Levítico 18 - Papang Yulni

Wahnina dutwi kaldunin dutni kulna balna kidika

¹ Papang yaklauwi Moses yakat kiwi kalyulna:

² “Israel balna yakat aput diyultah: “Yang kuduh manna Papangmana yang.

³ “Egipto muihni balna amput yalalahwa kidika usnit uhuiwinih, manna witingna saunina yakat yalahtamana dai kidika. “Canaán muihni balna amput yalalahwa kidika bik usnit uhuiwinih, dawak witingna lanina balna kaput bik uiwinih.

⁴ “Lāki balna yakat yamtanauh; dawak lāki balna kaput laihta yamtanauh; amput yulwa kidika kaput yalahtanauh. Yang kuduh manna Papangmana yang.

⁵ “Yang lāki balna kaput laihta yamtanauh. Angdik alni kat kaput yamwarang kat, sangka karang. Yang kuduh Papang yang.

⁶ “Muih al as bik witing wanaihni yal palni yaihnit yakat kiwi wahnina dutni kaldunin awaski, kidika yal yakarak. Yang kuduh Papang yang.

⁷ “Papangma risnipik dis yamwinih, papangma yalni nanangma karak kaldutanama yulni; kidika minit yakat yal kidika laih nanangma kidika bahang kaput yamnam awaski.

⁸ “Papangma yalni karak wahmana dutta kalduta, papangma risnipik dis yamwinih.

⁹ “Man wirahma yal yakarak wahmana dutta kalduduwinih. Papangma walanibis yal karangpa, dawak kidika awaskat nanangma walanibis yal karangpa bik; ūnipas yakat batahndana pa kidika awaskat pa ūk kau batahndana karang bik sihm kapat ki, bahang sip man witing karak wahma dutta kaldutasman yal yakarak.

¹⁰ “Man rismapik diswinih, muhma karak kalduta, man walamabis al walanibis, kidika awaskat walamabis yal walanibis karangpa bik. witing karak sip awaski wahma dutta kaldunam.

¹¹ “Man papangma yalni walanibis karak bik sip awaski wahma dutta kaldunam, kat papangma munah kaiwi kalahna bahang, kidika laih man wirahma yal. Witing karak sip-awaski wahma dutta kaldunam.

¹² “Man papangma wirahni yal kidika karak sip-awaski wahma dutta kaldunam; kat yal kidika laih papangma karak ānina kapapat duduwa bahang.

¹³ “Man nanangma wirahni yal karak bik wahma dutta kalduwinih; witing kidika laih nanangma āni kapat duwi.

¹⁴ “Man papangma wirahni al, kidika awaskat nanangma wirahni al yalni karak wahma dutta kalduwinih, kat kidika laih man nabisma.

¹⁵ “Man walamabis al yalni karak wahma dutta kalduwinih, kat kidika laih man walamabis yalni; witing karak wahma dutta kaldunam awaski.

¹⁶ “Man wirahma al risnipik diswinih, witing yalni karak wahma dutta kalduta.

¹⁷ “Yal as karak wahma dutta kaldunaman kat, kidika yal walanibis karak bik wahmana dutta kalduduwinih, nabisma karak bik kalduduwinih, walanibis al, kidika awaskat yal karang bik, witing karak wahmana dutta kalduduwinih. Kidika laih dutni palni ki, kat kidika laih man āma duwi.

¹⁸ “Yalma wirahni kidika, man yalma kapat duwinih, dawak bik man yalma kidika sangka mani yakat wirahni yakarak wahma dutta duwinih, witingna manah waihla kalahnin-awas yulni.

¹⁹ “Dawak yal as witing wainiku sikninis likkidika mani balna yakat wahma dutta kalduwinih.

²⁰ “Man yaihmat yakat muih balna bangkidika yalnina karak wahma dutta kalduwinih, kaput yamta maisihni kalnam-awas yulni.

²¹ “Man walamabis ahal balna kidika as bik minitdis dini kapat kalawinih papang dauh Moloc yakat. Kaput yamta Papang yakat dutni kalyulwinih. Yang kuduh Papang yang.

²² “Man muih al as karak kalalangwinih, sihm yal as karak alangwaman kapat. Kidika laih ayangni dutni yamnin as ki.

²³ “Dawak wahma dutta tinglau balna karak kalduwinih, kidika yulni maisihni kalnam-awas yulni. Dawak yal bik sihm kaput yamnin awaski tinglau karak, kidika laih ayangni dutni yamnin as ki.

²⁴ “Kidika dini balna yamta maisihni kakalwinih. Kidika yamwi maisihni kakalna balna kidika ruhmtik yakna awaki, manna muhmana tani yakat,

²⁵ dawak witingna saunina kidika bik maisihni kalna; dawak witingna dutni yayamna kidika minit diyulnayang, kaput bik laih witingna saunina kidika yaklauwi bik dikangwi yakna.

²⁶ Kaunah, Israel muihni mana laih, dawak pa ūk muihni balna manna pasmangna yakat yalalahwa balna kidika, yang laki balna kidika laihta yamtanauh, dawak ayangni daukalnin satni balna as bik yayamwinih,

²⁷ kat kidika ayangni dutni yamnin balna satni bitik laih yayamna dai, kidika muihni balna yalalahwadai kidika, manna tamatnakau balna dai kidika, dawak sau kidika bik maisihni kalna dai.

²⁸ ¡Manna maisihni yamtanangkat sau kidika yaklauwi manakangwi yaknin-awaski, manna tamatnakau muihni balna yakat ruhmwi yakna kapat manayamnin-awas ki!

²⁹ Angdika muihni kat, kidika ayangni dutni yamnin balna kidika yamwarang kat, witing tawanni paskaupak dispamna karang.

³⁰ Kaput bahang, yang laki balna kidika yamtanauh, manna tamatnakauh muihni balna ayangni dutni yayamna dai kapat laih yayamwinih, dawak kidika yamta maisihni kakalwinih. Yang kuduh manna Papangmana yang.”