saumana kidika kurih tiaskauas di dahtanama. Kaput bik laih kurih tiaskauas wainmana tingni nanaiwa balna kidika dakta awanama, dawak minik balna bik dakta awanama,

⁴ kaunah kurih tiaskaubu laihwa yakat laih sau kidika kalatanang yak-urupdana karang papang risnipik kau; kidika kurihni di dadahwinih dawak bik wainmana balna tingni nanaiwa kidika daknamna awaski.

⁵ Kaput bik laih plawar bahta dulautanama pāni yakat watwi ukuswi kalahwi minik yakna balna kidika bik bahnamna awaski, kaput bik laih wainmana balna tingnisut nanaini balna daktas mana kat minik yakna balna kidika bik minik balna kidika daknamna awaski; sau kidika laih bitik palni yak-urupdana atnin ki.

⁶ Sau kidika witing silp yaklauwi minik yakwa balna kidika urupwa mani balna yakat, kidika laih manna kastanama, dimana yamyang ahal dawak yayal kidika balna bik kakaswarang, kaput bik wark yamyang, dawak pa ukkaupak muihni balna manna pasmangna yakat yalalahwa kidika kakasna karang,

⁷ kaput bik laih tinglau turuh balna kapat bik kakasna karang dawak asangpas dini anyang balna bik kakaswarang. Sau minik yakwa balna kidika bitik, kasnin dini balna karang.

⁸ “Manna kulnamnaki kurih pasyakat ma tiaskaubu, yuldarangkat, kurih tiaskaubu kidika wat tiaskaubu minit yakat lakwi kulnin, bahang kaput laih kulwi yakwak kaiwi kalahwarang kurih 49,

⁹ waiku tiaskaubu laihwa kaupak ma salap kāwa yakat, kidika laih dutni dawak disna mani, bahang sīp almuk tamni kidika puhtanama, saumana kidika bitik yakat.

¹⁰ Kurih 50 laihwa yakat laih manna holi kulnamana karang kidika kurihni, dawak kidika kurihni laihwi yakna kurihni karang, bahang kidika yakat manna saumana bitik yakat yulna karang muih balna bitik laihwi yakna kidika. Muih ahal bitik kidika wanaihnina pasningna yakat uiwi kakana karang, dawak saunina dai kidika watwi kawi duduna karang.

¹¹ Kurih 50 kidika manna namangna yakat laihwi yakna kurihni as karang, bahang kidika yakat manna di dahnamna awaski, dawak plawar minik witing silp ukuswi kalahna kidika daknin awaski, dawak wain tingni nanaiwa balna kidika daknin awaski, dawak minik balna bik daknin awaski,

¹² kat kidika kurihni laih holi, dawak bik laihwi yakna kurihni bahang manna namangna yakat. Sau yaklauwi silp diminik balna yakwa kamanah kastanama.

¹³ “Laihwi yakwa kurihni akat manna saumana yakat watta awa dutanama.

¹⁴ Muih as kat, sau wauhwi bakanwarang muih ūk yakat, kidika awaskat bakanwi duwarangkat, alas kalyulwi dunin awaski;

¹⁵ bakanwi duwa muihni kidika witing minitlaunin ki, laihwi yakna kaupak ma ampus bayakna kidika praisni kat minitlauna karangki, dawak bakanpamwa muihni kidika witing minit praisni kulnin ki baisa watyapak di minik bahwi dulauwarang praisni kat:

¹⁶ baisa kurih yapak sippa di dahwi minik yaknin, kaput kat baisa minit nuhni karang, baisa kurih bulah karangkat, minit kidika dibin karangki, kat bakanwi duwa kidika laih.

¹⁷ “Muih as kau bik di minit bayak yamwinih Papang yakat nuhni kultanauh, kat yang kuduh manna Papangmana yang.

¹⁸ Yang laki balna yakat yamtanauh. Yulna yang kaput yamtanauh kaput laih ismangnalak saumana yakat yalahtanama;

¹⁹ sau kidika minik yakna karang, dawak manna laih kidika yak ismangnalak yalahtanama, dawak diminik balna kidika kastanang ismangnalak dawarang.

