Jonás 2 - Papang Yulni

Jonás minit yulna

¹ Kaput laih Jonás minit yulna Papang yakat, waspadini bānipas kaupak,

² kaput yulna: “Kulnik kaida pasyakat man yakat mayulnayang, Papang, dawak man nangkitlana man. Dauna pāni tuhni kaupak man yakat mayulting kat yadakanaman.

³ Kuma tanit tuhni yakat yaruhm'anaman, dawak was murwa kidika yakat yahana. Was nuhni lalamwa balna sihnaman kidika yang mikit munah bayakna.

⁴ Yang kaldakanayang man kaupak naikau yayakpamnaman; kulnayang, yang wattik man uma maisihni dis kidika talas awaki.

⁵ Was kidika bitik laih mikityakat dai; kuma tuhni kidika yang mikit yakat dai tunaki yakat dibasta balna kidika widitna dai.

⁶ Tuhni nuhni pasyakat āyawanayang dai; ¡silak yahanaman kidika ban kaput awaki kulnayang dai! Kauna man Papang, kidika kaupak yalaihta yaknaman dai daunin kaupak.

⁷ Yang ising aiting sangkika kidika mahka kalahkiwak, Papang man yakat isingkatna dai; yang mikit yulnayang kidika man yakat kiuna uma maisihni dis yakat.

⁸ Dawan dauh yakat usnit uiwa balna kidika man lama yakat uiwas ki;

⁹ kauna yang laih, yang dikit yamni kau man yakat sakripais buski ki; yang pramis yamnayang yakat yamki ki. ¡Papang man manah sip man yalaihta yaknam!”

¹⁰ Kaput laih Papang yaklauwi pakna, waspa dini kidika yakat, Jonás kidika buhni yakat ilwi tiningyakna atnin.