Levítico 23 - Papang Yulni

Alasna yamnin mani balna

¹ Papang yaklauwi Moses yak kiwi kalyulna:

² “Israel balna yakat adika yulni diyultah: Adika mani balna kuduh tanit yamni kidika Papang yakat kalanin, bahang manna laih yultanama, kaluduhna balna holi.

³ “Ma tiaskauas wark alahwama, kaunah ma tiaskaubu laihwa yakat laih wark as bik yamnam awaski; kidika laih urupnin mani as tanit yamni karang, dawak bik kaluduhnin holi bik sakkarang. Angkat yalahtaman karang bik kidika mani laih urupnin mani Papang risnipik kau.

⁴ “Adika balna laih ma tanit yayamni balna karang, kaluduhnin holi kidika yamna atnin Papang risnipik kau, bahang kidika yakat kaluduhnamna karang:

⁵ “Waiku tatuna yakat ma salap minitkau arungka laihwak masan yakat Papang Israel balna laihwi yakna kidika Egipto kaupak, kidika alasnina yayamna karang, witing risnipik kau.

⁶ “Sihm kidika wainiku ma salap minitkau singka yakat plawar pupuhnin dis awi bubusna kat kakaswa alasnina kidika, alasnina yayamna karang Papang risnipik kau. Ma tiaskaubu kidika plawar busna pupuhnin awas kasna karang.

⁷ Ma tatuna kidika yakat kaluduhnin holi as yamna karang. Wark parasni as bik yamnamna awaski.

⁸ Ma tiaskaubu kidika Papang yakat sakripais busta awanama, dawak ma tiaskaubu laihwa yakat kaluduhnin holi as yamtanama. Wark as bik yamtas awanama.”

Di minik tatuna babahwa balna kidika alasnina

⁹ Papang yaklauwi Moses yakat kiwi kalyulna:

¹⁰ “Israel balna yakat adika yulni diyultah: Yang sau manaki yakat awanama usnitkat, dawak plawar minik kidika bahtanama usnit kat manna sumalyang yakat duyawanama, laihwi sitna as tatuna yaknamana kidika.

¹¹ Urupnin mani kidika kaupak payahwak, sumalyang kidika yaklauwi Papang yakat dukiwarang minitdis kalanin dini tanit yamni as, bahang kidika laih duna karang.

¹² Di minik laihwi sitna tunan as duwi kiwarang mani yakat, sīp kurih as duwi kiwarang, sakahwa awaskat, Papang risnipik kau sakripais as busna atnin karauni kauna.

¹³ Duaina karang baisa minit yakat, plawar tanit yamni kidika, paun tiaskauarungka duwi disala karak laihna kidika, kidika laih Papang kalana atnin, minitdis kalanin busna walapni as. Minitdis kalanin dini as utuhnin kidika laih duwi kiuna karang wain batal nuhni as.

¹⁴ Manna angkat mani Papang yakat minitdis dini kidika duyawanama kat laih di kastanama, plawar busna kidika awaskat bukulna kidika kastanama. Adika lani laih ban kaput karang, papangnina kaupak tilahwi kiwarang ban kaput, angkat pāni yalahtanama yakat.

¹⁵ “Plawar minik laihwi sitna tunan as minitdis kalanin dini tanit yamni, duyawanama kidika kaupak, yuldarangkat, yak-urupdinin mani kidika payahwak kaupak kultanama wīk tiaskaubu.

¹⁶ Yak-urupdinin mani ma tiaskaubu kidika payahwak ma 50 kidika laihna karang. Kaput laih Papang yakat minitdis kalanin plawar minik wisam kidika duwi uina karang,

¹⁷ dawak ūnina kaupak uiwarang plawar busna bu, plawar tanit yamni kau pupuhnin dini bitik awi busna kidika, bahang kidika laih aslah tikini paun tiaskaubās duwa karang, bahang kidika minitdis dini as kalana atnin Papang yakat, diminik tatuna kalahna kidika kaupak.

¹⁸ Plawar busna dukiwa kidika karak libitwi duwi kiuna karang sīp tiaskaubu bu, kurih as lalaihna balna kidika, kaunah sakahwa atnin-awaski, turuh almuk wahma as, dawak kuts bu dukiwarang, Papang risnipik kau sakripais busnin karauni kauna, kidika laih minit dis kalanin walapni busna as Papang dini, minitdis kalanin dini plawar minik dawak wain kalawa kidika baisa minit yakat.

¹⁹ “Baisa minit yakat kuts almuk as duwi kiuna karang dutni yama yulni sakripais yamnin, dawak sīp walanibis kurih lalaihna kidika bu duwi kiwarang watwi Dawan karak yamni kalahnin yulni sakripais busnin.

²⁰ Sumalyang kidika yaklauwi tinglau balna kidika Papang muhni yakat duwi kiuna karang, minitdis kalanin dini tanit yamni as, dawak plawar busna bu, plawar minik tatuna kalahwa kidika kau busna kidika, dawak sīp binina bu libitwi duwi kiuna karang. Kidika laih Papang dini yakna karang, dawak sumalyang duna karang.

