Levítico 16 - Papang Yulni

Dutni dawak disnin mani

¹ Papang Moses karak yulbabauna, Aarón walanbis balna kidika Papang yaihnit palni yak uiwak imukna usnitkat.

² Dawak Papang yaklauwi Moses yak kalyulna: “Wirahma Aarón yak kalyultah witing awar pini asna daklana pining kau holi pāni yakat kanin awaski, lā baksni putnin muhni tani yakat bik awaski, kaput laih dauwas karang, kat yang putnin minitkau mukus duwa yakat lāih alahwaki bahang.

³ Aarón laih witing holi pāni yakat kanin ki turuh almuk wahma kat as duwi, dutni kidika yulni sakripais yamnin, dawak sīp almuk as kidika laih karauni kauna sakripais yamna karang.

⁴ Linin prakni Papang dini yakna kidika kau kawi kiunin karang, dawak ilpni kidika bik linin asnina kat kawi kiwarang, dawak banimak sitnin bik sitwi kiwarang dawak tunan paknin linin asnina kau yamna kidika pakwi kiwarang. Kidika asnina laih yang ayangki kau yakna, kaput bahang, baisa kawas kau witing muihni kidika bitik laih was kau suhnin karang.

⁵ “Israel muihni balna kaupak laih, Aarón witing kuts almuk bu duwarang, witingna dutnina yayamna kidika yulni sakripais yamnin, dawak sīp almuk as bik duwarang, kidika laih karauni kauna sakripais yamna atnin.

⁶ Kaput laih turuh almuk wahma kidika laih witing sakripaisni yamwarang dutni balna yamna kidika dawak disna atnin, kaput bik laih sulani balna dutnina dawak disnin bik.

⁷ Usnitkat kuts almuk bu kidika duwi Papang muhni yakat duwi kiwarang, kalpaknin ūni labanni dūrni kiwikawa yakat;

⁸ usnit kat kuts ahalmuk bu kidika yakat suerte diruruhmna karang: suerte as kidika laih Papang kaupak karang dawak ūk kidika laih Azazel kaupak karang.

⁹ Papang suerniti kidika kat almuk minit yakat bukwarang kidika laih, Aarón yaklauwi sakripais yamna karang, dutni kidika yulni;

¹⁰ kaunah angdik kutsni almuk minit yakat Azazel suerniti bukna kidika laih, Papang muhni yakat sangka duwi kiuna karang, dutni dawak disnin kidika yulni, dawak usnit kat kauhmak wanilang yakat yakpamwak kiuna karang, Azazel sakkidika pāni yakat.

¹¹ “Aarón yaklauwi turuh almuk wahma kidika dukiwarang witing palni sakripais yamnin, dutni yamna kidika yulni, witing dutni kidika dawak disna atnin yulni dawak sulani balna dutnina bik disnin yulnin.

¹² Usnit kat walapni busnin dini, Papang muhni tani kau sakripais busnin pāni sak kidika kaupak kuh tuturni duwi puwi bunghdana kidika duwarang, dawak di walapni balna wauhwi langni dana kidika tingkurus bu duwi dukiuna karang asna daklana sakkidika piningyakat;

¹³ walapni kidika kuh pasyakat uh'ana karang Papang muhni tani yakat, dawak walapni buswa wayauni kidika pramis baksni muhni yakat manah dawarang. Kaput laih Aarón kidika dauwas dawarang.

¹⁴ Turuh almuk āni kidika bik apis duwarang, dawak tingki kau duwi kidika baksni muhni yakat rasna karang, makilwa niningkauh yakat. Usnit kat wat tiaskaubu rasna karang, putnin muhnit niningkauh yakat,

¹⁵ kidika usnit kat kuts almuk kidika iwi sakripais yamna karang, tawan dutni yamna kidika yulni sakripais yamna atnin, dawak āni kidika duwi kiuna karang asna daklana sakkidika pining yakat; dawak pasyakat witing yaklauwi rasna karang putnin muhni kidika pasniningkauh dawak ahni niningkauh yakat bik, sihm turuh āni kau amput yamna kaput.

¹⁶ Kaput yamwi maisihnidis pāni kidika maisihnidis yamna karang, Israel balna kulninna dutni dawak dutni ūk balna yayamna kidika bitik yulni. kalpaknin ūni kidika bik kaput yamna karang, kat kidika laih witing papus yakat sakbahang, kaput bik witingna maisihnina papus yakat bik.