²⁰ “Sipkat manna yulta dakanama: ‘¿Kurih tiaskaubu laihwa yakat ais kasdarangyah, di dahnin dawak diminik bahnin bik sip-awas mayang adika?’

²¹ Kaput kat yamni ki bahang kurih tiaskauas yakat blisinki sihting kaiwarang, bahang di minik bahtanama kidika aitani karang kurih bās laihnin praisni;

²² kaput laih di minik balna uduhnamana yakaupak kastanama, kurih tiaskaubās kat, watta di dahtanang kalahwarang yang.

²³ “Sau kidika wauhwi bakanwa kaupak ban kaput laih awaskarang: kat sau kidika laih yang diki dawak manna laih kidika munah aiwa bayak yawamana dawak yang ūki yakat payahyang balna kapat manna.

²⁴ Kaput bahang, sau pis as manna dimana dutamanakat, tatuna kau dinidawan yakat rahmni kalanamna ki, sauni kidika watwi bakanyakwi duna atnin.

²⁵ “Pa aslah muihnimana kidika as di dis kalahwarang kat witing sauni kidika wauhwi mabakanwarang kat, witing wanaihni ulis kidika sipki kaiwi bakanyaknin, wauhwi bakanpamna kidika kaupak.

²⁶ “Muih as kat, witing wanaihni as bik diskarang kat dini wauhwi bakanpamna kidika kaupak watwi bakanyakna atnin, kaunah witing silp bik sipkarang kat bakanyaknin,

²⁷ bakanna mani kaupak ma ampus bayakna kidika kulwi talwarang, dawak baisa kalanin duwa kidika lauwi kalawi witing sauni kidika watwi duna karang.

²⁸ Kaunah witing bakanwi yaknin kidika sip-awas kalahwarang kat, sauni kidika bakanna muihni tingni yakat ban sakkarang laihwi yaknin kurihni kaiwarang kat, bahang kidika mani laih witing sauni kidika laihwi yakna karang, dawak watwi witing duna karang.

²⁹ “Muih as kat witing ū wauhwi bakanwarang kat tawan nuhni daklana pasyakat, kurih as bayakwak usnitkat witing sipkarang watwi bankanyakwi dunin.

³⁰ Kaunah ūni bakanpamna kaupak kurih as laihwak bik watwi bakanyakwas karangkat, kidika ūni laih bakanna muihni kidika barang duna karang. Dawak sulani kat bik duduna karang. Laihwi yaknin kurihni kaiwa yakat bik sip laihwi yakwa karang.

³¹ Tawan daklawas ūni balna kidika laih sihm kulna karang, tawan kaupak naikau babang kapat, laihwi yaknin kurihni kaiwak laihwi yakna karang.

³² “Libai balna laih witingna rahmnina kidika ban duduwakarang watwi ūnina tawan nuhni daklana paskau bangkarang kidika.

³³ Laihwi yakwa muihni kidika libai karang kat, laihwi yakwa kurihni kaiwak ūni kidika dapamwi tawan nuhni yakat kiwarang, witing ūni duwa yakat, kat libai balna laih ū aslah duduwi Israel balna pasyakat tawan nuhni kau duduwa kidika manah.

³⁴ Libai balna tawannina nunuhni yaihnit kau tinglau kasnin sihr dadahna sauni kidika laih sip-awas karang wauhwi bakanna atnin kat witingna dinina ban kaput atnin bahang.

³⁵ “Pa aslah muihnimana kidika witing didis minikunni kalahna karang dawak man yakat ilp yulwarang kat, man ilp kalanamki, sihm pa ūk muihni kat kaiwi bayakwa kapat karang, dawak uma yakat pa kalama.

³⁶ Di as bik kaldak yakwinih, dawak man di wayaki kalama balna kidika minitkau lakwi duwinih; nawatkauh laih man Papangma yakat yamni dutah, bahang man sau aslah muihnimana, ūma yakat pa kalatah.