²¹ “Sihm kidika mani, manna kaluduhna holi as yamtanama, dawak wark parasni bik yamtas awanama. Adika laih lā as ban kaput karang, Papangnina kaupak tilahwi walaninabis yakat bayakna karang, manna angkat pāni yalahtamana bik.

²² “Di minik bahnin mani kiwi kawakat, yamak yakat di minik balna bubukwa balna kidika bitik laih walwinih. Datangkat muih miniknakunni balna dawak pa ūk kaupak muihni balna kidika duduwang. Yang kuduh Papang yang, manna Papangmana.”

Trumpit alasnina

²³ Papang yaklauwi Moses yakat kiwi kalyulna:

²⁴ “Israel balna yakat diyultah: Waiku tiaskaubu laihwak, ma tatuna kidika laih yak-urupdinin mani kultanama, bahang kidika mani kaluduhnin holi as yamta ismangna kattanama, dawak trumpit bik puhtanama.

²⁵ Minitdis dini as bustanama, Papang risnipik kau, dawak wark as bik yamtas awanama.”

Dutni dawak disnin mani

²⁶ Papang yaklauwi Moses yakat kiwi kalyulna:

²⁷ “Sihm kidika wainiku tiaskaubu kaupak ma salap laihwa yakat, kidika mani laih dutni dawak disnin mani karang. Kaput bahang kaluduhnin holi as yamtanama, dawak kidika mani laih di kastas awanama, dawak bik minitdis kalanin dini walapni as bustanama Papang risnipik kau.

²⁸ Kidika mani wark asbik yamnin-awaski, kat dutni dawak disnin mani bahang, kat manna Papangmana kaupak dutmana dawak disnin kidika dutanama bahang.

²⁹ Wais kat kidika muihni di kaswas atnin kidika yamwa karangkat, witing tawanni paskaupak yakwi ipamna karang.

³⁰ Dawak wais kat kidika mani wark as yamwarangkat, wais karang bik, witing tawanni paskaupak kalating diswarang.

³¹ “Wark as bik yayamwinih. Adika lani laih ban kaput karang, Papangnina kaupak tilahwi walaninabis kat kiwarang, angkat manna yalahtanama bik.

³² Manna namangna yakat yak-urupdinin mani as karang, dawak bik di kastas awanama, dawak manna kultanama ma tiaskauarungka mani kidik maulahu kaupak, payahwak maulahu kat.”

Panting kau ū labanni pakna alasnina

³³ Papang yaklauwi Moses yakat kiwi kalyulna:

³⁴ “Israel balna yakat adika yulni diyultah: Waiku tiaskaubu laihwa kaupak ma salap minitkau singka laihwa yakat, kidika kaupak ma tiaskaubu manna panting kau ū labanni pakna alasnina kidika yamtanama Papang risnipik kau,

³⁵ ma tatuna kidika, kaluduhnin holi as yamtanama. Wark as bik yamta awanama.

³⁶ Kidika ma tiaskaubu kidika bitik Papang risnipik kau minitdis kalanin dini kidika busta awanama, dawak ma tiaskaubās yakat bik kaluduhnin holi as yamtanama, dawak Papang yakat minitdis kalanin dini as bustanama. Kidika laih alasna mani as ki, wark parasni as bik yamnin awaski.

³⁷ “Adika mani balna laih tanit yamniki Papang yakat kalana atnin, kidika mani balna yakat manna kaluduhna holi balna yamnamna, dawak kidika yakat manna minitdis kalanin dini bustanama kidika, karauni kauna sakripais busnin, minitdis kalanin plawar minik kau, sakripais, dawak minitdis kalanin wain kau, kaunah kidika laih ma balna yakat talwi kalanin ki,

³⁸ yak-urupdinin mani kidika laih ūk ki Papang risnipik kau yamwa kidika, dawak minitdis kalanin pramis yayamna kidika, dawak bik manna silp kulnamna yamtanama kidika.

³⁹ “Waiku tiaskaubu laihwa pasyakat, ma salap minitkau singka yakat, manna di minik balna kidika uman bahta dulaunamana kat, ma tiaskaubu alasna yamtanama Papang risnipik kau, ma tatuna dawak witni kau ma tiaskaubās kidika, wingmanata puhtanama.

⁴⁰ Ma tatuna yakat pan tanit yayamni minik balna kidika daktanama, dawak kuku satni basni balna, pan basni yayamni balna bik dutanama, dawak ma tiaskaubu Papangmana muhni yakat alasna dutanama.

⁴¹ Kurih kaiwa balna bitik yakat, waiku tiaskaubu laihwa yakat, Papang risnipik kau alasna yamtanama. Kidika laih lā as ban kaput karang, Papangnina kaupak walaninabis kat tilahwi kiuna karang.

⁴² Ma tiaskaubu kidika pasyakat Israel balna palni kidika yalalahna karang panting kau ū labanni papakna kapatnah kau,

⁴³ kaput laih sulani balna bitik amanglalana karang, yang Egipto kaupak Israel balna kidika yaknayang, kat kidika ūni labanni panting kau yamna kapatnah kalatang kakanadai. Yang kuduh witingna Papangnina kidika.”

⁴⁴ Kaput laih Moses yaklauwi Israel balna yakat diyulna dai, ma tanit yamni kukulna balna dai kidika Papang dini atnin.