Levítico 17 - Papang Yulni

Maisihni dis pāni kidika aslah ki

¹ Papang yaklauwi Moses yakat kiwi kalyulna:

² “Man kalyultah Aarón dawak walanibis balna yakat bik, Papang yaklauwi aput yamnin yulna:

³ “Israel balna pasyakat wais turuh dawak kuts almuk as iwarang kat, ū lababanni pasyakat kidika awaskat ahni naikau,

⁴ bahang kidika dimuihni laih Kalpaknin ūni labanni dūrni kiwikawa yakat duaiwas karang kat Papang muhni tani yakat minitdis kalanin dini as, bahang witing laih pāt duwarang ā utuhna kidika yulni, kaput laih witing kidika muih balna paskaupak dispamna karang.

⁵ Adika laih Israel balna witingna ahni yakat di ihiwa kidika Papang muhni yakat duwi kiunin yulni, dawak sumalyang balna muhnina yakat duwi kiunin kalpaknin ūni labanni kiwikawa yakat, kaput laih witing yaklauwi sakripais yamna karang watwi Dawan karak yamni kalahnin yulni.

⁶ Sumalyang yaklauwi ā kidika kau sakripais buswa pāni Papang dini kidika yakat rasna karang, kalpaknin ūni labanni kiwikawa kau yakat, dawak salani kidika laih busna karang walapni yamni as Papang yakat.

⁷ Dawak wat bik sakripais yamwas karang kidika spirit dutni yakat, kidika yakat minitnayulwi dutni kalalahna balna kidika. Adika lani laih ban kaput karang manna pasmangna yakat, walamanabis kaupak ban kaput kiuna karang.

⁸ “Dawak bik diyultah wais karang bik pa ūk muihni balna Israel pas yakat yalalahwa balna kidika, karauni kauna sakripais busnin karang kat,

⁹ witing, kidika dini kalpaknin ūni labanni kiwikawa yakat dukiwas karang kat Papang muhni yakat, kidika tawanni paskaupak dispamna karang.

Ā kasnin dutni kidika

¹⁰ “Yang Israel balna niningna kauh awaki, dawak pa ūk muihni balna Israel balna paskau yalalahwa balna niningna yakat bik, ā kaswarang kat, amput yamwi kaswarang kidika bitik yakat. Yang lawik kidika tawanni paskaupak dispamki.

¹¹ Kat di balna bitik āni duwa balna kidika laih, witingna sangninaka kidika ānina yakat sakbahang, dawak yang lawik manna yakat mananayang sakripais busnin pāni as, bahang kidika pāni munah manna sipmana sangnika kidika laihwi yakna atnin, kat āni kidika yaklauwi sangnika kidika laihwi yakwa bahang.

¹² “Kaput bahang Israel balna yakat diyultayang: Manna kaupak as bik dawak manna pasmangna kau pa ūk muihni balna yalalahwa kidika bitik yakat manayultayang, ā kidika kasnamna awaski.

¹³ Israel balna dawak, muih ūk balna pasmangna yakat yalalahwa balna kidika bitik, di as iwarang kat, lawani duwa balna kidika bitik, āni kidika sau yakat utuhwa kidika minit yakat sau kau kuhrwi mukna karang,

¹⁴ kat sangnika duwa balna kidika laih witingna ānina yakat sakbahang sangninaka kidika. Kidika bahang yulnayang ā kidika kakaswinih, kat sangnika duwa balna kidika bitik laih kidika yakat witingna sangninaka sakbahang, wais ā kaswarang kat kaldakwi yakna karang.

¹⁵ “Israel balna, kidika awaskat muih ūk balna witingna pasyakat yalalahwa balna kidika, asangpas dini as pini dauna karangpa kidika awaskat nawah īna karang kat duwi kakaswarang kat, witing asninana suhnin ki, dawak witingna bik was kau kalsuhnin karang ki, bahang kaput witingna kidika maisihni dikulna karang pukta kat. Usnit kat laih witingna kidika maisihni dis kalna karang.

¹⁶ Kaunah asnina suhwas dawak witing bik was kau kalsuhwas dawarang kat, dutni kidika witing trukna karang.”