³⁷ Lalah wayaki kalama kidika minit kau lakta duwinih, dawak di kasnin balna kalama kidika minit kau yakwi duwinih.

³⁸ Yang kuduh Papang yang, manna Papangmana yaklau Egipto kaupak mana yakna Canaán sauni manana atnin dawak Papangma atnin.

³⁹ “Sau aslahmana muihni kidika, manna aslah bangmana mani yakat di dis kalahwi witing muihni kidika muih dini yamyang lani yakat man yak mabakanwarang kat, kalatang kat rahm muih dini yamyang kapat palni laih wark kalahnin-awaski;

⁴⁰ wark kalahyang muihni kapat, kidika awaskat ūma yakat payahyang muihni as kapat kalyamma. Man warkma yamna karang laihwi yaknin kurihni kaiwarang kat,

⁴¹ kidika usnit kat man ūma kaupak kalahwi kiwarang witing walanibis balna karak, dawak sulani balna pasyakat kiwi kawi watwi panina duduna karang;

⁴² kat witingna laih yang diki yamyang balna, Egipto kaupak yaknayang kidika, bahang sip-awaskarang wauhwi bakanna atnin warau lani yakat.

⁴³ Parasni bik taihwi diyayamwinih; nawatkauh laih, Papang kau yamadutamana kidika niningna katanauh.

⁴⁴ “Warau ahal kidika awaskat warau yayal bakankih mawak yaihmat kau nisan ūk awaih dutaman yakat bakanta dutah.

⁴⁵ Kaput bik sipki bakanta dunam pasmangna kau pa ūk muihni balna yalalahwa kidika balna kaupak, dawak walaninabis batahn dadawarang kidika bik, baisa manna saumana yakat yalahwa mani balna yakat; kidika balna yakat sipki bakanta manna dimana dunamna

⁴⁶ dawak walamanabis yakat dipahni diana atnamna manna dautanama kat; bahang ban kidika kaupak yusyamtanama. Kaunah manna laih as bik, Israel mana kidika, taihtas awanama dawak bik dutni diyamtas awanama ā aslahmana kidika.

⁴⁷ “Pa ūk muihni man sauma yakat yalahwa kidika di duyang kalwarang kat, dawak sau aslah muihnimana kidika laih nawatkauh minikunni di diskalwarang kat, pa ūk kaupak yaihnitkau yalahwa muihni kidika, kaput dawak didis kalwa bahang pa ūk muihni sakyakat wauhwi bakanwarang kat,

⁴⁸ witing rahmni duwarang kalbakanwi kalahna atnin. witing kidika kalwauhwi kalbakanna dai karang bik. Witing wirahni yaklauwi sipkarang laihwi yakna atnin,

⁴⁹ kanni karangpa, papani karangpa, wahaini karangpa, kidika awaskat wanaihni ulis balna kidika bik sipkarang laihwi yakna atnin, kaput bik sipkarang witing silp bik yamnin amput yamnin sipkarang kat,

⁵⁰ kulwi talna karang wauhwi bakanna kurihni kaupak watwi laihwi yakwarang kurihni kat: Wauhwi bakanna minit kidika laih kulna karang kurih yapak duwa kidika karang, dawak ma ampus wark kalahna kidika kulwi talna karang wark muihni balna minitna lauwa kidika karak.

⁵¹ Baisa tanit yakat kurih mahni karang kat, kidika karak sahyakwi kulwi kalana karang laihwi yakwarang minit kidika, dawak wauhwi bakanwak;

⁵² kaunah baisa apis kat laihwi yaknin kurihni kaiwi kanin kidika, baisa kurih ampus kidika kaput praisni lauwi kalana karang.

⁵³ Wark muihni kapat kal talna karangki kurih kat kalahnin, dawak bik dutni kal yamnin awaski.

⁵⁴ “Kaunah adika mani kat walwi yakna awas karang kat, pri lani duna karang pri kalna kurihni yak, walanibis balna karak,

⁵⁵ kat Israel walanibis balna kidika yang diki yamyang balna ki yang palni warkki muihni balna; yang lawik Egipto. Yang man papangmayang.