Levítico 20 - Papang Yulni

Yul dakawas kidika wah kalawi

¹ Papang yaklawi Moses yakat kalyulna:

² “Israel balna yakat adika diyultah: “Israel muihni karangpa kidika awaskat pa ūk muihni karangpa, Israel sauni yakat yalalahwa kat, dawak witingna walaninabis kidika dawan dauh Moloc yakat kalawarang kat, kidika muihni laih dauna atnin ki, kipala kau barhwi īna karang kidika sauni muihni balna yaklauwi.

³ Yang kidika alni niningkauh awaki dawak witing tawanni paskaupak yaktik ipamna awaki, yang paki holi maisihni yamna yulni dawak ayangki holi kidika daukalna, witing walanbis kidika Moloc kau kalana yulni.

⁴ Kidika sauni muihni balna, kidika tanka amanglawas dawi alni kidika ihiwaskarang kat,

⁵ yang witing niningkauh lawaki dawak walanibis balna nining yak bik lawaki dawakat imukna awaki tawannina paskaupak witing karak kalpakwi dutni yayamna muihni balna bitik dawak Moloc yakat uina kidika yulni bik.

⁶ Muih as kat spirit muihni yak dawak sukiah yak kiwa kidika yulni dutni yamwa kidika, yang kidika muihni niningkauh awaki bahang tawanni kaupak yaktik ipamki.

⁷ “Yang diki alahwanauh bitik palni yang akat manah dawak holi awanauh, kat yang laih Papang yang bahang, manna Papangmana

⁸ yang laki balna yakat yamtanauh. Yang kuduh Papang yang, diki manayaktayang kidika.

⁹ “Angdika muihni kat Papang yakat dawak nanangni yakat dutni kalyulwarang kat, kidika muihni laih daunin yak wirlana karang. dutni kalyulna bahang Papangni yakat kidika awaskat nanangni yakat, bahang dauwarang kidika laih witing alas tunan yak sakkarang.

¹⁰ “Muih askat wanaihni yalni karak dutni yayamwarangkat, daunin yak wirlana karang albupak.

¹¹ “Muih askat witing papangni yalni karak kalalangwarang kat witing alas Papang yak risnipik dis yamwi. Kaput bahang albupak daunin yak wirlana karang, dawak dadauwarang kidika laih witing alas tunani yak karang.

¹² “Muih askat walanbis yalni karak kalalangwarang kat, albupak daunin yak wirlana karang dawak dadauwa kidika laih witing alas tunanina yak bukwarang, kat kidika laih ayangni daukalna as bahang.

¹³ “Muih askat muih al ūk karak kalalangwarang kat sihm muih yal as karak kalangnin kapat, albupak laih daunin yakat wirlana karang, dawak dadauwa kidika laih witingna alas tunanina yak bukwarang, kat ayangni daukalnin yayamna bahang.

¹⁴ “Muih askat witing yalni balna duwarang sirau kidika dawi nanangni karak libitwi duwarang, bahang witing laih dutni yamwi kaput laih witingna bāspak sangka kuhkau busna karang. Kaput laih manna pasmangna yakat dutni kidika diskarang.

¹⁵ “Al as kat tinglau karak kalduduwarang kat kidika laih daunin yakat wirlana karang, tingnilau kidika bik ipamna karang.

¹⁶ “Muih yal as kat tinglau karak kalduduwarang kat, yal kidika dawak tinglau kidika bik īna karang. Dadauwa kidika laih witingna alas tingnina yakat bukna karang.

¹⁷ “Al askat witing wirahni yal kidika witing yalni kapat duwarang kat, Papangni walanbis karangpa kidika awaskat nanangni walanbis karangpa, kaunah witingna wahnina dutwi kalduduwarang kat, albupak īna karang pa aslah muihni balna kidika muhnina tani yakat, kat wirahni yal karak wahnina dutwi kaldunin laih asalni as ki, wais kat kidika yamwakat witing alas pātni kidika turukwarang.

¹⁸ “Muih al askat yal wainiku sikninis kallaihna lik kat witing karak kalalangwarang dawak wahninina dutwi kalduduwarang kat, muih yal wainiku sikninis kidika lāih kalahwi, dawak kaput laih muih yal kidika alas silp yaklauwi lāih yakwi; kaput bahang, albupak tawannina kaupak yakwi imumukwarang.

¹⁹ “Nanangma wirahni yal yakarak wahmana dutwi kalduduwinih dawak papangma wirahni yal karak bik kaput yamwinih, kat kidika lāih kal wanaih palni bahang witingna albupak dutnina kidika tururukna karang.

²⁰ “Angdika muihni papani, kidika awaskat kanni yalni karak kalalangwarang kat, witing kanni kidika awaskat papani kidika risnipik diswi; witingna albupak dutnina kidika tururukwarang: kaput laih witingna dadauwarang sulanina diski.

²¹ “Muih as witing wirahni yalni dakyakwarang kat, witing wirahni yakat risnipik dis yamwi. Kidika laih dutni kulna as ki, bahang albupak walaninabis dis kakalwarang.

²² “Yang lāki balna yakat yamtanauh; bitik palni kaput yamtanauh. Kaput laih manna sau manana kidika kaupak manaruhmwi yakwas karang.

²³ Manna muhmana kaupak, ruhmtik daki balna yayamwa kidika yayamwinih, witingna laih adika dini balna bitik yayamna dai, kidika bahang yang sip-awas danayang.

²⁴ Yang pramis manatayang, witingna saunina dai kidika manna saumana kalna karang, yang lawik kidika sauni manaki, kidika pāni laih amak dawak tāwas kidika was kapat kikira kidik. “Yang kuduh Damanawan, dawak Papangmana, tawan ūk balna karak satuk manayamnayang kidika.

²⁵ Kaput bahang, manna bik satuk kidika amanglanamna ki, maisihni, dawak maisihnidis kidika karak, dilawani balna maisihni dawak maisihnidis kidika balna karak. Didauh balna kidika yulni manna bik dutni kakalwinih, dilawani balna, bil satni balna dutni kat namangna kanayang kidika.

²⁶ Manna holi atnamnaki, yang nikingyakat, kat yang, Dawanyang adika holi yang bahang, tawan ūk balna karak satuk manayaknayang, yang tawanki atnamna yulni.

²⁷ “Al karangpa, yal karangpa spirit dutni dilaihna karang kat, kidika awasbik di malnikau balna kidika yakwi yuyulwa kidika, kipala kau bahrwi īna karang, bahang dadauwa kidika witingna alas salahnina yakat karang.”