¹⁷ “Aarón witing maisihnidis atnin pāni yakat kana muih balna dutnina dawak disnin kidika duna atnin, dawak witing kalahwa kat, muih as bik kalpaknin ūni yakat sak-atnin awaski. Witing dutni balna dawak wanaihni dutni balna, kaput bik Israel balna dutnina dawak disnin kidika duwarang kat,

¹⁸ kalahwi kiwarang Papang muhni kau sakripais busnin pāni sakkidika maisihni dis yamna atnin. Turuh almuk dawakat kus almuk ani kidika apis duwi kahna karang tamni balna rau kidika yakat,

¹⁹ dawakat ā kidika tingni yakat duwi sakripais busnin pāni minit yakat rasna karang wat tiaskaubu. Kaput yamwi Israel balna maisihni kidika disyamna karang, dawak Papang dini yakna karang.

²⁰ “Aarón witing maisihni dis pāni kidika maisihni dis yamwarang, kalpaknin ūni labanni kidika dawak sakripais busnin pāni kidika bik, kaput laih Kus almuk sangka sakkidika duwi uiwarang

²¹ dawak, tinglau tunani minit yakat tingni yuwarang, dutni balna bitik kidika yakwi yulna karang, kalbaunin lani, dawak Israel balna dutnina bitik. Kaput yamwi dutni balna kidi bitik kuts almuk tunan takat ilna karang, dawak muih as yaklau duwi kiwarang kauhmak wanilang yakat dawi uluhpamwarang.

²² Kaput laih kuts almuk kidi kauhmak wanilang yakat kiwi diswarang, witingna dutnina kidika bitik duwi kiwarang muih dis pāni yakat.

²³ Usnit kat Aarón kalpaknin ūni labanni yakat kawarang dawak linin asnina kana dai kidika, maisihni dis pāni yakat kawi kiunin yulni, bahang asnina kidika yakwi yakat danakarang.

²⁴ Maisihni dis pāni yakat was kau kalsuhwi yaknakarang, usnit kat asnina kawi kalahna karang witing sakripaisni yamna atnin karauni kauna sakripais buswa kidika tawan yulni yamwa kidik, kaput laih witing dutni yamwa kidika dawak disnakarang, dawak tawan dutni yamwa kidika bik.

²⁵ Dutni yamna yulni sakripais busna salani balna kidika laih sakripais busnin pāni yak ilwi busna karang;

²⁶ dawak Kus dukiwi Azazel pāni yakat yalahna muihni kidika laih, asnina balna suhwarang dawak witing bik was kau kalsuhna karang, usnit kat sip karang U lababanni balna pasyakat kiwi kana karang.

²⁷ “Turuh almuk dawak Kus almuk karak dutni yamna yulni sakripais busna dai kidika, dawak kidika āni balna maisihni dis pāni yak du'kiuna dai kidika dutni dawak disna atnin yulni, kidika dini ū lababanni paskaupak naikau yakwi duwi kiwarang, unitak, muihni, dawak ūk balna bik ban anawi kuhkau busna karang.

²⁸ Kidika dini busna muihni kidik asnina suhwarang dawak witing bik was kau kalsuhwarang, dawak usnitkat sip karang U lababanni balna pasyakat kiwi kanin.

²⁹ “Adika lani laih manna pasmang yakat ban kaput karang: waiku tiaskaubu laihwak ma salap yakat manna di kastas yuh wauhtanama, bahang manna war bitik yamtas datanama, Israel balna bitik, kaput bik muih ūk balna Israel balna pasning yak yalalahwa balna yak bik,

³⁰ kaput laih kidika mani manna dutmana dawak disnin kidika dutanama, Papang muhni tani kaupak, dawak kidika balna kaupak klin alahwanama.

³¹ Kidika lāni laih ban kaput karang: kidika mani laih manna namangna yakat urupnin mani as tanit yamni karang bahang di kastas yuh wautanama.

³² Sumalyang as walwi yakna kidika dawak witing yakat parasni bitik palni kalana yaka Papangni pāni yakat Sumalyang kana atnin, bahang dutni dawak disnin kidika yamnakarang; kaput laih linin asnina Papang dini yakna kidika yakau kana karang

³³ dawakat maisihni dis pāni kidika maisihni balna dis yamnakarang, kalpaknin ūni labanni dawak sakripais busnin pāni, dawak kaput laih dutni dawak disnin kidika duduna karang Sumalyang balna dawak muih balna bitik.

³⁴ “Adika lani laih ban kaput karang manna yak kurih as pasyakat wat as dutni dawak disnin kidika yamnakarang, Israel balna dutni yayamna kidik.” Papang yaklauwi Moses yak pakna kaput yamna.