Levítico 15 - Papang Yulni

Muih al yakat maisihni as kidika yulni sumalna

¹ Papang yaklauwi Moses dawak Aarón yakat kiwi diyulna:

² “Israel balna yak adika yulni diyultah: Muih al as wasni kalahwarang kat, kidika kalahwa yulni maisihni kalkulnakarang.

³ Muih al sikninis wasni kīra kidika yulni maisihni kulna, dawak kaput bik muih al muihni wasni kidika kalahwas dawarang kat siknis kidika yulni. Kaunah witing kidika ban laih maisihni kalkulnakarang.

⁴ “Angkat pāni yak al kidika kalangwak sikninis wasni kidika kalahwi suihna karangkat, kidika pāni laih maisihni kulnakarang. “Ais diniyak yalahwarang kat, kidika dini laih maisihni kulnakarang.

⁵ “Angdik pāni kalangna yakat wais laihwarang kat, kidika muihni laih asnina suhnin karang, dawak bik waskanin karang, dawak pukta kat maisihni kulna karang.

⁶ “Angdik yalahna pāni yakat wais yalahna karang kat, kidika muihni laih asnina suhnin karang, dawak waskanin karang, dawak witing kidika maisihni kulna karang pukta kat.

⁷ “Wais karang bik, wasni kira muihni yakat laihwarang kat, asnina suhnin karang dawak bik waskanin karang, dawak pukta kat maisihni kalkulna karang.

⁸ “Wasni kira muihni kidika yaklauwi maisihni dis muihni yak susuih tuhwarang kat, witing asnina suhnin ki dawak was bik kanin karangki, dawak witing kidik maisihni kalkulnakarang pukta kat.

⁹ “Aras kilnin sinini kidika yalahna karang kat muih al wasni kīra muihni kidika, kidika sinini maisihni kulnakarang.

¹⁰ “Angdik muihni kat muih al wasni kira kidika yalahna pāni yakat laihwarang kat kidika muihni laih maisihni kalkulnakarang pukta kat. “Waiskarang bik kidika dini balna dukiwarang kat, witing asnina balna kidik suhna atnin karang dawak witing bik waskana karang, dawak witing kidika maisihni kalkulnakarang pukta kat.

¹¹ “Angdika muihni wasni kira alni yak laihwarang kat, dawak tingni suhwas karangkat, asnina balna suhnakarang dawak witing bik kalsuhwi yakna karang, dawak witing kidik maisihni kalkulna karang pukta kat.

¹² “Muih al wasni kira kidika sau suba yak laihwarang kat, kidika subani laih sahpamnin karang; dawak pan kau yamna dini balna karang laih suhninkarang.

¹³ “Wasni kira alni kidika sikninis kaupak kalyamwarangkat, ma tiaskaubu bayakwak kat maisihni dis kalahna karang; asnina balna suhwarang dawak witing bik kalsuhwarang was tuna wasni kau, kaput laih maisihni dis kalahna karang.

¹⁴ Ma tiaskaubās laihwak buhtuku bikikisni bu duwarang dawak buhtuku walanibis bu duwarang, dawak kalpaknin ūni labanni yakat kiwi Papang muhni kat dini balna kidika sumalniyang yakat kalawarang.

¹⁵ Sumalyang yaklauwi as duwi dutni yulni sakripais yamwarang dawak ūk kidika laih karauni kauna sakripais yamwarang, Papang muhni yakat kaput maisihni dis kalnin kidika yamwarang wasni kira alni kidika.

¹⁶ “Muih al as witing wasni kalahwarang kat, was kau muihni bitik kalsuhwarang dawak witing kidika maisihni kalkulnakarang pukta kat.

¹⁷ “Asna karang bik kidika awaskat di unitak karangbik muih al wasni kidika tahna karangkat was kau suhninkarang, dawak maisihni kulnakarang pukta kat.

¹⁸ “Muih al as dawak yal as karak wahnina dutwi kalduduwarang kat, albupak was kau kalsusuhwarang dawak maisihni dikulna karang pukta kat.

Yal yakat maisihni kalkulna balna kidika

¹⁹ “Muih yal wainiku siknis kal laihwa kidika maisihni kalkulnakarang ma tiaskaubu kat. “Wais karangbik laihwarang kat maisihni kalkulnakarang pukta kat.

²⁰ “Muih yal wainiku siknis kal laihna mana balna yakat kalangna pāni balna kidika maisihni kulnakarang. “Ais dini yakat yalahwarang kat kidika dini laih maisihni kulnakarang.

²¹ “Witing kalangna pāni yakat wais laihwarang kat, witing asnina suhnin karang dawak muihni bik was kau kalsuhnin karang, dawak witing kidik maisihni kalkulnakarang pukta kat.

²² “Yal kidika yalahna pāni yakat wais laihwarang kat, witing asnina kidika suhna karang dawak, muihni bik was kau suhna karang, kaput laih witing kidika maisihni kalkulna karang pukta kat.

²³ Yal kidika kalangna kidika awaskat yalahna pāni wais karang bik laihwarang kat, maisihni kalkulna karang pukta kat.

²⁴ “Muih al as kidika yalni karak wahnina dutni kalduduna karang kat, maisihni kidika witing yakat bik kal-laihna, bahang witing kidika maisihni kalkulna karang ma tiaskaubu kat, dawak kidika alni kalangwarang pāni yakat bik maisihni kulna karang.

²⁵ “Muih yal as kat āni kalahwarang kat, baisa wainiku sikninis laihwas bik, kidika awaskat, wainiku sikninis laihwak uba nai kaldawas karang kat, witing kidika maisihni kalkulna karang āni kalkalahwa mani balna yakat, sihm wainiku sikninis laihna kapat.

²⁶ “Angdik pāni yakat yal kidika payahwarang kat, dawak witing āni kalahwak likkidika mani balna yakat pa yalahwarang balna kidika, kidika pāni laih maisihni kulna karang, yal kidika wainiku sikninis laihna likkapat.

²⁷ “Wais karang bik kidika dini balna laihwarang kat, kidika muihni laih maisihni kalkulna karang. Witing asnina suhna karang dawak bik muihni kidika was kau kalsuhna karang, bahang kaput laih witing kidika maisihni kalkulna karang pukta kat.

²⁸ “Āni kīra kidika laihwatwarang kat, kidika kaupak ma tiaskaubu kat kulnin ki, usnit yakat laih witing kidika maisihni dis kalna karang.

²⁹ Ma tiaskaubās laihwa yakat, witing buhtuku bikikisni bu duwarang dawak buhtuku walanibis balna bik bu duwarang, dawak sumalyang yakat duwi kiwarang, kalpaknin ūni dūrnikung yakat.

³⁰ Sumalyang yaklauwi dini balna kidika as duwi dutni yulni sakripais yamwarang, dawak ūk kidika laih karauni kauna sakripais busna karang. Sumalyang yaklauwi Papang muhni yakat kaput maisihnidis kalahna kidika yamwarang, yal witing āni kalahwadai kaupak,

³¹ dawak kaput yamta manna Israel kidika maisihni kaupak dakyaktanama, kaput yamwi dadauwas karang, yang witingna pasningna yakat yalahtayan.”

³² Adika lani laih muih al wasni kalahwak amput witing maisihni kalwa kidika lani;

³³ dawak yayal balna waininaku siknis tatalwa kidika, dawak yul aslah, muih muihnina paskaupak wasnina kalahwa kidika al pa, kidika awaskat yalpa, dawak muih ahal witingna yal wainiku siknis kallaihna kat payayahwa kidika.