Job 4 - Papang Yulni

Yulbabauna kidika uduhna tatuna Elifaz

^1-2 Rahm palni kidika laih, Job, man dutni dakama ki, muih as man yakat yul mabauwarang kat, kaput kauna sip-awaski ban ap danin.

³ Man, muih balna yakat manas sumaltaman dai, dawak parasninadis kidika, parasnina diataman dai;

⁴ man lawa kulnin parasni kalataman, sau yakat bukwa muihni yakat, dawak tingni yakat laihtaman dai buknin manah muihni yakat,

⁵ ¿waradika yamadutang kulnam parasni dis kalwi, dalani wauhnin kidika man yakat malaihwak?

⁶ Man kidika Papang warauni yamni as man kidika, dawak bik yamtaman balna kidika barangni manah kauna, ¿amput dawak kulnam kidika rahm palni kultasman?

⁷ Kulta talah, ismang katwarangpa, muih as dutni yamwas kidika pini disnapa.

⁸ Ma balna bayakwi kaina yakat nikingkana, dutni minik dutni dadahwa kidika, dadahna kidika minik babahwarang.

⁹ Papang kulnin daukalwak witingna minitna yakat wingnita kau puhwi iwi disyamwi.

¹⁰ Ampat parasni sarahwi ihwarang bik layan kapat, Papang yaklauwi tininapas putwi ananina bahwarang.

¹¹ Layan, di ikuhti walwi sip yakwas dawi dauwa kapat dadauna karang, dawak walaninabis balna bitik pini ruhna karang.

¹² Ap dis yang akat yul as kaina, bahang bakai laih yang tapaki yakat dakanayang.

¹³ Pukta muih bitik miniknakauhwa yakat, yang mikpa yakat talikdai, amana kau kapat, di dutni as.

¹⁴ Yang uba yamadunayang dai, wakalki balna bitik laih yayukwadai.

¹⁵ Yang muhki yakat wing puhwak sann dawak dakingkat ukitak bitik yarurus dawadai.

¹⁶ Muih as sakdai, dawak wayani bitik talnayang dai; kauna muihni palni laih talasyang dai ampat dai pa. Di bitik ap dai ... Usnitkat witing dinit kidika yulwak dakanayang:

¹⁷ “¿Muih kidika sipyah la kat atnin Papang muhni yakat? ¿Sipyah maisihni dis atnin di bitik yamyang niningyakat?

¹⁸ Baisa witing yaihnitkau insal balna duwasak kidika balna yakat bik, kulnin bitik palni laih dikulwas ki. Innisal balna palni bik, Papang yaklauwi witingna dutnina walwi yakwi,

¹⁹ ¡sau muihni laih mahlaih, witing yudutni ki, sihm sau kau ū yamna kapat ki, kauhmak minityakat, dawak bik sipki dimuih as taihwi sikitpamwa kapat bik atnin!

²⁰ Mapiris kaupak masan kat uman ipamna ki, dauwa kidika ban kaput atnin dauwi, muih as bik kulnin yakat kulwas ki.

²¹ Witing sangnika kidika dahn kalwi, sihm wahbin as itisdakpamwa kapat; dawak dauna ki sins lani nuhni kidika bik laihwas.”